ESB-málið: Stóru málaflokkarnir að bresta á

Í MBL í dag var fjallað um ESB-málið, en á þessu ári hefjast viðræður við ESB um "stóru málin" sjávarútveg og landbúnaðarmál (þó hlutur hans sé ekki mikið af heildarþjóðarfrmleiðslu landsins) og í frétt blaðsins sagði:

"Þetta voru gagnlegir fundir. Ég hitti fyrst Stefan Füle, stækkunarstjóra Evrópusambandsins. Síðan átti ég klukkutíma fund með Mariu Damanaki [sjávarútvegsstjóra ESB] og voru þá fyrst og fremst sjávarútvegsmálin rædd. Síðan átti ég aftur fund með Füle og Dacian Ciolos [landbúnaðarstjóra ESB]. Þá var farið sameiginlega yfir stöðuna í viðræðunum og þá sérstaklega landbúnaðarmálin,« segir Steingrímur J. Sigfússon sjávarútvegsráðherra um fundi með forystumönnum ESB í Brussel í gær.

»Það var ágætt að hitta þetta fólk. Ég var búinn að hitta Füle áður [...] og það var mikilvægt að hitta Damanaki og komast í milliliðalaust samband við hana,« segir hann um fyrsta fund sinn með Damanaki."

Steingrímur segir áhuga vera hjá ESB um að koma viðræðunum vel í gang og í frétt MBL segir ennfremur:

"Ég held að það sé áhugi á að koma þeim betur í gang, að komast í hinar eiginlegu viðræður. Ég lagði auðvitað áherslu á það af okkar hálfu að við vildum sem fyrst fara að geta látið reyna á þetta í alvöruviðræðum og vonandi tekst það. Það átta sig allir á því að þarna erum við með stóru hlutina undir, eða suma af þeim stærstu. Síðan er ekki hægt að neita því að það var svolítið rætt um makríl líka."

Í lokin segir svo í fréttinni:

"Ætli megi ekki að segja að þegar rætt er um þessi mál viðurkenna allir að Ísland hafi mikla sérstöðu og að það mun aldrei nást nein niðurstaða öðruvísi en að sú sérstaða sé viðurkennd. En í hve ríkum mæli og hvernig það yrði gert er auðvitað stóra efið. Þannig að það er ekki hægt að segja að þetta sé óvinsamlegt í þeim skilningi [...] Það liggur fyrir og er viðurkennt, t.d. í rýniskýrslunum, að ESB viðurkennir og áttar sig á sérstöðu Íslands. Hvað það þýðir þegar kemur til stykkisins í hinum eiginlegu samningum verður að koma í ljós,« segir hann."

Steingrímur er, eins og fram hefur komið, nýr sjávarútvegs og landbúnaðarráðherra, og hefur því forræði yfir þessum mikilvægu málaflokkum, sem efnhags og viðskiptaráðherra (opinber titill!) 

En það verður spennandi að sjá niðurstöðuna úr köflunum um sjávarútvegs og landbúnaðarmál, það er alveg á hreinu!

(Leturbreyting: ES-bloggið)

Kostuleg ummæli innanríkisráðherra á Alþingi

Ritari veit í raun ekki hvar hann á að byrja, en þetta sagði Ögmundur Jónasson á Alþingi í morgun, þegar svokallaðir IPA-styrkir voru ræddir: "

"Hæstv. forseti. Fyrst vil ég taka fram að við höfum staðið gegn þessum styrkjum sem við teljum óeðlilega og þar vísa ég til innanríkisráðuneytisins sérstaklega en ég tala fyrir hönd þess til þess umhverfis sem ég þekki helst.

Það er alveg rétt að það þarf að gæta jafnræðis í þessum kynningarmálum og reyndar er það fólgið í því að jafnræði ríki milli aðila innan lands en ekki að það komi utanaðkomandi aðili og heimti jafnræði á borð við okkur gagnvart þeim sem taka þátt í þessari umræðu hér.

Það sem ég hef mestar áhyggjur af er að stofnanakerfið ánetjist þessari umræðu, því að nú er talað um eldvatnið. Hvernig stendur á því að alltaf þegar bornir eru upp samningar innan Evrópusambandsins, það er mjög algeng regla, er stofnanaveldið, hvort sem það er verkalýðshreyfing, atvinnurekendasamtök eða stjórnsýslan, hlynnt (Forseti hringir.) en almenningur á móti? Það er vegna þess að það er búið að fara með flugvélafarma viku eftir viku, mánuð eftir mánuð (Forseti hringir.) út til Brussel þar sem menn halda við (Forseti hringir.) á kostnað ríkisins. Þetta fólk ánetjast (Forseti hringir.) Evrópusambandinu og vill ólmt halda áfram og fá að fara í fleiri ferðir, (Forseti hringir.) fleiri hótelferðir, meiri dagpeninga. Það er þetta sem er að gerast, það er þess vegna sem stofnanaveldið (Forseti hringir.) ánetjast Evrópusambandinu."

Okkur er spurn: Hvað gengur Ögmundi til? Getur hann fært rök fyrir máli sínu til stuðnings? Og erum við þá ekki háð NATO eða Sameinuðu þjóðunum líka? Og Norðurlandaráði? Vill innanríkisráðherra kannski að við drögum okkur alla leið inn í skelina og lokum á umheiminn?

Eða er hann búinn að skipa sér í þann flokk manna sem vill draga umsóknina til baka og ekki leyfa þjóðinni að kjósa um aðildarsamning þegar hann liggur fyrir? Að almenningur á Íslandi fái að taka upplýsta ákvörðun um innihald hans.

Hér á landi eru nefnilega sterkir kraftar sem vilja halda öllu óbreyttu, halda sveiflukrónunni, halda hávaxtastefnunni á lífi, sem og verðtryggingu! Aðilar sem vilja ekki samkeppni og möguleika á lægra vöruverði. Þetta eru aðilar sem hafa það gott í skjóli óbreytts ástands!

Ummæli Ögmundar hafa vakið hörð viðbrögð þeirra aðila sem hann sjálfur einu sinni var í forsvari fyrir, BSRB. Samtökin segja málflutninginn einfaldlega ómaklegan og skyldi engan undra!

Í tilkynningu segir:

"„Núverandi ríkisstjórn sóttist eftir aðild að ESB en ekki opinberir starfsmenn sem eru væntanlega aðeins að vinna vinnuna sína eins vel og þeir geta. Sú vinna felst m.a. í því að framfylgja stefnu ríkisstjórnarinnar og undir það falla vissulega fundir erlendis vegna umsóknar um aðild að ESB. Málflutningur Ögmundar er því algerlega óásættanlegur, sérstaklega komandi frá manni í hans stöðu," segir Helga Jónsdóttir jafnframt."

Að saka fólk um dagpeningafíkn, þegar það er aðeins að vinna vinnuna sína og fara eftir lýðræðislegum ákvörðunum, verður að teljast með ólíkindum. Getur ráðherra bara komist upp með þetta?

Meira um IPA-styrki

Myndir frá opnun Evrópustofu

Hér má sjá myndir frá opnun Evrópustofu um síðustu helgi og greinlegt að þar "stigu menn á stokk," bæði þeir sem eru með og á móti! Nýr fjármálaráðherra, Oddný Harðardóttir var á svæðinu!

 

Marinó G. Njálsson: Verðtryggð króna eins og erlendur gjaldmiðill - verður sennilega óstöðug næstu misseri

Verðtryggingin var rædd á fjölmennum fundi í Háskólabíói í gærkvöldi, en fyrr um daginn var hún rædd á Rás 2, í síðdegisútvarpinu.

Þar sagði Marinnó G. Njálsson frá Hagsmunasamtökum heimilana þetta: "Verðtryggð króna er eins og erlendur gjaldmiðill, en við erum ekki með tekjur í erlendum gjaldmiðli," og átti þar að sjálfsögði við almennt launafólk í landinu.

Þá sagði Marinó að "ekkert benti til þess að krónan verði í jafnvægi næstu misserin" og það myndi velta á viðskiptajöfnuðinum, þ.e. að ef hann færi að verða mjög neikvæður, væri næsta einsýnt að ójafnvægi myndi einkenna krónuna.

FRBL: Noregur og EES

Ólafur Þ. Stephensen skrifaði ágætan leiðara í FRBL þann 22.1. um Noreg og EES-skýrsluna, sem er nýútkomin þar. Leiðarinn hefst svona:

"Í síðustu viku kom út viðamikil skýrsla á vegum norskra stjórnvalda, þar sem samningum Noregs við Evrópusambandið er lýst. Sú skýrsla er um leið að verulegu leyti lýsing á sambandi Íslands við ESB, því að marga samninga við ESB eiga Ísland og Noregur sameiginlega.

Þar er samningurinn um Evrópska efnahagssvæðið klárlega viðamestur. Norska nefndin sem skoðaði málið kemst að þeirri niðurstöðu að EES og aðrir samningar Noregs við ESB hafi falið í sér umfangsmikla „Evrópuvæðingu" Noregs, á miklu fleiri sviðum en flesta gruni og meðal annars hafi það komið nefndinni, sem þó var skipuð færustu sérfræðingum, á óvart hversu aðlagað norskt samfélag og löggjöf sé orðið því sem gerist í ESB. Það helgist þó ekki sízt af þörfinni á því að finna sameiginlegar lausnir á vandamálum og viðfangsefnum sem ekki virða landamæri og það útheimti skuldbindandi alþjóðlegt samstarf. Grundvöllur samstarfsins sé að Noregur deili bæði gildum og hagsmunum með ESB-ríkjunum 27. Óhætt er að fullyrða að það sama eigi við um Ísland."

Stjórna þeir stóru öllu?

Á vef Alþjóðamálastofnunar stendur:

"Simon J. Bulmer, prófessor við Sheffield háskóla og einn fremsti Evrópusérfræðingurinn, heldur erindi föstudaginn 27. janúar í Lögberg 101, frá kl. 12 til 13. Bulmer fjallar um stöðu Þýskalands sem stórveldis innan Evrópusambandsins og þær breytingar sem orðið hafa á hlutverki þess í Evrópusamstarfinu. Eftir hann liggja fjölmargar bækur og greinar í fræðunum eins og t.d. The Europeanisation of Whitehall: UK central government and the European Union og Rethinking Germany and Europe: Democracy and Diplomacy in a Semi-Sovereign State. Bulmer er með doktorsgráðu frá London School of Economics. Fundurinn fer fram á ensku.

Allir velkomnir."

Króatar samþykktu ESB-aðild með miklum meirihluta - 66% sögðu já 33 nei

Talið er að Króatar hafi samþykkt aðild að ESB með yfirgnæfandi meirihluta, 66% gegn 33, í þjóðaratkvæðagreiðslu sem fram fór í dag. Þetta segir meðal annars USA Today á vef sínum. Tvöfalt fleiri eru því fylgan

Landið verður því nær örugglega 28.aðildarríki ESB og annað ríkja fyrrum Júgósalvíu sem gengur í sambandið, en Slóvenía fékk aðild árið 2004. Hér er krækja um málið, þar sem kemur m.a. fram að þátttaka var 43.5%.

Krónan veldur gríðarlegum kostnaðarauka fyrir heimili og fyrirtæki

Krónan og staða hennar var rædd í Silfri Egils í dag og það voru þeir Gylfi Arnbjörnsson og Ólafur Darri Andrason, sem ræddu við Egil Helgason. Þar sýndu Gylfi og Ólafur meðal annars fram á gríðarlegan kostnað sem krónan ber með sér fyrir heimili og fyrirtæki.

Horfið hér.

Meira um opnun Evrópustofu

Á Stöð tvö er að finna frétt um opnun Evrópustofu og einnig hefur heimasíða hennar verið opnuð. Þangað eru allir velkomnir til að leita sér upplýsinga um ESB.

Umræður um gjaldmiðilsmál á vegum Samfylkingar

Á vef Samfylkingarinnar stendur:

"Alþingsmennirnir Helgi Hjörvar og Tryggvi Þór Herbertsson ræddu krónuna og framtíðina á fyrsta hádegisfundi Evrópuvaktar Samfylkingarinnar á nýju ári sem haldinn var á Sólon þriðjudaginn 17. janúar. Stöðugleiki Evrunnar og sveigjanleiki krónunnar var þeim ofarlega í huga.

Tryggvi Þór tók fyrstur til máls og sagði að Evran og umgjörð hennar væri misheppnuð. Maastrichtskilyrðin hefðu reyndar verið velheppnuð en þeim hefði þurft að fylgja refsiákvæði. Hann sagði mikil mistök hafa verið gerð með því að þróa ekki frekar fjárhagslegt samstarf Evrópuríkja og var ekki bjartsýnn um að slíkt samstarf náist nú – þótt nauðsynlegt væri. Í öðru lagi fylgi Evrunni stöðugleiki á kostnað sveigjanleika. Ef gengið yrði fest þá þyrfti að leiðrétta gengið með launalækkun. Mun sársaukafyllra yrði að fara í gegnum vinnumarkaðinn. Í þriðja og síðasta lagi sagði Tryggvi Þór að honum hugnaðist ekki að gefa hagstjórnina eftir til erlends valds en það fylgdi óhjákvæmilega upptöku Evrunnar hér á landi. Hann sagði að lokum að nýr gjaldmiðill væri enginn patentlausn – hagstjórnin skipti máli, vextir væru t.d. alltof háir hér á landi vegna lélegrar hagstjórnar síðustu 50 árin eða svo.

Helgi hóf framsögu sína með því að svara yfirskrift fundarins – Er krónan framtíðin? – með einföldu nei-i. Í alþjóðlegu samhengi vigtaði t.d. sérstakur lögeyrir fyrir 300.000 manna þjóð ekki mjög þungt eins og gefur að skilja. En mestu skipti að með krónuna áfram sem gjaldmiðil væri ekki hægt að ná þeim stöðugleika í efnahagsmálum fyrir heimilin og atvinnuvegina sem kallað er eftir af þjóð sem er búin að fá nóg af því að greiða fyrir sveiflur síðustu ára og áratuga. Þá væri krónan ekki bara skjól á erfiðum tímum – eins og nú með tilheyrandi gjaldeyrishöftum – heldur er hún múr þegar kemur að viðskiptum við önnur lönd. Krónan sé viðskiptahindrun sem kemur t.d. í veg fyrir að erlend fyrirtæki opni útibú hér á landi og verði þar með til þess að hér komist á raunveruleg samkeppni með lækkandi verði neytendum til góða. Þá hafi dæmin sýnt að Evrusamstarfi fylgi aukin erlend fjárfesting í þeim ríkjum sem inn í það gangi. Ísland framtíðarinnar þurfi á aukinni erlendri fjárfestingu að halda og upptaka Evru tryggi það – það sýna dæmin. Helgi sagði að þegar að valið standi á milli stöðugleika Evrunnar eða sveigjanleika krónunnar þá muni sýna sig að Íslendingar komi til með að velja stöðugleika Evrunnar."

Á krækjunni hér að ofan má m.a. sjá upptökur af ræðum Tryggva og Helga.