Leita í fréttum mbl.is

Bloggfærslur mánaðarins, janúar 2012

Evrópustofa opnar á morgun

EvrópustofaEvrópustofa opnar á morgun hér á Íslandi. Markmið hennar er að upplýsa almenning og fleiri áhugasama um Evrópusambandið. Allir eru velkomnir, burtséð frá afstöðu til sambandsins.

Forstöðumaður er Birna Þórarinsdóttir, stjórnmálafræðingur. Opið hús er á morgun frá 11-16 og allir velkomnir að Suðurgötu 10.


BBL og kókið!

Haraldur BenedikssonHaraldur Benediktsson, formaður Bændasamtaka Íslands, skrifar þetta í leiðara nýjasta Bændablaðsins (er hann blaðamaður líka?):

"Ein af uppáhalds falsrökum aðildarsinna að Evrópusambandinu er að matarverð muni lækka á Íslandi við aðild. Skeyta þeir engu um staðreyndir í þeim efnum. Nú ber svo við að fyrirtæki eitt hefur flutt til landsins erlent kók. Kókið er keypt á Spáni og ástæðan sú að ekki samdist um verð við innlendan framleiðanda. Í fréttum af málinu hefur það verið fullyrt að innkaupin frá Spáni séu hagkvæmari en að skipta við íslenska kókframleiðandann. En er þeim verðmun skilað til neytenda? Nei, spænska kókið er selt á sama verði og það íslenska. Fyrirtækið nýtir tækifærið einfaldlega til að ná meiri framleiðni úr vörunni. Er það ekki alveg skiljanlegt og varla hægt að gagnrýna? Fyrirtækið nýtir einfaldlega kaupmátt neytenda og greiðsluvilja. Sem er eðlilegt er það ekki? Hitt er athyglisvert að Neytendasamtökin eða Samtök verslunar og þjónustu, sem sérstakir gæsluaðilar neytenda, láta ekkert í sér heyra. Er það ekki undarlegt? Kannski ekki, því auðvitað er það verðþol markaðarins sem ræður verðlagningunni. Það mun örugglega reynast sama niðurstaða með innflutta matinn eftir inngöngu í ESB."

Þetta er nokkuð dæmigert fyrir einfeldnina í málflutningi Nei-sinna og dæmið náttúrlega algerlega ómarktækt. 

Ein tegund af gosdrykk, samkeppni hverfandi og alls ekki svokölluð nauðsynjavara á ferðinni. Haraldur yfirfærir þetta svo yfir á HEILAN MATVÖRUMARKAÐ, þar sem fjöldi vörutegunda skiptir þúsundum og söluaðilar eru einnig fjöldamargir. 

Er þetta virkileg það besta sem Bændasamtökin geta gert?


Tvöfalt meiri verðbólga hér en í ESB

Greiningardeild Arion-banka spáir töluverðum verðhækkunum á næstunni, sem deildin telur að muni auka verðbólgu hér á landi í um 6,2%

Til samannburðar má nefna það að meðalverðbólga í ESB er um 2,7%.

Það er því um tvöfalt meiri verðbólga hér en í ESB!

Og krónan fellur, sem veldur verðbólgu!

Frábært, fyrir heimilin og fyrirtækin! (Djók!!!)

Hvenær endar þetta?


Nei-sinnar splæsa í könnun!

Nei-sinnar hafa splæst í nýja könnun sem sýnir að rúmlega helmingur landsmanna (53.5%) er andvígur aðild og rúmlega þriðjungur er fylgjandi aðild,eða 31,5% Um 15% aðspurðra taka ekki afstöðu, sem er nokkuð hátt hlutfall.

En hin raunverulega "skoðanakönnun" verður þegar aðildarsamningur og innihald hans verðu borið undir þjóðina í atkvæðagreiðslu.

Það á margt eftir að gerast, meðal annars á eftir að semja um mikilvægustu kafla málsins!

Við spyrjum að leikslokum.


Össur um niðurlægingu og "lagagleypingar"

Á Eyjunni stendur: "Ein af allra sterkustu rökunum fyrir inngöngu Íslands í Evrópusambandið að mati Össurar Skarphéðinssonar, utanríkisráðherra, er sú staðreynd að íslenskir þingmenn verða í viku hverri að taka möglunarlaust við ýmsum tilskipunum, reglum og ákvörðunum frá Evrópusambandinu

Í viðtali við RÚV segir Össur þetta hreint og beint niðurlægjandi fyrir þingmenn hérlendis. Þeir hafi engar leiðir eða tök á að hafa áhrif á þann aragrúa skipana sem frá Brussel berist.

Komið hefur í ljós að skýrsla sérfræðinga sem unnin var fyrir Norðmenn og kynnt í dag sýnir að EES-samningurinn hafi á átján ára tímabili reynst Norðmönnum mjög ábatasamur. Hins vegar feli sá samningur í sér meira framsal á fullveldi en raunveruleg innganga í sambandið.

Össur bendir á að litlu hafi munað að EES samningurinn á sínum tíma hafi ekki staðist stjórnarskrá Íslands og síðan þá hafi þróunin verið hröð."


Sema Erla um matvælaverð á DV.is

Sema Erla SerdarSema Erla Serdar, er nýr bloggari á DV.is og skrifar þar pistla um Evrópumál. Í nýjasta pistlinum segir hún: "Það er vitað að með aðild Íslands að Evrópusambandinu munu tollar á vörur og landbúnaðarvörur frá aðildarríkjum ESB falla niður. En hvað þýðir það fyrir okkur neytendur?

Jú, að matvælaverð muni lækka svo um munar.

Undir lok síðasta árs unnu hagfræðingarnir Daði Már Kristófersson, dósent við Háskóla Íslands, og Erna Bjarnadóttir, hjá Bændasamtökunum, skýrslu fyrir samningahóp Íslands um landbúnað. Í þessari skýrslu kemur fram svart á hvítu með afnámi þessara tolla má reikna með að verð á kjúklingum, eggjum og svínakjöti lækki um allt að 40 - 50%. Ekki nóg með það heldur munum mjólkurvörur lækka um allt að 25%. Einnig má reikna með að verð á nautakjöti muni lækka."


Guðmundur Gunnarsson skrifar meira um gjaldmiðilsmál

Guðmundur GunnarssonGuðmundur Gunnarsson, skrifaði fyrir skömmu nýjan pistil um gjalmiðilsmál og segir þar meðal annars:

"Á ráðstefnu ASÍ um gjaldmiðilinn í vikunni sýndu Ragnar Árnason prófessor við HÍ, Arnór Sighvatssonar aðstoðarseðlabankastjóri og Friðrik Már Baldursson prófessor við HR fram á að slök efnahagsstjórn undanfarna áratugi hafi skapað þann vanda sem við erum í með gjaldmiðilinn. Stjórnendur peningamála hafi gert alvarleg mistök í aðdraganda þess að gjaldmiðillinn ofreis og hrundi með falli bankanna í kjölfarið og gjaldþrots Seðlabankans.

Þeir sem stjórnuðu hér á landi á meðan þetta gerðist halda því fram að þeir hafi gert allt rétt og stöðugleikinn snúist bara um að hafa góða stjórnun á krónunni!!??

ESB andstæðingar verja krónuna á hverju sem gengur. Gott sé að hafa sveigjanlegan gjaldmiðil svo leiðrétta megi slaka efnahagsstjórn með því að færa peninga frá launafólki til útflutningsfyrirtækja. Það væri skerðing á fullveldi sérhagsmuna ef krónan væri lögð niður sagði Ragnar Árnason.

Í könnunum hagfræðinga kemur fram að jafnaði hafi um 30% tekna heimilanna undanfarna áratugi hafi horfið við þessar leiðréttingamillifærslur. Eignaupptaka hjá launamönnum er réttlætt með því að verið sé að halda uppi atvinnustigi í atvinnubótavinnu þar sem afraksturinn rennur milliliðalaust frá heimilunum til fárra efnamanna."


Noregur: Ekki til umræðu að segja upp EES-samningnum

NoregurÍ annarri frétt á RÚV segir: "Jónas Gahr Störe, utanríkisráðherra Noregs, segir að ekki komi til greina að segja upp samningunum um Evrópska efnahagssvæðið og leita eftir tvíhliða samningi við Evrópusambandið í staðinn.

Störe tók í hádeginu á móti nýrri skýrslu þar sem fram kemur hörð gagnrýni á EES-samninginn. Samstarfinu á Evrópska efnahagssvæðinu er lýst sem ábatasömu en ólýðræðislegu.

Það var norska ríkisstjórnin sem bað helstu sérfræðinga landsins um að skoða kosti og galla samningsins um EES. Íslendingar eiga aðild að honum ásamt Lichtenstein. Niðurstaða skýrslunnar er þegar kunn: Samningurinn hefur á 18 ára tímabili reynst Norðmönnum afar ábatasamur en felur í sér meira framsal á fullveldi en innganga í sjálft Evrópusambandið.

Störe segir í viðtali við viðskiptablaðið Dagens Næringsliv í morgun, að þrátt fyrir galla komi ekki til greina að segja samningnum upp og leita eftir tvíhliða viðskiptasamningi við Evrópusambandið eins og gagnrýnendur EES vilja. Andstæðinga er meðal annars að finna innan ríkisstjórnarinnar. Störe segir að draumar um tvíhliða samning séu blekkingin ein. Hins vegar sé lýðræðishallinn á núverandi samningi vissulega umhugsunarefni."

Sjá einnig umfjöllun á vef Já-Íslands


ESB fer gegn Ungverjalandi

ESBÁ RÚV segir: "Framkvæmdastjórn Evrópusambandsins steig í dag fyrsta skrefið í áttina að því að hefja mál á hendur Ungverjalandi vegna nýrra stjórnskipunarlaga sem talið er að gangi í berhögg við sáttmála sambandsins.

Jose Manuel Barroso, framkvæmdastjóri ESB greindi frá þessu á fundi framkvæmdastjórnarinnar í Strassborg. Hann sagði að sambandið gæti ekki lengur unað við það að í gildi væru stjórnskipunarlög í Ungverjalandi sem brytu gegn grundvallaratriðum lýðræðisins. Margir Ungverjar eru sama sinnis. Þeir saka stjórn Viktor Urban forsætisráðherra og stjórn hans um að hafa fellt úr gildi ýmsar hömlur sem settar voru á stjórnvöld þegar kommúnistar misstu völdin árið 1989."


Samningur tryggir efnislega umræðu!

Kristján VigfússonKristján Vigfússon, aðjúnkt við HR, skrifaði grein í FRBL fyrir síðustu helgi um Evrópumálin og segir þar meðal annars: "Samningaviðræðurnar ganga út á að opna og ræða efnislega hvern kafla eða málaflokka sem sáttmálar Evrópusambandsins taka til. Nú fyrir áramót var búið að opna 11 af þessum 33 köflum og loka 8. Eftir eru 22 mismikilvægir kaflar. Gefið hefur verið út af utanríkisráðherra að fyrir mitt ár 2012 verði búið að opna alla kafla samningaviðræðnanna. Þar skipta mestu máli kaflarnir um landbúnað, gjaldmiðilsmál, byggðastefnu, orkumál og sjávarútveg en þeir hafa ekki enn verið opnaðir. Það eru í raun þeir kaflar sem virkilega þarf að semja um og líklegt er að samningsaðilar hafi þegar mótað sér samningsafstöðu í þessum málaflokkum og séu með ákveðin þolmörk í huga um hversu mikið megi gefa eftir svo um ásættanlega samninga sé að ræða.

Smærri umsóknarríki hafa verið um tvö ár að semja
Ef skoðaður er sá tími sem hefur farið í samningaviðræður einstakra smærri umsóknarríkja sem við höfum helst viljað bera okkur saman við þá kemur í ljós að ekki hefur tekið nema að meðaltali um 2 ár að ljúka aðildarviðræðum frá upphafi til enda. Það tók Íra eitt og hálft ár að ljúka viðræðum. Svía, Finna og Austurríkismenn rúmt ár. Litháa, Letta, Slóvaka og Maltverja tæp tvö ár. Eista, Slóvena og Kýpverja tók það tæp þrjú ár að semja en þar á bæ spiluðu inn í flókin deilumál m.a. um stöðu minnihlutahópa innan ríkjanna við ríki Evrópusambandsins."

Síðar segir Kristján:

"Loks hægt að rökræða efnisatriði
Nægur fjöldi sérfræðinga er hjá báðum aðilum í samninganefndunum til að vinna hratt og vel og ljúka viðræðum á næstu 12 til 15 mánuðum. Það eina sem kemur í veg fyrir að þessum samningaviðræðum ljúki fyrir kosningarnar 2013 eru þá heimatilbúin vandamál þar sem einstakir ráðherrar eða annar hvor ríkisstjórnarflokkurinn hefur hagsmuni af því að tefja málið.
Samningsaðilar hafa því tæplega eitt og hálft ár til að ljúka samningum fyrir kosningar ef pólitískur vilji er fyrir hendi en auðfundið er að færa rök fyrir því að það sé mikilvægt fyrir kjósendur í þessu landi að samningum verði lokið fyrir næstu alþingiskosningar og efnisatriði aðildarsamnings verði til umræðu í kosningabaráttunni. Það muni þá loksins verða hægt að takast á um Evrópumálin efnislega en ekki eins og fram til þessa fyrst og fremst á tilfinningaþrungnum þjóðernisnótum."


« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband