Andrés Pétursson (form. Evrópusamtakanna) um völd, áhrif og Morgunblaðið

Formaður Evrópusamtakanna, Andrés Pétursson, ritar grein í Morgunblaðið í dag um Morgunblaðið og nálgun ritstjóra þess gagnvart ESB-málinu. Við birtum grein Andrésar hér í heild sinni: 

 UM VÖLD OG ÁHRIF

Höfundi leiðara Morgunblaðsins hefur orðið tíðrætt um lýðræðishalla Evrópusambandsins. Orð eins og „skrifræðið í Brussel“ og hið „ólýðræðislega bákn“ eru höfundinum einkar hjartfólgin. 

Staðreyndin er hins vegar sú að Evrópusambandið er metnaðarfyllsta tilraun sem reynd hefur verið til að finna lausn á ýmsum sameiginlegum vandamálum sem ekki verða leyst eingöngu innan landamæra núverandi þjóðríkja. Þar má til dæmis nefna mengun, alþjóðleg glæpastarfsemi og ýmis mál sem tengjast yfirþjóðlegum samgöngum og viðskiptum

En hver er aðalástæðan fyrir því að ekki er meira um beinar kosningar til hinna ýmsu stofnana eða embætta innan Evrópusambandsins til að auka lýðræðið innan sambandsins. Ástæðan er einföld; aðildarlönd Evrópusambandsins hafa ekki verið tilbúin að láta meiri völd til stofnana Evrópusambandsins.

Ég velti því stundum fyrir mér hvort sá sem heldur á pennanum í leiðaraskrifum Morgunblaðsins þekki ekki raunverulegt verklag hinna ýmsu stofnana ESB eða hvort viðkomandi sé svo sannfærður um hið illa innræti Evrópusambandsins að það skuli nota hvert tækifæri til að sverta ímynd þess.

Morgunblaðið taldi sig til dæmis hafa himin höndum tekið þegar Frosti Sigurjónsson framkvæmdastjóri skrifaði grein á bloggsíðu sína fyrir skömmu. Þar heldur Frosti því fram að þungamiðja valds í Evrópusambandinu sé hjá framkvæmdastjórninni og Evrópuþingið sé valdalítið.

Gallinn við þessa framsetningu Frosta er sú að þær forsendur sem hann gefur sér, annaðhvort vegna þekkingarskorts eða vísvitandi rangfærslna, standast ekki. Staðreyndin er sú að valdamiðja Evrópusambandsins er hjá ráðherraráðinu og leiðtogaráðinu þar sem sitja lýðræðislega kjörnir fulltrúar aðildarríkjanna. Evrópuþingið, sem einnig er kosið í beinni kosningu af íbúum ESB landa, hefur síðan smám saman verið að auka völd sín á kostnað Framkvæmdastjórnarinnar.

Lagasetningarferli Evrópusambandsins er nokkuð langt og það getur tekið upp í mörg ár að koma lagasetningu í gegnum Framkvæmdastjórnina, Evrópuþingið og ráðherraráðið. Mjög margir aðilar, bæði Evrópuþingmenn, starfsmenn Framkvæmdastjórnarinnar, hagsmunaaðilar, grasrótarsamtök, þrýstihópar og fleiri, hafa möguleika á því að hafa áhrif á lagagerðina.

Ýmsum finnst ferlið óþarflega langt og flókið en það gefur að minnsta kosti mjög mörgum aðilum tækifæri til að hafa áhrif á endanlega niðurstöðu. Einnig minnkar þetta möguleikana á því að illa unnin lagagerð komist í gegnum þetta ferli.

Morgunblaðið ætti því að fagna en ekki gera lítið úr þeirri kynningu sem í vændum er varðandi Evrópusambandið. Flestir þeir sem talað er við kvarta undan því að þekkja ekki nægjanlega vel til varðandi störf og stefnu ESB.

Allir ættu því að geta sameinast um það að fagna meiri upplýsingum um þetta mikilvæga málefni. Eða óttast Morgunblaðið að Íslendingar geti ekki tekið skynsamlega ákvörðun um tengsl sín við sambandið í ljósi upplýstrar umræðu?

Guðmundur Gunnarsson um "timburmenn krónunnar"

Á bloggi sínu segir Guðmundur Gunnarsson: " Krónan er ein helsta ástæða þeirra erfiðleika sem við eigum við að etja. Stjórnmálamenn hafa ítrekað á undaförnum áratugum leyst rekstrarvanda útflutningsfyrirtækja með gengisfellingum. Þetta hefur verið rómað af mörgum, en fáir bent á þá staðreynd vandinn hverfur ekki, hann er einfaldlega fluttur yfir á launamenn með því að lækka laun þeirra, þeim er gert að greiða upp afglöp eigenda fyrirtækjanna. Þetta hefur leitt til þess að a.m.k. sum fyrirtæki hafa ekki verið rekin með eðlilegum hætti þar sem forsvarsmenn þeirra hafa ætíð treyst á þessa lausn.

Í lokuðu hagkerfi gekk þetta upp og þegar fiskvinnsla og landbúnaður voru aðalatvinnuvegir þjóðarinnar. Krónan var ein af meginástæðum fyrir aðdraganda hrunsins og hrun hennar hefur sett mörg heimili og fyrirtæki í vonlausa skuldastöðu. Auk þess blasir við sú staðreynd að við verðum að fjölga störfum hér á landi og það verður ekki gert í útgerð eða landbúnaði. Það verður einvörðungu gert með fyrirtækjum í tækniiðnaði og þar þarf að koma til erlend fjárfesting og greiður aðgangur íslenskra fyrirtækja að erlendum birgjum og eðlilegum viðskiptum um heim allan. Það verður ekki gert með krónunni. Ekkert erlent fyrirtæki tekur við krónu sem greiðslu og í dag eru íslensk fyrirtæki krafinn af erlendum birgjum um staðgreiðslu í erlendum myntum."

Allur pistill Guðmundar 

Árni Páll Árnason í FRBL: Framfarastoð eða skálkaskjól?

Í langri grein í Fréttablaðinu í dag skrifar Árni Páll Árnason, efnahags og viðskiptaráðherra um gjalmiðilsmál og segir m.a.:

" Þótt sveigjanleiki sjálfstæðs gjaldmiðils hafi verið mikilvægur við lausn á efnahagsvanda í fortíðinni, er hann ein helsta ástæða þeirra erfiðleika sem þjóðin hefur nú ratað í. Jákvæð áhrif gengislækkunar krónunnar er reglulega ofmetin í almennri umræðu hér á landi og helgisagan um mikilvægi krónunnar fyrir sveigjanleika í efnahagslífinu hefur fengið á sig einhvers konar frumspekilega áru. Allir sannir Íslendingar eiga að taka undir með hinum háværa margradda kór um ágæti sveigjanleika krónunnar. Staðreyndirnar tala hins vegar sínu máli. Gengisfellingar gátu vissulega leyst tiltekin vandamál á fyrri tíð: Þær rýrðu kjör almennings og lækkuðu skuldir útflutningsgreina í lokuðu hagkerfi. Krónan var hins vegar lykilástæða fyrir vanda okkar í aðdraganda hrunsins og gengislækkun hennar í hruninu hefur búið til alvarlegasta efnahagsvanda þjóðarinnar, nú um stundir: Skuldavandann. Úrlausn á ofskuldsetningu atvinnulífs og heimila er stærsta vandamálið og stafar af því að þorri skulda er annað tveggja tengdur verðbólgu eða gengi. Þessar staðreyndir benda til að gjaldmiðillinn sé fremur hluti af vandanum en forsenda lausnarinnar. Þar við bætist sú staðreynd að traust á íslensku efnahagslífi og gjaldmiðlinum er nú í algeru lágmarki. Engar líkur eru á að fjárfestar vilji efna til áhættu í íslenskum krónum í fyrirsjáanlegri framtíð og engir munu ótilneyddir vilja lána í íslenskum krónum. Við vitum hvernig hörmunarsaga krónunnar hefur verið hingað til. Er eitthvað sem bendir til að eftirhrunskrónan verði betri og veikleikarnir minni?"

Öll grein Árna 

 

 

Nýr "miðju-hægri"-flokkur,í burðarliðnum - áhersla á Evrópumálin

Í fréttum er greint frá stofnun nýs stjórnmálaflokks á hægri vængnum, sem er að sögn hófsamur hægri-flokkur sem er m.a. með áherslu á að klára aðildarviðræðurnar við ESB. Í DV segir: " Guðbjörn Guðbjörnsson er einn þeirra sem nú vinnur að stofnun nýs hægri flokks á Íslandi. Er um að ræða hægrisinnaðan miðjuflokk sem vill að Ísland gangi í Evrópusambandið. Staðfesti Guðbjörn við vefritið Eyjuna að hann ynni að stofnun nýs flokks ásamt tugi annarra einstaklinga.

Guðbjörn sagði sig úr Sjálfstæðisflokknum í haust eftir að samþykkt var á landsfundi að Sjálfstæðisflokkurinn vildi draga til baka ESB umsókn Íslands. Hann hafði um árabil gegnt ýmsum störfum fyrir Sjálfstæðisflokkinn í Reykjanesbæ og Suðurkjördæmi."

Eyjan er einnig með frétt um þetta mál.

Stefán Haukur snýr sér alfarið að ESB-málinu

FRBL greinir frá: "Utanríkisráðherra hefur tekið ákvörðun um breytingar á starfsstöðvum sendiherra í utanríkisþjónustunni. Stefán Haukur Jóhannesson, sem hefur verið sendiherra í Brussel frá árinu 2005, flyst heim til starfa í ráðuneytinu 15. janúar næstkomandi og heldur áfram að gegna starfi aðalsamningamanns Íslands í aðildarviðræðum við ESB."

Þetta er hið besta mál. Enginn efast um hæfni Stefáns Hauks til að vinna málið, og gæta hagsmuna Íslands. Hann er úr Vestmannaeyjum og þekkir því vel til mikilvægis sjávarútvegs. Réttur maður á réttum stað! 

Veruleg tekjuaukning hjá bændum í ESB

Eurostat birtir áhugaverðar tölur um tekjur bænda inna ESB, en samkvæmt þeim hafa tekjur þeirra sem starfa í landbúnaði aukist um rúm 12% á milli ára.

Helsta orsökin er rauntekjuaukning innan landbúnaðarins um tæp 10%, sem svo aftur á sínar helstu rætur í aukinni verðmætasköpun innan geirans.

Frá 2005 til 2010 hafa tekjur starfsmanna í landbúnaði innan ESB aukist um 10%.

Spá gerir ráð fyrir að í 21 af 27 ríkjum ESB muni tekjur starfsmanna í landbúnaði aukast á árinu, mest í Danmörku, eða tæp 55%, Eistlandi um tæp 50% og tæp 40% á Írlandi.

Tilkynning Eurostat

Hvass Guðmundur Gunnarsson!

Í nýjum pistli fjallar Guðmundur Gunnarsson um það sem hann kallar "efnahagslegar þrælabúðir krónunnar" og skrifar: " Vextir hér eru hærri vegna krónunnar. Vextir leiða til hærra verðlags. Óstöðugur gjaldmiðill leiðir til enn hærra verðlags. Það eru aðstæður og skilyrði sem ákvarða hvort fyrirtæki vaxa og dafna. 25% af launum íslendinga fara í aukakostnað vegna krónunnar. Til þess að hafa svipuð laun og annarsstaðar á norðurlöndunum þurfum við að skila 25% lengri vinnuviku.

Vextir hér á landi eru töluvert hærri en annarsstaðar og vaxtamunur verður alltaf a.m.k. 5% hærri á Íslandi en innan Evrusvæðisins, það er vegna krónunnar. Ef fjölskylda sem kaupir sér eitt hús á Íslandi og önnur kaupir sér hús t.d. í Danmörku. Þá er staðan sú eftir 20 ár að þá hefur íslenska fjölskyldan greitt sem svarar andvirðis rúmlega tveggja húsa, séu greiðslur bornar saman við endurgjald dönsku fjölskyldunnar.

Krónan heldur íslendingum í efnahagslegum þrælabúðum. Við viljum losna undan þeim viðjum sem þessi valdaklíka heldur okkur í og fá efnahagslegt frelsi takk fyrir.

Forsvarsmenn CCP, Össur, Marel og allra hátæknifyrirtækjanna hafa marglýst því yfir að þeir verði að færa sig yfir í Evrusvæðið ef fyrirtækin eigi að lifa. Þau eru þegar farinn að greiða hluta launa í Evrum. Stjórnendur þessara fyrirtækja telja að innganga Íslands inn í ESB muni leiða til þess að umhverfið sem þeir hafi starfað í síðustu ár róist og verði líkara því sem er í öðrum löndum, þar sem þau geta gengið að flestu vísu, svo vitnað sé í þeirra eigin orð.

Þótt margt hafi breyst til batnaðar í starfsumhverfi íslenskra fyrirtækja erum við enn að burðast með íslensku krónuna, hina örsmáu og óstöðugu mynt. Íslenskt atvinnulíf starfar í alþjóðlegu umhverfi og við verðum að víkja frá einangrunarstefnunni. Vandamálið var ekki síst að það var nánast ómögulegt að fá krónur að láni til þess að fara út í framkvæmdir. Eitt af helstu vandamálum Íslendinga er krónan. Hún er alltof dýr og hreinlega ónothæf þegar kemur að fjármögnun stórra framkvæmda."

Allur pistill Guðmundar

Verðbólgumarkmiði náð - skref í áttina að nothæfum gjaldmiðli

Þorláksmessu 2010 verður hægt að minnast fyrir það að um þær mundir náðist verðbólgumarkmið Seðlabanka Íslands, eftir sjö ára vinnu! Menn gera þetta að umtalsefni, því það þykir merkilegt að þetta markmið skuli nást.

En þau eru athyglisverð orðin í leiðara MBL í dag um þetta; "Verðbólga er vond ef hún fer úr böndum. En það skiptir máli af hverju hún dregst saman. Hún lækkar því miður ekki vegna ákvarðana um vexti um þessar mundir. Ákvarðanir SÍ síðasta árið hafa ekkert haft með hana að gera. Vonandi vita menn það á þeim bæ, ella gæti illa farið. Verðbólgumæling nú er einkum mæling um samdrátt á flestum sviðum, hún er táknmynd um að enginn fæst til fjárfestinga í landinu sem neinu nemur vegna fjandsamlegs umhverfis, niðurdrepandi afstöðu stjórnvaldanna í landinu, sívaxandi skattahækkana og stjórnmálalegrar upplausnar. Og þær atvinnugreinar sem fyrir eru í landinu búa við samfelldar hótanir um upplausn og skemmdarverk og skattahækkun eftir skattahækkun."

Við leikum okkur aðeins með textann: "Verðbólga er vond ef hún fer úr böndum (heyr heyr!). En það skiptir máli af hverju hún dregst saman. Hún lækkar því miður ekki vegna ákvarðana um vexti um þessar mundir. (Þetta er ekki Seðlabankanum að þakka!) Ákvarðanir SÍ síðasta árið hafa ekkert haft með hana að gera. (Seðlabankinn hefði alveg getað sleppt þessu!)  Vonandi vita menn það á þeim bæ, ella gæti illa farið. (Aðvörunarorð!) Verðbólgumæling nú er einkum mæling um samdrátt á flestum sviðum, hún er táknmynd um að enginn fæst til fjárfestinga í landinu sem neinu nemur vegna fjandsamlegs umhverfis, niðurdrepandi afstöðu stjórnvaldanna í landinu, sívaxandi skattahækkana og stjórnmálalegrar upplausnar. Og þær atvinnugreinar sem fyrir eru í landinu búa við samfelldar hótanir um upplausn og skemmdarverk og skattahækkun eftir skattahækkun. (En af hverju er þetta svona, af hverju gerðist það sem gerðist, hvaða mannanna verk urðu þess valdandi að hér varð HRUN 2008, sem landinn glímir nú við?)

Sú staðreynd að það sé loksins búið að ná verðbólgumarkmiðinu, er kannski (og vonandi) upphafspunktur. Það væri mjög æskilegt að ná því að halda verðbólgunni í skefjum, því verðbólga er eins og önnur bólga, slæm, sérstaklega sé hún í risaskömmtum eins og "hefðin" er fyrir á Íslandi. Á lýðveldistímanum hefur verðbólga verið um 20% á ársvísu. Geri aðrir betur!

Með lágri verðbólgu nálgumst við Evrópuðþjóðir í þessu tilliti. Einnig með lágum vöxtum. Þar með nálgumst við þau markmið sem gera okkur kleift að fara hugsa um það fyrir alvöru að fá hér nothæfan gjaldmiðil. 

Tekur ESB af okkur skötuna?

Í dag er messa heilags Þorláks. Forsíða Fréttablaðsins skartar skötu og í Fréttatímanum er umfjöllun um kæsingu og skötu. Ritari er alinn upp við skötuát, enda að vestan; góð skata, með soðnum kartöflum, hamsatólg, smjöri og nýju rúgbrauði er herramannsmatur og vart hægt að hugsa sér jól án skötu. 

Skötuát er hluti af arfleifð Íslendinga og þjóðleg hefð. Í umræðunni um ESB birtast allskyns goðsagnir og ein þeirra er að ESB (ef að aðild verður) muni taka frá okkur hitt og þetta; fiskinn, orkuna, fullveldið, hlutir leggist af, landbúnaðurinn rústist og hvaðeina. Ekkert af þessu á hinsvegar við rök að styðjast.

Enn hefur engum dottið í hug að "ESB taki af okkur skötuna", en það hlýtur að koma að því. Að "illir" skriffinnar í Brussel setji reglugerð sem banni skötuát!

Þetta var bara svona stutt hugleiðing um þann fáránleika sem stundum heyrist í ESB-umræðunni.

Og fyrir þá sem snæða skötu í dag: Verði ykkur að góðu! 

Ps. ESB mun EKKI taka af okkur skötuna, bara til að hafa það á hreinu! 

(Mynd: Jón Bragi Hlíðberg) 

Enn eitt fórnarlamb gleymskunnar! Nú Ásmundur Einar!

Um daginn gleymdi Vigdís Hauksdóttir því að ákveðinn tími, þrír mánuðir, verða að líða fram að þjóðaratkvæðagreiðslu. Vigdís (og fleiri) ætlaði nefnilega snarlega að stoppa umsókn Íslands að ESB og vildi greiða atkvæði um málið samhliða stjórnlagaþingskosningunni. 

Þótti þetta ekki rós í hnappagat Vigdísar eða þeirra sem fluttu þessa tillögu. Einn þeirra er foringi Nei-sinna, Ásmundur Einar Daðason.

Hann virðist vera í bullandi bissness með netverslunina www.isbu.is. Fyrirtækið flytur inn allskyns landbúnaðarvörur, en Ásmundur er jú bóndi.

Og þegar maður er líka alþingismaður á maður að gera grein fyrir öllum svona "aukabúgreinum" ef svo mætti kalla.

En því GLEYMDI Ásmundur Einar!Hann  er því líkt og Vigdís, fórnarlamb gleymskunnar!

Stöð tvö greindi frá þessu í kvöld í sambandi við "hjásetumálið" sem hrjáir nú VG.

Hér á vef alþingis má sjá að ekkert er skráð á Ásmund Einar, sem hefur nú þegar sent Alþingi tölvupóst um málið.  

Á vef Ísbú.is segir: "Vöruúrvalið er alltaf að aukast en markmiðið er að geta boðið breytt úrval af búrekstrarvörum á sambærilegum eða betri verðum heldur en gengur og gerist hér á landi. Við erum ávallt að prófa nýjar vörur og sumar af þessum vörum fara í almenna sölu. Til að geta boðið hagstæð verð leggjum við ríka áherslu á að komast í samband beint við verksmiðjur erlendis og leitum leiða til að forðast óþarfa milliliði. Í dag bjóðum við vörur frá framleiðendum í Ástralíu, Bandaríkjunum, Bretlandi, Pakistan, Kína, Bandaríkjunum, Belgíu, Frakklandi og Nýja Sjálandi."

Þetta virðist því vera svona "beint-úr-verksmiðju-beint-í-bú" fyrirtæki og hefur mjög alþjóðlegt yfirbragð. Þrjú þeirra landa sem flutt er inn frá eru í ESB. 

Nýlega byrjaði fyrirtækið að selja höggvarða Samsung-farsíma. 

Enn um makríl...

Enn um "mackerel" (makríl), en á RÚV stendur: " Framkvæmdastjóri sjávarútvegsmála hjá Evrópusambandinu hyggst beita sér fyrir lausn makríldeilu Íslands og sambandsins. Þetta segir sendiherra Íslands í Brussel sem átti fund með framkvæmdastjóranum í dag. Viðhorf hans gefi skýra vísbendingu um aukinn skilning Evrópusambandsins á sjónarmiðum Íslendinga í deilunni.

Sjávarútvegsráðuneytið hefur ákveðið einhliða að makrílkvóti næsta árs verði 147 þúsund tonn, eftir að upp úr samningaviðræðum við Evrópusambandið slitnað"

Síðar í fréttinni segir: "Stefán Haukur Jóhannesson, sendiherra í Brussel, óskaði eftir fundi með framkvæmdastjóranum í kjölfarið til að kynna sjónarmið Íslands, og fór sá fundur fram í dag. Stefán segir fundinn hafa verið afar jákvæðan og framkvæmdastjórinn ætli að beita sér fyrir lausn deilunnar. Hann segist telja að þetta gefi skýra vísbendingu um að Evrópusambandið sé fyrir sitt leyti tilbúið að skoða breyttar kringumstæður sem Íslendingar hafi mjög haldið á lofti, þ.e.a.s. að göngumynstur makríls hafi breyst verulega. Þá skipti miklu máli hversu mjög makríllinn í íslensku lögsögunni sé þyngri en sá sem hafi verið þar áður. Ekki sé hægt að horfa framhjá því í þeirri stöðu sem nú sé uppi og það verði að taka tillit til þessara sjónarmiða í framhaldi þessara viðræðna."

Öll frétt RÚV  (Mynd: www.beita.is) 

Við viljum makríl - mackril to the people!

Makríll er á manna vörum um þessar mundir, þó ekki vegna þess að menn sú að eta hann, heldur vegna makrílkvótans sem Jón Bjarnason ákvað til handa Íslendingum, sem er upp á tæp 150.000 tonn (af um 600.000 tonna heildarkvóta).

Þetta var náttúrlega upplagt tækifæri fyrir Jón Bjarnason að pirra ESB, en maðurinn er jú á móti öllu sem ESB tengist.

Það er vissulega leitt að menn geti ekki komið sér saman um makrílinn, en það er gömul saga að þar sem eru einhver verðmæti, þá reyna allir að skara eld að sinni köku. Mannlegu eðli verður ekki breytt! Og þar sem makríllinn er s.k. flökkustofn, þá verður málið snúnara.

En af hverju tók Jón Bjarnason ekki bara allan kvótann? Vera bara alvöru töffari og sýna ESB í tvo heimana, sem og Norðmönnum! Sýna hver ræður!

Af hverju þessi hógværð!? 

Viðbrögð við "makrílnum":

Eyjan MBL FRBL RÚV 

 

Viltu 30% launalækkun til frambúðar? Guðmundur Gunnarsson spyr

Á bloggi sínu segir Guðmundur Gunnarsson: "Umræðan um ESB aðild kosti hennar og galla virðast vekja upp hræðslu við breytingar, þjóðernisrembing og ofsafengin viðbrögð sérhagsmunahópa. Þeir þola ekki að bent sé á hvaða hag við hefðum að samstarfi við önnur Evrópulönd. Þeir þora ekki að láta reyna á samninga við ESB og vilja að tryggja óbreytt ástand í efnahags-og stjórnmálum þjóðarinnar.

Ein helsta orsök Hrunsins var sú að hingað flæddi ódýrt lánsfé sem átti að ávaxtast á okurvöxtum á Íslandi. Uppgjör bankana á árinu 2008 leit vel út m.a. vegna gengishagnaðar. Hefði þjóðin haft nothæfa mynt í stað krónunnar, árin fyrir hrun, hefði líklega hvorugt átt sér stað. “Lífskjarabatinn” sem rekja má til óeðlilega sterks gengis krónunnar hefði ekki orðið. Íslenskur almenningur býr við stökkbreytingar á skuldum og um 25 þús. heimili liggja í valnum. Á meðan ekkert slíkt gerðist á hinum Norðurlandanna.

Kostnaðurinn íslendinga við að hafa krónuna kemur fram í hærri vöxtum hér á landi og verðtryggingu, því enginn fjármagnseigandi, hvorki innlendur né erlendur vill lána krónur án verðtryggingar. Skoðum kostnað við 20 milljón króna íbúðarláni hér á landi annarsvegar og í öðru Evrópulandi: 

Dæmi um lán á Íslandi.
Íbúðarlán hjá Íbúðarlánasjóði 20 milljónir til 25 ára með 5% vöxtum verðtryggt.
Endurgreiðsla, vextir, verðbætur og annar kostnaður 64,2 milljónir króna.

Dæmi um lán í Evrópulandi innan ESB.
Íbúðarlán hjá evrópskum banka 20 milljónir til 25 ára með nú 3,79% til 4,24% vextir, en mjög fjölbreytileg kjör eru í boði og finna mátti hagstæðari kjör en þessi.
Endurgreiðsla, vextir og annar kostnaður kr. 32,6 milljónir króna. Engar verðbætur.

Mismunurinn er 31,6 milljónir króna eða að meðaltali 105 þúsund krónur á mánuði, hvern mánuð í 25 ár.

Mest munar þar um að verðbætur á tímabilinu eru 29,1 milljón eða 9,1 milljón króna umfram upphaflegan höfuðstól lánsins."

Öll færsla Guðmundar 

Jólakveðja frá Evrópusamtökunum!

Evrópusamtökin óska öllum gleðilegra jóla og farsæls nýs árs. Það hafa verið miklar sviptingar í Evrópuumræðunni á árinu. Fyrri hluti ársins einkenndist af miklum tilfinningum vegna Icesave og annarra mála.  

En sem betur fer hafa skynsamir menn og konur tekið þátt í umræðunni af meiri krafti á síðari hluta ársins. Það hefur því komið meira jafnvægi á umræðuna.

Gott innlegg í þennan mikilvæga málaflokk nú í lok árs er Evrópublað Vísbendingar, sem sagt hefur verið frá hér á blogginu.

Ritstjórn bloggsins vill þakka góðan lestur og viðbrögð við blogginu. Aldrei hafa fleiri lesið Evrópubloggið en á þessu ári, heimsóknir á bloggið eru um 80.000 það sem af er ári! Líflegar umræður hafa skapast, þetta blogg er lifandi, nokkuð sem ekki er hægt að segja um hliðstæðar síður Nei-samtakanna!

Það er markmið okkar að segja frá helsta sem um er að vera í  ESB-umræðunni. Því fleiri og fjölbreyttari "raddir" sem birtast, því betra!

Hvetjum við fólk til þess að kynna sér ESB, þannig er hægt að nálgast málið á skynsamlegan og rökrænan hátt, en ekki með sleggjudómum og upphrópunum!Fyrir liggur að þjóðin muni greiða atkvæði um ESB-aðild, þegar aðildarsamningur liggur fyrir.

Upplýsing er því lykilatriði í þessu máli. Það er vilji meðal Íslendinga að klára samningaferlið og að fá síðan að greiða atkvæði um málið. Það eru hinsvegar sterk öfl í samfélaginu sem hafa hagsmuni af því að svo verði ekki! Gegn þeim berjumst við!

Gleðileg jól! 

 

Löndunarbann?

DV skrifar: "Maria Damanaki, fiskveiðistjóri Evrópusambandsins, undirbýr nú löndunarbann á íslenskan fisk innan Evrópusambandsins og ætlar að beita fyrir sig ákvæði í samningum um Evrópska efnahagssvæðið til þess samkvæmt heimildum DV í Brussel.

Hugsanlega verður gefin út yfirlýsing um málið í dag. Málið tengist makrílstríðinu en Jón Bjarnason sjávarútvegsráðherra gaf út 147 þúsund tonna makrílkvóta fyrir skemmstu í trássi við vilja Evrópusambandsins, Norðmanna og annarra."

Öll fréttin  Einnig hér