Þjóð.is kominn á netið! Áhugaverð viðtöl um ESB!

Vekjum athygli á nýjum vef: www.thjod.is, þar sem ýmsir, menn, konur, frá Íslandi, sem og annarsstaðar frá tjá sig um ESB.

Vekjum sérstaka athygli á þessu "kjarnyrta" viðtali við Thomas H.Ilves, forseta Eistlands, sem bendir m.a. annars á að það eru fleiri sem vinna hjá Tallin-borg í Eistlandi, en hjá ESB í Brussel!

 

OECD: Evrusvæðið að rétta úr kútnum, en hættan ekki yfirstaðin - Trichet: Erum á réttri leið!

Financial Times birtir í dag frétt þess efnis að Evrusvæðið sé hægt og sígandi að rétta úr kútnum. Þetta samkvæmt skýrslu frá OECD, Efnhags of framfarastofnun Evrópu, sem kom út í morgun: ,,

"A modest recovery is under way, although risks remain. Financial conditions have strengthened. Activity has picked up, but the recovery is likely to be muted,” the report argued."

 

Fram kemur fréttinni að heilmargt þurfi að gera til að laga eftirköst 2008-kreppunnar, og að í ýmsum löndum sé þörf pólitískum umbótum.

Lesa má frétt FT hér og hér er að finna viðtal við Claude Trichet, yfirmanns stjórnar Seðlabanka Evrópu, þar sem hann segir að málin séu á réttri leið.

Myndband frá áhugaverðum hádegisverðarfundi um Evrópumál

Samfylkingin hefur verið með hádegisfund um Evrópumál núna í haust og hafa þeir tekist vel. Síðasti fundurinn var haldinn síðastliðinn þriðjudag. Þar ræddu Guðmundur Hálfdánarson og Tryggvi Tulinius.

Nú er hægt að horfa á erindi þeirra á fundinum, sem voru mjög áhugaverð.

Hér er krækjan

Bendum líka á þetta erindi hér, sem Aðalsteinn Leifsson hélt.

Skoðanir bænda: Allir á sömu línu og forystan?

Ritari þarf bensín á bílinn, rétt eins og aðrir Íslendingar. Við síðustu áfyllingu kippti ritari með sér Bændablaðinu, enda einlægur aðdáandi blaðsins.

Bændablaðið er t.d. eina blaðið á Íslandi sem er með ljóðadálk, þar er oft margt mjög skemmtilegt.

Mikið hefur verið rætt um afstöðu bænda gagnvart ESB, en hin "opinbera lína" er að þeir séu á móti. Lesa má margar færslur um þetta hér á þessu bloggi.

Það sem vekur hinsvegar athygli ritara er umfjöllunin um ESB-málið í Bændablaðinu sem kom út núna 2.des. Þar er heil opna um málið.

Margir bændur, rétt eins og allir aðrir Íslendingar, eru skuldugir. Það er bændum greinilega ofarlega í huga.  Ekkert óeðlilegt við það.

En það eru vangaveltur bænda um ESB-málið, sem vekja athygli ritara. T.d. segir í blaðinu að Sigurgeir Hreinsson, bóndi á Hríshóli í Eyjafarðarsveit ...,,hafi nefnt hvort varasamt væri fyrir Bændasamtökin að standa á hliðarlínunni og fylgjast með yfirstandandi samningaviðræðum."

Á öðrum fundi er sagt frá Jóhanni Nikulássyni, bónda í Stóru-Hildisey II.  Samkvæmt honum vill stærstur hluti bænda ekki fara inn en ...,,óhjákvæmilegt væri að taka þátt í umræðunni. Hann taldi að íslenskir bændur þyrftu að búa sig undir samkeppni frá útlöndum í meiri mæli."

Þetta er áhugavert. Það er kannski svo að meðal bænda eru skoðanir sem ekki eru í samræmi við skoðanir forystunnar. Sem er eðlilegt.

Punktur Jóhanns er einnig mjög áhugaverður, þ.e.s.a. bændur munu ganga í gegnum ýmsar breytingar á komandi árum, með eða án aðildar að ESB.

Kannski er lykilatriðið þetta: Hvernig verða rekstrarskilyrði bænda? Bændur eru jú í raun aðilar sem eru háðir gengismálum, vöxtum, verðbólgu og almennum skilyrðum efnahagslífsins. Vilja bændur umhverfi óstöðugleika eða stöðugleika?

Þetta skiptir bændur máli og ekki síst þá sem kaupa afurðir þeirra, íslenska neytendur!

Þeir taka af okkur 200 mílurnar!!! Nei-sinnar bulla við starfsmenn bandaríska sendiráðsins-"paranojan" í algleymingi!

Hún er nokkuð mögnuð frásögnin sem Fréttablaðið birtir í dag úr Wikileaks-skjölunum um ESB-málið. Þar ser sagt frá fundi með liðsmönnum Nei-samtakanna, Heimssýnar og starfsmönnum sendiráðs Bandaríkjanna. Kíkjum á frásögn FRBL: "Sendiráðið ræddi einnig við ónefndan talsmann Heimssýnar sem mun hafa sagt...að ESB myndi líklega afnema 200 mílna efnahagslögssögu og leyfa öðrum ríkjum að veiða í henni."

Er ekki allt í lagi með þetta fólk? Hverskonar endemis vitleysa er þetta?

Þetta sýnir best á hvaða "plani" Nei-sinnar eru. ESB hefur ekki hreyft við lögsögum þeirra aðildarríkja sem liggja að sjó!

Þetta sýnir algjörlega svart á hvítu hvað það er nauðsynlegt að halda aðildarferlinu áfram, þannig að venjulega gefið fólki geti kynnt sér málið! Aðeins fræðsla getur unnið bug á rugli sem þessu.

Séu sjónarmið sem þessi ráðandi, er kannski bara eins gott að skríða inn í torfkofana aftur og hýrast þar!

ESB-reglur vernda vinnandi mann

Hér er áhugaverð færsla af blogginu á Vísir.is, sem Kristbjörn Árnason skrifar:

,,Íslenskir dómstólar hafa alla tíð verið ansi hallir undir sjónarmið atvinnurekenda og tryggingarfélaga þeirra þegar launamenn verða fyrir slysum.

Sérstaklega hafa þeir verið erfið gagnvart þeim sem búa yfir viðurkenndri verkþekkingu. Þá hafa dómstólar ætlast til þess að slíkir launamenn eigi að hafa þá þekkingu að varast slys. Slys eru slys og gera ekki boð á undan sér. Breytir þá engu hvort maðurinn hafi þetta stutta námskeið sem iðnnámið er eða ekki

Þetta mál fjallar um íslenskan húsasmið sem slasaðist alvarlega á byggingarsvæði Smáralindar 2001. Hann stefndi vinnuveitanda sínum sem Hæstiréttur taldi ekki bera ábyrgð. EFTA-dómstóllinn snýr þeim dómi við.

Einungis í undantekningartilvikum getur það samræmst tilskipunum ESB um aðbúnað, hollustuhætti og öryggi á vinnustöðum að gera starfsmann ábyrgan fyrir öllu eða meginhluta tjóns sem hann verður fyrir vegna vinnuslyss, þegar fyrir liggur að vinnuveitandi hefur ekki farið að reglum um öryggi og heilsu á vinnustað. Þetta er staðfest í dómi EFTA-dómstólsins frá í morgun.

En með inngöngu Íslands í EFTA fengu íslenskir launamenn lög um vinnuvernd. Nema að sjávarútvegur og landbúnaður er undanþegin þeim lögum. Þar sem þær greinar eru á undan-þágu frá öllum ESB reglum.

En íslenskum dómstólum tókst strax í byrjun að draga úr þessum rétti eftir hagsmunum tryggingafélaganna. Er það jafn vel í andstöðu við vilja samtaka atvinnurekenda. Þetta var mjög mikilvægur dómur.

Fjallað er um málið á vef ASÍ

Bloggið

(Leturbreyting, ES-blogg)

Magnús Orri í FRBL: Laun og skuldir í sömu mynt - Katrín um erlendar fjárfestingar

Magnús Orri Schram, þingmaður skrifar grein í Fréttablaðið í dag undir yfirskriftinni "Laun og skuldir í sömu mynt" og segir þar:

,,Stærstur hluti erfiðleika íslenskra fyrirtækja og heimila snýst ekki um hrun bankakerfisins heldur miklu fremur um sveiflur í gengi erlendra mynta, launakrónu og verðtryggðar krónu. Ríkið tók á sig mikið högg vegna hruns bankanna en tókst með neyðarlögunum að minnka það tjón og senda reikninginn að einhverju leyti til erlenda kröfuhafa. Tjón almennings er hins vegar miklu fremur tengt gengi krónunnar og því verðbólguskoti sem varð því samfara. Þannig hitti hrun launakrónunnar íslensk heimili miklu verr en banka­hrunið. Íslendingar upplifa bæði banka- og myntkreppu, þegar önnur lönd glíma bara við bankakreppu. Sem dæmi hefur írskur almenningur ekki lent í stórkostlegu eignatjóni enda eru laun þeirra og skuldir í sömu myntinni.

Stjórnmálamenn eiga að skapa skilyrði og umhverfi til að fólk vilji búa hér áfram. Sumir stjórnmálamenn hafa lagt á það áherslu að framtíð íslenskra neytenda, íslenskra skuldara og íslenskra launamanna sé best borgið í myntsamstarfi við vinaþjóðir í Evrópu. Aðrir stjórnmálamenn hafa ekki lagt fram neina framtíðarsýn í þessum efnum. Nú er komið að almenningi að standa með sjálfum sér og krefjast breytinga. Íslenskur almenningur á skilið að laun og skuldir séu í sömu myntinni."

 

http://www.visir.is/laun-og-skuldir-i-somu-mynt/article/2010862433649 

 

Bendum einnig á grein eftir Katrínu Júlíusdóttur, iðnaðarráðherra,  um erlendar fjárfestingar í blaðinu í dag, en þar segir hún: ,,Erlend fjárfesting í atvinnuuppbyggingu er ekki aðeins mikilvæg vegna innspýtingar fjármagns í efnhagslífið heldur fylgir henni gjarnan ný þekking, tækni og tengsl við markaði. Hér á landi hafa erlendar fjárfestingar því miður verið bæði fátíðar og einhæfar enda hafa íslensk stjórnvöld aldrei mótað markvissa opinbera stefnu í þeim efnum. Úr því verður bætt."

 

http://visir.is/ahersla-a-erlendar-nyfjarfestingar/article/2010901404027

 

Borðuðu Evrópusinnar hvalkjötið?

Um daginn fullyrti einn af lesendum bloggsins að Evrópusinnar borðuðu ekki hvalkjöt. Sem er náttúrulega ekki rétt, margir Evrópusinnar borða hvalkjöt.

Hvalveiðar eru umdeildar og hafa verið lengi. Einn þeirra sem tjáir sig um hvalkjöt og  hvalveiðar er Jónas Kristjánsson, enda alltaf að skrifa um mat. Í nýlegri færslu segir Jónas (ekki í hvalnum!):

,,"Aðeins 23% af hvalveiðiafla Íslands árin 2009 og 2010 skilaði sér til útflutnings. Og aðeins 5% komst á leiðarenda. Þar af hafa 0% selzt í Japan. Um aðra markaði er ekki að ræða. Þetta er feiknarleg rýrnun, sem bendir til, að brögð séu í tafli. Hvar eru þau 77%, sem aldrei fóru úr landi? Það hlýtur að vera feiknarlegt kjötfjall. Og hvað eru þau 95%, sem aldrei komu fram í viðskiptalandinu? Fór mismunurinn í sjóinn? Eða er hann í gámum í fríhöfn? Það hlýtur að vera geigvænlegur gámahaugur. Og hvers vegna er ekkert selt af því eina prósenti, sem skilar sér á leiðarenda? Og hver borgar vitleysuna?" 

Hvalveiðar eru ekki "heilsársatvinnugrein" og verða aldrei, einfaldlega vegna þessa að ýmsar hvalategundir synda suður á bóginn og vegna veðraskilyrða, ekki gott að veiða hval yfir vetrartímann.

Er þetta þá ekki bara svona sumarhobbí núna? Stuðningsmenn hvalveiða segja að séu hvalir ekki veiddir, éti þeir upp allann fiskinn. En hvalir hafa verið til mjög lengi, sem og "fiskurinn" í sjónum. Af hverju er fiskurinn þá ekki búinn?

Getur verið að náttúran sjái um sig sjálf? 

Myndskurður MBL - tær mynd af þjóðernishyggju?

Nú er fátt rætt meira heldur en nýr IceSave-samningur og allir miðlar fullir af IceSave (aftur!).

Líka "pirraða blaðið" (les: Morgunblaðið). Það sem vekur athygli ritara er hisvegar myndskurðurinn í sambandi við þessa frétt.

Burtséð frá efni fréttarinnar, vakna strax hugleiðingar um þjóðernishyggjuna sem einkennir Morgunblaðið um þessar mundir.

Þjóðernissinnaðra dagblað en Morgunblaðið er sjálfsagt vandfundið um þessar mundir í Evrópu.

Eða er þetta bara landslagsmynd? Hreifst ljósmyndarinn af landslagi málverksins?

Það er frekar óvenjulegt að menn séu klofnir svona í tvennt á myndum! 

"Fögur er hlíðin" (fjallshlíðin!). 

Hafa lesendur fleiri hugmyndir um myndina? 

Framundan: Blóm í haga?

Í frétt á sænska SVT er sagt að íslenska kreppan sé að fá ”góðan endi,” að kostnaður vegna falls bankanna sé að hverfa í reyk og hagvöxtur sé framundan. Þá er rætt um lækkun stýrivaxta og að atvinnuleysið sé aðeins 6% (var 7,2% í september, innskot ES-blogg).

Rætt er við Ársæl Valfells, hagfræðing hjá HR í fréttinni og hann segir að Íslendingar hafi þurft að fara frá því að vera ”Kúvæt-búar” til þess að vera ”Kaupmannahafarbúar” (og hann þá á væntanlega við að hafa þurft að fara frá allsnægtum í einhverskonar ”normal”-ástand) .

Hann segir landið vera að ná sér á strik. Í fréttinni er sagt að mikilvægur þáttur í þessu sé að gjaldmiðillinn hafi fengið ”kjaftshögg” og að virði hans hafi hrunið.

Segir í fréttinni að þetta ”verkfæri” sé ekki til hjá löndum eins og Grikklandi, Írlandi eða Portúgal. Sama eigi við um þau Eystrasaltslönd, sem hafi tengt sig við Evruna.

Um Írland segir  Ársæll Valfells: ,,Nú eru það ríkisstjórnin og skattgreiðendur sem borga fyrir óábyrg útlán bankanna. Og ESB virðist vera þarna að baki. Þetta er röng leið og það var þessari leið sem Íslendingar höfnuðu í þjóðaratkvæði um Icesave.”

Það er alltaf áhugavert að velta fyrir sér hvort kom á undan hænan eða eggið! Varð það ESB sem lá að baki þessu? Nei, ríkisstjórn Írlands, ESB og Alþjóða gjaldeyrissjóðurinn komust að SAMKOMULAGI um að koma Írum til hjálpar.

Hér birtist enn og aftur ”skúrkaímyndin” af ESB, sem virðist ofarlega í huga margra Íslendinga gagnvart ESB.

Í framhaldi af þessu má nefna á Ársæll Valfells hefur verið eindreginn stuðningsmaður þess að Íslendingar myndu taka einhliða upp Evru, þ.e. án samstarfs við ESB og án baktryggingar Evrópska Seðlabankans (ECB) . Sjá hér og hér

Þó krónan sé gölluð, þá er sennilega betra að reyna að nota hana með tengingu við Evru og þar með stuðning ECB. Með það að markmiði að skipta henni síðan út fyrir Evru og vera þá komin með alþjóðlegan, 100% nothæfan gjaldmiðil.

Og svona í lokin: Er hér allt að falla í lukkunnar velstand?

Lesandi hefur orðið - um bændur og forystu þeirra

Birtum hér áhugaverða athugasemd sem kemur frá Hrafni Arnarsyni, við aðra færslu hér á blogginu:

 

,,Sá sem þetta ritar les Bændablaðið reglulega.Þar kemur greinilega fram að margt er að gerast í íslenskum landbúnaði. Oft sakna ég þess að opinská og hreinskilin umræða fari fram um stöðu landbúnaðarins. Sagnfræðingar hafa skrifað um að ein helsta bylting síðustu aldar sé hröð og mikil fækkun í stétt bænda. Í þróuðum löndum eru bændur innan við 5% af vinnuafli. Lengst af í sögu íslensku þjóðarinnar hafa bændur verið nálægt 95% vinnandi manna. Gífurleg framleiðniaukning hefur átt sér stað í landbúnaði. Vélvæðing, tækni og þekking eru lykilorð. Fjölskyldubúið er hefðbundið form reksturs hér á landi. Einingar eru litlar og fjárfestingar miklar. Beingreiðslur skipta miklu fyrir afkomu bænda. verulegur hluti af tekjum bænda er vegna vinnu í öðrum greinum en landbúnaði. Allar greinar landbúnaðar eru reknar með tapi eða reksturinn í járnum. Hér vegur fjárhagskostnaður þungt. Landbúnaðurinn nýtur mikillar verndar en landið er mjög háð innflutningi á landbúnaðarvörum. Um helmingur af næringarþörf er fullnægt með innflutningi. Íslenskur landbúnaður hefur lagað sig að alþjóðlegu umhverfi og skiptu þar Gattsamningarnir og Alþjóðaviðsskiptastofnunin mestu. Því miður skortir forystu Bændasamtakanna víðsýni og hugrekki. Hún tekur ekki eðlilegan þátt í samningaferlinu við ESB. Staða landbúnaðarins er erfið og verður ekki betri ef menn ríghalda í ríkjandi ástand."

Höft næsta áratuginn?

Tveir hagfræðingar, Yngvi Örn Kristinsson, fyrrum aðalhagfræðingur Landsbankans og Ásgeir Jónsson, hjá Arion-banka, sögðu á morgunfundi í morgun að líklegt væri að krónunni yrði ekki sleppt lausri fyrr en 2015-2016!

Vísir er með frétt um málið og þar segir: ,,Ætli Íslendingar að halda í krónuna er ólíklegt að gjaldeyrishöft verði afnumin á næstu fimm til tíu árum. Í skugga þeirra verður að endurbyggja íslenska myntsvæðið með lágu raungengi og lítilli einkaneyslu, að sögn Ásgeirs Jónssonar, forstöðumanns greiningar Arion Banka.

Ásgeir var með erindi á morgunverðarfundi Arion Banka í morgun um gjaldeyrishöft og framtíð krónunnar.

Hann sagði inngöngu landsins inn í myntbandalag Evrópu nauðsynlegan hluta af aðildarviðræðum stjórnvalda við Evrópusambandið. Í kjölfarið taki við eitthvað form fastgengisstefnu við evruna. Ólíklegt sé hins vegar að krónan verði sett á flot.

„Það er vafamál hvort að krónan muni fljóta aftur á næstu 5-10 árum, haldi hún áfram að vera til, og einhver tegund af höftum mun verða nauðsynlegt böl á íslenskum gjaldeyrismarkaði," sagði hann." (Leturbreyting- ES blogg).

Þetta er bjart, verulega bjart!

Ef þetta verður raunin, þá verða Íslendingar sennilega að segja sig frá samningum um EES, Evrópska Efnahaghagssvæðið, sem Geir Haarde, sagði að hefð "gagnast okkur svo vel."

Hvað gerist þá?

Ps. Áðurnefndur Ásgeir Jónsson á pabba í Sjávarúvtvegs og landbúnaðarráðuneytinu, Jón Bjarnason!

Það er ábyggilega svolítið stuð yfir "ýsunni og kartöflunum" hjá þeim fegðum!

Einnig frétt um þetta hér og hér 

 

Ingimundur Bergmann í FRBL: Hvetur Bændasamtökin til að skipta um skoðun í ESB-málinu og vinna að hagsmunum bænda (og annarra)

Ingimundur Bergmann, vélfræðingur og bóndi skrifar áhugaverða grein í Fréttablaðið í dag um bændaforsystuna og ESB-málið. Hann segir: 

"Áhugasamt fólk um málefni landbúnaðarins hefur að undanförnu getað fylgst með undarlegri deilu sem komin er upp milli Bændasamtaka Íslands (BÍ), annars vegar og Landbúnaðar- og sjávarútvegsráðuneytisins hins vegar.

Upphaf málsins má rekja til þess að Fréttablaðið átti á dögunum viðtal við formann samninganefndar þeirrar sem skipuð var til að koma fram fyrir hönd íslenska ríkisins gagnvart Evrópusambandinu í samningaferlinu sem hafið er vegna umsóknar Íslands. Í viðtalinu kom fram að ekki þykir gott að BÍ skuli kjósa að standa utan við ferlið og kjósi að senda ekki fulltrúa sína til starfa við svokallaða rýnivinnu sem fram fer við að bera saman stöðu mála á Íslandi annars vegar og ESB hins vegar.

Bændasamtökin hafa, sem kunnugt er, tekið þá afstöðu að þau séu á móti inngöngu Íslands í ESB og af þeirri ástæðu sé réttast að koma hvergi nærri samningaferlinu, væntanlega með það í huga að ,,enginn sé þar kenndur þar sem hann komi ekki". Deila má um hversu málefnaleg þessi afstaða er og eins hvort hún þjóni hagsmunum bænda. Hafa verður í huga að svo gæti farið að Ísland gangi til liðs við ESB hvort sem bændum líkar það vel eða illa. Má því eins líta svo á, að betra sé að taka þátt í að gera þá samninga sem unnið er að og reyna með því hafa áhrif á þá til hins betra fyrir bændur - byggja þannig undir greinina til framtíðar - því ef svo fer að ekkert verður af inngöngu Íslands, hefur þó ekki gerst annað en það að BÍ hafi lagt sitt af mörkum til að treysta hag stéttarinnar."

Síðar segir Ingimundur: "Í Bændablaðinu er greint frá svokölluðum ,,bændafundum" sem haldnir hafa verið víðs vegar um landið að undanförnu og í frásögnum af fundunum kemur fram að ekki eru allir bændur jafn vissir um að afstaða samtakanna sé rétt, (að taka ekki þátt í samningaferlinu). Vitanlega er fullkomlega eðlilegt að bændur hafi af því nokkrar áhyggjur. Sjálfsagt hlýtur að vera að Bændasamtökin gæti hagsmuna bænda, í þessu efni sem öðru er að stéttinni snýr, en feli það hlutverk ekki einhverju fólki út í bæ, sem hugsanlega hefur ekki eins mikla þekkingu á málefnum stéttarinnar og gera má ráð fyrir að samtökin hafi.

Ekki hefur alltaf gefist vel að BÍ sofni á verðinum þegar málefni bændastéttarinnar eru annars vegar og í því sambandi má minna á hvernig komið er fyrir því sem áður hét Lánasjóður landbúnaðarins, sjóður sem að hluta var rekinn á félagslegum grundvelli, en er nú gufaður upp í því dæmalausa frjálshyggjubrölti sem stundað var. Það er ljót saga sem bændur og ríkissjóður Íslands súpa nú seyðið af.

Gera verður þá kröfu til Bændasamtaka Íslands, að þau skipti þegar í stað um afstöðu til samninganefndarinnar, taki þátt í því starfi sem þar fer fram og leggi sitt af mörkum til að samningarnir sem unnið er að, verði sem bestir fyrir land og þjóð, bændur jafnt sem aðra þegna þessa lands."

Öll greinin 

30 ár!

Í dag eru nákvæmlega 30 ár frá því Mark nokkur Chapman, skaut John Lennon til bana í New York.

Þetta er því sorgardagur.

John Lennon var friðarsinni og boðskapur hans kristallast kannski best í orðunum "Give peace a chance."

Kannski við hér á skeri ættum aðeins að hugsa meira í anda John Lennon og leyfa friði að njóta sín á meðal okkar.

Dægurþrasið hefur sennilega aldrei verið jafn mikið og á undanförnum tveimur árum.

Því eru orð Lennons kærkomin áminning og verð íhugunar.

Imagine!

Yfirlit yfir "nýju" aðildarlönd ESB og glímuna við kreppuna

Í eftirfarandi grein á EurActive er að finna greinargott yfirlit yfir hvernig hin "nýju" aðildarlönd ESB, þ.e. gömlu Austantjaldslöndin eru að ná að vinna sig út úr efnahagshremmingum síðustu missera. Fyrir flest þeirra er útlitið bjart, en áhugaverðasta dæmið er Pólland, sem slapp við samdrátt. Greinin er á ensku.