Verður MAKRÍLLINN aðal málið?

Jón Bjarnason segir Ísland hafa fengið hótunarbréf frá ESB.

Ímyndum okkur innihaldið: "Hei, Ísland, hvað er eiginlega að ykkur, af hverju eruð þið að veiða allan þennan makríl? Við hérna í Brussel erum ekkert sérlega hress með þetta. Ef þið hættið ekki, þá hættum við að flytja inn evrópskan bjór til Íslands."

Þetta er að sjálfsögðu grín!

Í frétt á Eyjunni stendur: ,,Kallar Jón Bjarnason bréfið hótunarbréf í Morgunblaði dagsins en hann heldur fast við þá skoðun sína að um tvö óskyld mál sé að ræða. Ekki aðeins skrifar undir Maria Damanaki, yfirmaður sjávarútvegsmála, heldur einnig stækkunarstjórinn Stefan Fühle og Karel De Gucht sem fer með almenn utanríkismál.

Eyjan spurðist fyrir um það í ágúst síðastliðnum hvort Jón óttaðist að hörð afstaða hans varðandi makrílveiðar hefðu áhrif á aðildarviðræður Íslands og ESB og vísaði hann því á bug þá með sömu rökum. Er velþekkt að Jóni hugnast aðild að ESB afar illa og hefur ráðherrann ítrekað lýst þeirri skoðun sinni."

Jón er nokkuð sniðugur í andsvörum, og sagði í sambandi við þetta í RÚV-útvarpsfréttum að ,,..nú erum við ekkert að fara inn í Evrópusambandið." 

Ræður hann því? 

Á ekki íslenska þjóðin að fá að kjósa um aðildarsamning? 

En þetta með makrílinn mun að öllum líkindum leysast og væntanlega mun aðild / ekki-aðild, EKKI ráðast vegna MAKRÍLS! Það eru stærri mál þar á ferð eins og vextir, verðbólga, gjaldmiðilsmál o.s.frv.

Össur og "utanríkis" Eistlands ræddu málin í Tallin

Eftirfarandi frétt birtist á vef Utanríkisráðuneytisins: ,,Össur Skarphéðinsson utanríkisráðherra átti í dag fund með eistneskum starfsbróður sínum, Urmas Paet, í Tallinn í Eistlandi. Ráðherrarnir ræddu Evrópumál, samskipti ríkjanna og öryggis- og varnarmál. Utanríkisráðherra ræddi stöðuna í formlegum samningaviðræðum Íslands við Evrópusambandið og fór yfir helstu hagsmunamál Íslands. Hann reifaði mjög ítarlega sjónarmið Íslendinga í fiskveiðum og sjávarútvegi og lagði áherslu á stuðning Eista við þau. 1. janúar nk. bætist Eistland í hóp 16 ESB-ríkja sem tekið hafa upp evru, og ræddu ráðherrarnir hvaða lærdóma Ísland gæti dregið af því ferli og um samstarf smárra ríkja innan Evrópusambandsins.

Eistar hafa stutt vel við bakið á Íslendingum í kjölfar bankahrunsins, m.a. í ESB-umsóknarferlinu, minnugir viðurkenningar Íslendinga á sjálfstæði þeirra fyrir tæpum tveimur áratugum. Á næsta ári standa fyrir dyrum hátíðahöld i í tilefni þess að tuttugu ár verða frá því að Eistland endurheimti sjálfstæði sitt. Á meðal þess sem á dagskrá verður, er sérstakur Íslandsdagur, 21. ágúst 2011, og er vonast eftir góðri þátttöku íslenskra listamanna.

Að loknum fundi utanríkiráðherranna, hitti Össur þingmenn í vináttunefnd Íslands en Eistar telja Íslendinga meðal helstu vina- og samstarfsþjóða sinna. Þá átti utanríkisráðherra fund með formanni Evrópunefndar eistneska þingsins og aðstoðarbankastjóra eistneska seðlabankans þar sem ráðherra fór yfir stöðuna í samningaviðræðum Íslands og Evrópusambandsins, ræddi samstarfið við Alþjóðagjaldeyrissjóðinn og efnahagsáætlun íslenskra stjórnvalda. Ráðherra heimsótti einnig höfuðstöðvar hátæknifyrirtækisins Skype sem eru í Tallinn.

Fá norskir Kristdemókratar ESB-sinnaðan leiðtoga?

Frá því er greint á vefsíðu norsku Evrópusamtakanna að Kristeligt Folkeparti fái mögulega nýjan ESB-sinnaðan leiðtoga á næstunni, en fyrir dyrum stendur formannskjör.

Knut Arild Hareide er talinn sigurstranglegastur og er hann talinn vera Já-maður. Sjá m.a. hér

Töluverð umræða er um það í Noregi að EES-samningurinn dugi ekki lengur og því þurfi að leita nýrra lausna.

Kjell Magne Bondevik, fyrrum forsætisráðherra Noregs kemur einnig úr þessum flokki.

Magnús Bjarnason: Varði doktorsritgerð um stöðu Íslands á nýrri öld

Magnús Bjarnason varði 16. september sl. doktorsritgerð sína The Political Economy of Joining the European Union: Iceland‘s Position at the Beginning of the 21st Century í hagfræðideild Háskólans í Amsterdam (Universiteit van Amsterdam).

Ritgerð Magnúsar nálgast viðfangsefnið af sjónarhóli stjórnmálahagfræði (e. political economy). Hann hafði áður lokið tvöföldu meistaraprófi í alþjóðastjórnmálum og viðskiptafræðum frá Frjálsa háskólanum í Brussel (Université Libre de Bruxelles).

Framlag ritgerðarinnar til fyrirliggjandi þekkingar felst einkum í, að höfundurinn raðar haganlega saman tölulegum og öðrum rannsóknarniðurstöðum, bætir við nýju efni og býr til greinargóða yfirlitsmynd af þeim efnahagsáhrifum, sem aðild Íslands að Evrópusambandinu kann að hafa á íslenskt efnahagslíf og samfélag í samhengi við reynslu annarra Evrópuþjóða með sérstakri skírskotun til peningamála, landbúnaðar og sjávarútvegs.

Aðalleiðbeinendur Magnúsar voru Roel Beetsma prófessor og deildarforseti hagfræðideildar Háskólans í Amsterdam og Þorvaldur Gylfason prófessor í hagfræðideild Háskóla Íslands.

Í doktorsnefndinni sátu þrír prófessorar í Háskólanum í Amsterdam, Albert Jolink, Gerrit Meester og Henk Jager, ásamt Jørgen Ulff-Møller Nielsen, dósent í Viðskiptaháskólanum í Árósum. Nefndin samþykkti einum rómi að veita Magnúsi Bjarnasyni doktorsnafnbótina. Meðmælendur Magnúsar voru Roel Beetsma og Þorvaldur Gylfason.

Forlag Háskólans í Amsterdam hefur gefið ritgerðina út á prenti, og er hægt að panta hana hjá forlaginu (Amsterdam University Press, [e-mail]  og  www.aup.nl). Háskólinn í Amsterdam er einn af 50 bestu háskólum í heimi samkvæmt háskólavefnum topuniversities.com.

Magnús kemst að þeirri niðurstöðu að aðild Íslands að Evrópusambandinu hefði í för með sér talverðan ávinning, m.a. yrði þjóðarframleiðslan allt að sjö prósentum meiri en ella innan fárra ára.     

Helgarblað DV greindi frá niðurstöðum Magnúsar á áhrifum inngöngu á hag íslenskra neytenda. Þær benda til þess að neytendur muni hagnast mikið á lækkuðu matvæla- og vöruverði við inngöngu í ESB. Hann segir að matvælaverð mun lækka fljótlega eftir inngöngu um tíu til tuttugu prósent sem jafngildir tveggja til fjögurra prósenta launahækkun hjá vinnandi fólki. Í Svíþjóð og Finnlandi, lækkaði matvælaverð um tíu prósent ári eftir að þau gerðustu aðilar að sambandinu árið 1995. Hér á landi eru tollar og matvælaverð talsvert hærra og því meira svigrúm til lækkunar.

Evrópusamtökin fagna útgáfu þessarar bókar og óska Magnúsi til hamingju með útgáfuna.

Ritstjóraskipti á Bændablaðinu

Fréttablaðið greindi frá því í dag að ritstjóri Bændablaðsins Þröstur Haraldsson, hefði sagt upp störfum.  ,,Ég sagði upp eftir nokkuð langvarandi samstarfs­örðugleika við útgefandann," sagði Þröstur. „Þeir hafa aðrar skoðanir á því hvernig eigi að reka blöð en ég," segir í FRBL.

Síðar segir: ,,Ágreiningurinn snerist um sjálfstæði rit­stjórna og verkaskiptingu milli útgefanda og ritstjóra. Þröstur vildi ekki fara nánar út í þá sálma. Þótt hann hafi strax hætt ritstjórn mun hann starfa við blaðið út uppsagnarfrestinn, sem rennur út um áramót. Tjörvi Bjarnason hefur tekið við ritstjórn og ábyrgð á útgáfu Bændablaðsins til bráðabirgða. Hér má lesa um Tjörva, en það verður áhugavert að sjá hvort hann breytir eitthvað til í blaðinu.

Það sem einkennir Bændablaðið er nánast einhliða neikvæð umfjöllun um ESB og landbúnað, en samtök Bænda segja að með aðild muni landbúnaður á Íslandi heyra sögunni til.

Það hefur hinsvegar ekki gerst í neinu landi sem gengið hefur í ESB.

Breytingar hafa hinsvegar orðið á landbúnaði ríkjanna, en íslenskur landbúnaður á eftir að breytast mjög mikið hvort eð er (og hefur breyst gríðarlega á undanförnum áratugum, án ESB!).

Ekki síst með DOHA-viðræðunum, en markmið þeirra er að lækka tolla og stuða að auknum viðskiptum í heiminum, m.a. með landbúnaðarvörur.

Eyjan: Afnám gjaldeyrishafta vandasamt

Krónan er áfram til vandræða. Á vef Eyjunnar er þessi stutta frétt, sem þó segir næstum allt sem þarf að segja um krónuna: ,,Gengi krónunnar getur lækkað, verðlag hækkað og lífskjör almennings versnað meira en ella ef farið er of geyst í afnám gjaldeyrishaftanna að mati Arnórs Sighvatssonar, aðstoðarseðlabankastjóra. Hann segist nauðsynlegt að Ísland ávinni sér traust erlendis áður en skorið er endanlega á öll höft.

Kom þetta fram á fundi fagfjárfesta í dag en Rúv greinir frá.

Á meðal þess sem eru helstu forsendur fyrir afnámi haftanna eru  að nægur gjaldeyrir sé í landinu, jafnvægi komið í ríkisfjármálin, aðstæður séu viðunandi á alþjóðlegum fjármálamörkuðum og binding óstöðugs fjármagns.

Varaði Arnór við að afnema þau mjög hratt. Slíkt þyrfti að gera í áföngum. Ella geti efnahagskerfið orðið fyrir verulegum skakkaföllum."

Má Ísland við meiri skakkaföllum? Nei, en við þurfum klárlega lausn á gjaldmiðilsmálum okkar!

Cameron hitti Bjarna Ben

Sagt var frá því í fjölmiðlum í dag að Bjarni Benediktsson formaður Sjálfstæðisflokksins, hefði hitt David Cameron, formann breska Íhaldsflokksins á einkafundi. Í frétt á Bylgjunni segir Bjarni að Íhaldemenn séu ,,skeptískir" eða fullir efasemda gagnvart Evrópusamrunanum.

það er hinsvegar vert að minna á að strax og Cameron hafði verið kosinn, lýsti hann og utanríkisráðherrahans, William Hague, því yfir að engrar stefnubreytingaryrði að vænta hjá Íhaldsflokknum varðandi Evrópu og að þeir myndu hafa fullt samstarf við við ESB.

En sjónarmið Bjarna þjónar honum hinsvegar vel hér heima.

Össur vill fá bændur að ESB-borðinu

Svo segir í frétt á Eyjunni í dag: ,,Ég geri mér fyllilega grein fyrir mikilvægi sveitanna fyrir þjóðmenningu Íslands, og atvinnusköpun í dreifbýli. Ég hef hvorki vilja né hug til þess að selja frumburðarrétt þeirra fyrir baunadisk einsog Esaú forðum.“

Svo skrifar Össur Skarphéðinsson, utanríkisráðherra, til bænda en ráðherrann hefur sent Bændasamtökunum bréf þar sem hann vill fá bændur að borðinu varðandi hugsanlega aðild Íslands að Evrópusambandinu. Talar hann til þeirra sem „gamall Mýrarmaður.“

Hefur Össur bréf sitt á formála um hversu vel hann þekki bændur og kjör þeirra eftir að hafa sjálfur dvalist í sveit lengi vel. Svo bætir ráðherrann við að enginn þekki landbúnað eins og bændur og því sé það þeim mjög í hag að taka þátt í að móta framhaldið í samstarfi. Segir hann engan vafa leika á að margt muni falla Íslands megin við samninga við ESB."

Öll frétt Eyjunnar

Bréf Össurar til bænda

ESB og S-Kórea að ganga frá fríverslunarsamningi

Eins og greint hefur verið frá hér á blogginu, hafa ESB og S-Kórea staðið í viðræðum um fríverslunarsamning. Nú stefnir í að svo verði og er í raun verið að ganga frá honum.

Fréttastofan AP greinir m.a. frá þessu. Talið er að samningurinn gangi formlega í gildi um mitt næsta ár. Það sem aðallega stóð í mönnum var að tryggja stöðu ítalska bílaiðnaðarins. S-Kóreumenn framleiða mikið af bílum, sem m.a. eru seldir hérlendis. Ítalir líka!

Í frétt AFP segir: ,,This agreement is by far the most important trade deal ever concluded by the European Union with one country and the first free trade deal with an Asian country," said European Commission chief Jose Manuel Barroso."

S.s.: Mjög mikilvægur samningur og fyrsti fríverslunarsamningur ESB við Asíu-ríki, samkvæmt Jose Manuel Barroso.

Frétt AP

Hvað er að óttast? Gunnar Hólmsteinn í FRBL

Stjórnarmaður Evrópusamtakanna, Gunnar Hólmsteinn Ársælsson, skrifar grein í Fréttablaðið í dag um þá samninga sem Norðmenn náðu fram í samningum sínum við Evrópusambandið á árunum 1993-1994. Í greininni segir Gunnar m.a.:

,,Í aðildarviðræðum settu Norðmenn sér það markmið að tryggja stöðu fiskveiða og fiskeldis í Noregi. Þeir settu líka fram ýmsar kröfur varðandi smábátaútgerð, veiðistjórnun, markaðsaðgang og svo framvegis. Til dæmis fengu þeir algert tollfrelsi af norskum fiskafurðum, samkvæmt samningnum.

Það sem Norðmenn þurftu að gefa eftir var lítilsháttar aukning í þorskveiðum norðan 62. breiddar­gráðu, úr 1,28% af heildarafla, í 1,57% (8.960 tonn í 10.990 tonn, af 700.000 tonna heildarafla!). Norðmenn þurftu svo að semja um deilistofna, eins og yfirleitt er gert.

Veiðireynsla Norðmanna tryggði þeim áfram yfirráð á sínum veiðisvæðum samkvæmt reglunni um hlutfallslegan stöðug­leika. Þessi regla á líka við um Ísland, enda hefur engin þjóð veitt hér við land frá lokum landhelgisdeilunnar árið 1976, þegar lögsaga okkar var færð út í 200 sjómílur.

Á fundi fyrir skömmu sagði aðalsamningamaður Íslands gagnvart ESB engan vafa leika á því að engin þjóð ætti hér veiðirétt. Það er að við Íslendingar ættum einir réttinn hér við land. Skýrara getur það ekki verið.

Aðildarsamningur Norðmanna tryggði þeim einnig varnir gegn svokölluðu „kvótahoppi," en í Noregi gilda þær reglur að aðeins norskir ríkisborgarar geta átt fiskiskip sem gerð eru út frá Noregi. Og aflanum skyldi landað í heimahöfn skipsins, sem hefði „efnahagsleg tengsl" við við­komandi svæði.
Með hjálp Evrópudómstólsins var það tryggt enn frekar að „kvótahopp" gæti ekki átt sér stað."

(Feitletrun, ES-blogg)

Öll greinin

Er fasismi á Íslandi?

Eiríkur Bergmann, stjórnmálafræðingur, var í spjalli á Bylgjunni í morgun um mótmælin við Alþingi í gær. Hann benti á þá staðreynd að á Austurvelli í gær var flaggað fánum á borð við fána Þriðja ríkis Adolfs Hitlers og og keltneska krossinum, sem er eitt vinsælasta tákn ný-nasista í Evrópu.

DV birtir einnig myndir um þetta.

Óneitanlega vaknar sú spurning hvort fasismi sé á uppleið hér á Íslandi? Er þetta tímanna tákn?

Stefán Rafn Sigurbjörnsson nýr formaður Ungra Evrópusinna

Á vef Ungra Evrópusinna stendur þetta:

,,Ný stjórn Ungra Evrópusinna var kjörin nú á dögunum og er nýr formaður stjórnar Stefán Rafn Sigurbjörnsson. (mynd)

Stjórn Ungra Evrópusinna 2010 – 2011 skipa:
Formaður: Stefán Rafn Sigurbjörnsson
Varaformaður: Guðrún Sóley Gestsdóttir
Ritstjóri: Elís Rúnarsson
Gjaldkeri: Ísleifur Egill Hjaltason
Ritari: Sif Jóhannsdóttir
Meðstjórnandi: Heimir Hannesson
Meðstjórnandi: Sema Erla Serdar
Meðstjórnandi: Ólafur H. Ólafsson

„Ný stjórn Ungra Evrópusinna ætlar að leggja það fyrir sig í vetur að taka virkan þátt í málefnalegri umræðu um Ísland og Evrópusambandið. Tilgangur félagsins er að fræða ungt fólk um Evrópusambandið og starfsemi þess með áherslu á stöðu og möguleika Íslands í samstarfi Evrópuþjóða.

Ungir Evrópusinnar telja komandi vetur mikilvægan í umræðunni um Ísland og Evrópusamstarfið. Samninganefnd er nú að störfum við að undirbúa komandi samningaviðræður. Viðræður sem munu að lokum skila samningi sem borin verður undir þjóðina til samþykktar eða synjunar.

Ungir Evrópusinnar bera mikinn vilja og tilhlökkun til rökræðu og samstarfs við önnur félög sem taka þátt í umræðunni um Ísland og Evrópusambandið.”

Evrópusamtökin óska nýrri stjórn velfarnaðar í sínum störfum og hlakka til samstarfsins!

 

Sameiginleg þingmannanefnd stofnuð

Á vef MBL má lesa frétt sem hefst svona:,,Sameiginleg þingmannanefnd Íslands og Evrópusambandsins verður stofnuð formlega á morgun. Sameiginlegri þingmannanefnd, sem skipuð er þingmönnum Evrópuþingsins og þjóðþings umsóknarríkis, er ætíð komið á fót í aðildarviðræðuferli. Hlutverk sameiginlegu þingmannanefndarinnar verður að fylgjast með samskiptum Íslands og Evrópusambandsins og þá sérstaklega umsóknar- og aðildarviðræðuferlinu. Hin sameiginlega þingmannanefnd Íslands og Evrópusambandsins samanstendur af 18 þingmönnum, níu frá Alþingi og níu frá Evrópuþinginu" Hér er öll fréttin

Einnig er fjallað um þetta á Eyjunni og þar segir:

,,Orðið á götunni er að þessi frétt hafi ekki fengið mikla athygli í dag, en á bak við hana leynist nokkur tíðindi.

Á morgun verður sem sagt stofnuð sameiginleg þingmannanefnd Íslands og Evrópusambandsins, en hlutverk hennar verður að fylgjast með samskiptum Íslands og Evrópusambandsins og þá sérstaklega umsóknar- og aðildarviðræðuferlinu sem í hönd fer í vetur.

Þetta væri í sjálfu sér ekki mjög fréttnæmt – enda er ávallt staðið sameiginlega að þessu milli umsóknarríkis og ESB – nema fyrir þær sakir hverjir sitja í nefndinni fyrir hönd Alþingis. Meirihluti nefndarmanna studdi aðildarumsóknina þegar hún var samþykkt í fyrrasumar, en þarna má líka sjá formenn tveggja stærstu stjórnarandstöðuflokkanna, Bjarna Benediktsson og Sigmund Davíð Gunnlaugsson.

Báðir greiddu þeir atkvæði gegn aðildarumsókninni, auk þess sem háværar raddir hafa verið í flokkum þeirra beggja að draga umsóknina til baka. Bjarni Benediktsson hefur auk þess landsfundarályktun Sjálfstæðisflokksins á bakinu, um að ESB-umsóknin verði dregin til baka, og því vekur sérstaka athygli að hann stígi ákveðið sáttaskref með því að taka þátt í þessari samvinnu við ESB.

Auk þess er athyglisvert að sjá hvern Bjarni velur með sér í nefndina, Þorgerði Katrínu Gunnarsdóttur, sem er ein tveggja þingmanna Sjálfstæðisflokksins sem hefur stutt aðildarferlið. Á bak við það er þó engin samsæriskenning, heldur skýrist það einfaldlega af því að Íslandsdeild þingmannanefndar EFTA rennur inní þessa nýju ESB-nefnd, þannig að fimm af níu fulltrúum koma úr EFTA-nefndinni.

Engu að síður er orðið á götunni að Bjarni sýni með þátttökunni skýran sáttahug við ESB-arm Sjálfstæðisflokksins, sem brást hinn versti við ályktun landsfundarins í sumar og sögðu margir sig jafnvel úr flokknum í kjölfarið.

Orðið á götunni er að æ minni líkur séu á því að þingsályktunartillaga um að draga umsóknina til baka verði nokkuð lögð fram á Alþingi. Flutningsmenn tillögunnar hafa gert sér grein fyrir því að tillagan yrði kolfelld á þingi og því er heldur minni áhugi á því að fá hana afgreidda en var síðasta vor. Er reyndar svo komið staðan hefur snúist við, að nú séu það ESB-sinnar á þingi sem vilji ólmir að slík tillaga komi fram, þannig að Alþingi geti staðfest stuðning við aðildarferlið."

 

Kaupmáttarhrun í kjölfar efnahags og gjaldmiðilshruns

Kaupmáttur hefur hrunið á Íslandi, í kjölfar hruns efnahagskerfisins og krónunnar árið 2008. Þetta sést greinilega á tölum sem Hagstofan birti í dag.

Í frétt Hagstofunnar segir m.a.: ,,Ráðstöfunartekjur heimilageirans eru taldar hafa lækkað árið 2009 um 5,4% frá fyrra ári. Ráðstöfunartekjur á mann drógust saman  um 5,3% milli ára og kaupmáttur ráðstöfunartekna á mann um 15,5%."

Hér er frétt Hagstofunnar

Sr. Þórir skrifar til Ögmundar

Sr. Þórir Stephensen skrifaði grein um ESB-málið í Fréttablaðið fyrir skömmu. Þar segir Þórir er hann byrjar grein sína: ,,

"Fyrir nokkru gerði ég athugasemd við málflutning frænda míns og vinar, Ögmundar Jónassonar, um ESB-mál. Ég sagði þá: „Hann vænir ESB um ýmislegt í eftirfarandi málsgrein: „En ekki mun standa á styrkveitingum – svona rétt meðan verið er að tala okkur til. Hið sama gæti hent okkur og indíána í Norður-Ameríku. Þeir töpuðu landinu en sátu uppi með glerperlur og eldvatn.“

Ég spurði svo Ögmund, hvort hann gæti bent mér á einhver dæmi um að slíkt hafi gerst í samskiptum ESB við aðildarlöndin. Ég sagði honum, að ég þekkti þau ekki og, gæti hann ekki komið með dæmi, þá væru umrædd orð hans ekkert annað en ómálefnalegur hræðsluáróður."

Hér er öll grein Þóris.