Reynsla Svíþjóðar: Frá EES til ESB

Hádegisfundur í Norræna húsinu, þriðjudaginn 19. janúar frá klukkan 12:00 til 13.30

Ulf Dinkelspiel, fyrrverandi Evrópumálaráðherra og aðalsamningamaður Svíþjóðar í aðildarviðræðunum við Evrópusambandið, heldur fyrirlestur á vegum Alþjóðamálastofnunar Háskóla Íslands og sænska sendiráðsins á Íslandi. Að erindinu loknu fjallar Birgir Hermannsson, aðjunkt í stjórnmálafræði, stuttlega um bók Dinkelspiels, Den motvillige europén, sem kom út á síðastliðnu ári en í henni gerir hann grein fyrir ferli sínum og einstakri reynslu af Evrópumálum

Ulf Dinkelspiel hefur gegnt lykilhlutverki í samningamálum Svíþjóðar á löngum ferli sínum sem embættis- og stjórnmálamaður. Hann vann að samningaviðræðunum um Evrópska efnahagssvæðið á sínum tíma en þá var hann ráðuneytisstjóri í viðskiptaráðuneyti Svíþjóðar. Dinkelspiel sinnti síðan embætti Evrópumálaráðherra frá árinu 1990 til 1993. Aðildarviðræðurnar við Evrópusambandið stóðu yfir frá 1992 til 1994 og var Dinkelspiel aðalsamningamaður Svíþjóðar. Þá var hann í forsvari fyrir Evrópuhreyfinguna í landinu þegar að þjóðaratkvæðagreiðslunni kom haustið 1994. Dinkelspiel hefur að auki nær fjögurra áratuga reynslu í sænsku utanríkisþjónustunni.

Fundarstjóri: Bogi Ágústsson, fréttamaður

Fyrirlesturinn fer fram á ensku – allir velkomnir

Ps. Fyrir þá sem komast ekki á fyrirlesturinn, mun Ulf verða með kynningu og umræður um bók sína kl.15.00 sama dag í Eymundsson, Austurstræti. Þar verður einnig Bogi Ágústsson og mun hann ræða við Ulf um þessi efni.

 

ESB-umsókn og Icesave aðskild mál

Stefan Füle, stækkunarstjóri ESB, segir Icesave ekkert hafa með aðildarumsókn Íslands að ESB að gera. Þetta kom fram í spurningum Evrópuþingsins til hans í gær. RÚV birti frétt um þetta og þar segir orðrétt:

,,Icesave-deilan er tvíhliða mál milli Íslendinga annars vegar og Breta og Hollendinga hins vegar og hefur ekki áhrif á umsókn Íslands um aðild að Evrópusambandinu. Þetta segir Stefan Füle sem útnefndur hefur verið stækkunarstjóri Evrópusambandsins í stað Ollis Rehns. Füle svaraði í dag spurningum Evrópuþingmanna um stefnumál.

Hann var spurður hvort ákvörðun forseta Íslands að synja Icesave-lögunum staðfestingar og vísa málinu í þjóðaratkvæði hefði áhrif á umsókn Íslands um aðild að ESB. Füle svaraði því til að umsókn yrði metin út frá því hve vel Íslendingum gengi að uppfylla skilyrði ESB fyrir aðild. Icesave deilan væri tvíhliða mál sem hefði ekki áhrif."

Heimild

Hörð orðaskipti

Þau voru hörð, skoðanaskiptin á milli Jóns Baldvins Hannibalssonar, fyrrum utanríkisráðherra og Friðriks J. Arngrímssonar frá LÍÚ, í þættinum Sprengisandi á Bylgjunni s.l. sunnudag. Þeir ræddu þar sjávarútvegsmál og ESB Hægt er að hlusta á ,,klippið" hér.

Dagur ungra fræðimanna í Evrópumálum

Dagur ungra fræðimanna í Evrópumálum

Útvarpsþáttur á Rás 1

Laugardaginn 8. janúar kl. 13:00

Fréttatilkynning                                                                                                                                                                          

7. janúar 2010

Í þættinum Dagur ungra fræðimanna í Evrópumálum á Rás 1 kl. 13:00 á morgun, laugardaginn 8. janúar, er rætt við fimm ungar fræðikonur sem kynntu rannsóknir sínar á degi ungra fræðimanna í Evrópumálum hinn 20. nóvember síðastliðinn. Dagurinn var haldinn í fjórða sinn en hann er samstarfsverkefni Alþjóðamálastofnunar Háskóla Íslands og Samtaka iðnaðarins.

Tilgangurinn með deginum er að skapa vettvang fyrir unga fræðimenn til að kynna rannsóknir sínar á sviði Evrópufræða. Í þetta skipti voru þátttakendur frá tveimur háskólum: Háskóla Íslands og Háskólanum á Bifröst. Fimm konur kynntu rannsóknir sínar en þær eru á fjórum fræðasviðum: Evrópufræðum, alþjóðasamskiptum, lögfræði og stjórnsýslufræðum. Einnig er rætt við Kristínu Ingólfsdóttur, rektor Háskóla Íslands. Umsjón hefur Edda Jónsdóttir.

Serbía: Viljum fljótt inn í ESB

Serbía sótti um aðild að ESB í lok desember. Í fréttum dagsins hefur komið fram að Serbía vilji komast sem hraðast inn í ESB. Vuk Jeremic, utanríkisráðherra Serbíu lét hafa þetta eftir sér:

,,In several years, Serbia will join the EU. That is a promise we make and which we intend to keep, Jeremic said."

Þeir ætla sér s.s. nokkur (several) ár í þetta og er talað um 2014 sem fyrsta möguleika.

Þeir hafa einnig gert upp við sig hvaða fjórar meginstoðir (pillars) verða í utanríkisstefnu landsins: Moskva, Peking, Washington og BRUSSEL.

Svo virðist sem Serbía sé þjóð sem sé búin að marka sér skýra stefnu í samskiptum sínum við erlend ríki.

Á meðan er hvað í gangi hér?

Icesave - ESB - BBC ofl

Eins og þjóðinni og umheiminum er kunnugt vísaði forseti Íslands Icesave-lögunum til þjóðaratkvæðis. Þetta hefur framkallað mikil viðbrögð, bæði hér heima og erlendis, af ýmsum toga og frá ýmsum aðilum.

Fréttaveitan EurActiv skrifar m.a. um þetta og þá umfjöllun má finna hér. Þá ritar fyrrum utanríkisráðherra Dana,Uffe Elleman Jensen, einnig um þetta á bloggi sínu og það má lesa hér

Valgerður Bjarnadóttir, þingkona, skrifar einnig um Icesave í pistli og segir m.a. annars:

,,Að þessu sinni ætla ég einungis að vikja að fullyrðingum um að Iceavesamningurinn sé aðgöngumiði að Evrópusambandinu.  Það er einfaldlega röng fullyrðing. Þegar íslensk stjórnvöld undirgengust að taka ábyrgð á lágmarksinnistæðum Icesavereikninganna undir lok ársins 2008, var umsókn að Evrópusambandinu ekki einu sinni á dagskrá.  Umsóknin komst ekki á dagskrá hér á landi fyrr en í kosningabaráttunni á útmánuðum 2009.

Umsókn um aðild að Evrópusambandinu var afhent í júlí 2009.  Ráðherraráðið ákvað að fela framkvæmdastjórn ESB að undirbúa umsögn um aðildarumsóknina.  Umsögnin verður vætnanlega á dagskrá leiðtogafundar í mars. Hvert eitt hinna 27 ríkja í Evrópusambandinu getur komið í veg fyrir að framhald verði á málinu. Hollendingar geta það, Bretar geta það, Pólverjar og 24 aðrar þjóðir.  Ef einhver gerir það trúi ég því að það verði ekki vegna Icesave - heldur vegna hins að við erum þjóð sem virðist ekki vilja standa við orð sín."

Og taka ber fram að Bretar hafa sagt að Icesave mun ekki leggja stein í götu umsóknaraðildar Íslands að ESB og segir orðrétt í frétt RÚV:

,,David Miliband, utanríkisráðherra Breta, segir engar vísbendingar um að Bretar muni beita sér gegn Íslendingum innan Alþjóðagjaldeyrissjóðsins eða Evrópusambandsins.

Þetta kom fram í samtali Össurar Skarphéðinssonar, utanríkisráðherra, við Miliband í dag. Þeir ræddu saman vegna stöðunnar í Icesave málinu en samkvæmt upplýsingum úr utanríkisráðuneytinu var fremur þungt hljóð í Miliband, sem sagðist vonsvikinn yfir stöðu mála." Heimild

Ólafur Ragnar var gestur Newsnight í gærkvöldi, helsta fréttaskýringarþáttar BBC. Hér er hægt að sjá viðtalið við hann.

Upptöku á öllu innslagi BBC má sjá hér á YouTube (í lélegum myndgæðum en ágætum hljóðgæðum)

Kynning á Evrópusamvinnu í H.Í.

Í fréttatilkynningu frá Iðnaðarráðuneytinu segir: ,,Kynning á tækifærum og styrkjum í Evrópusamstarfi verður haldin á Háskólatorgi fimmtudaginn 14. janúar 2010 kl. 15-18. Þar gefst færi á að hitta fulltrúa evrópskra samstarfsáætlana á Íslandi og kynna sér möguleika á styrkjum og samstarfi á öllum sviðum menntamála, rannsókna, vísinda, nýsköpunar, menningar og atvinnulífs.

Sameiginlegur upplýsingavefur landsskrifstofa og þjónustuskrifstofa Evrópuáætlana er evropusamvinna.is. Þar má finna grunnupplýsingar um allar þær áætlanir og styrkjamöguleika sem Íslendingum bjóðast ásamt tenglum í viðeigandi heimasíður. Evropusamvinnu.is er ætlað að vera fyrsta stopp fyrir þá sem hafa áhuga á Evrópusamstarfi, hvort sem það er til að sækja um styrki eða leita sér upplýsinga og þjónustu, en vita e.t.v. ekki alveg hvar þeir eiga að byrja."

Alla fréttatilkynninguna má lesa á krækjunni hér að neðan

http://www.idnadarraduneyti.is/frettir/frettatilkynningar/nr/2822

Samvinna er betri en sundrung!

Framtíðin er það sem skiptir máli

Andrés Pétursson, formaður Evrópusamtakanna, skrifar leiðara í nýtt eintak Framsýnar, sem gefið er út af fulltrúaráði framsóknarmanna í Kópavogi. Leiðarinn birtist hér með leyfi höfundar:  

Um áramót er mikilvægt að líta um öxl og meta afrakstur ársins. Því miður hefur uppskeran á árinu ekki verið sérstaklega góð. Mikil beiskja og reiði hefur einkennt þjóðfélagsumræðuna og Íslendingar hafa þurft að fara í mikla sjálfsskoðun. Lítil umræða fer hins vegar fram um framtíð Íslands, öll umræðan er um fortíðina eða nútíðina.  En sama hvort við samþykkjum Icesave eða ekki, förum inn í ESB eða ekki, þá þurfum við að auka útflutningsgreinar okkar umtalsvert.  Við verðum að umbylta okkar hagkerfi frá neysluhagkerfi yfir í útflutningshagkerfi. 

Ef við ætlum að halda uppi hér sambærilegum lífskjörum og í nágrannalöndum þurfum við að stokka upp í efnahagslífinu hér. Hættan er að ef tökum þessi mál ekki föstum tökum getum við endað uppi með tvo þjóðfélagshópa.  Styrkleiki íslensk þjóðfélags hefur meðal annars verið að hér er lítil stéttaskipting. Þetta gæti þó verið að breytast ef í gangi verður tvöfalt hagkerfi.  Hluti landsmanna þiggur þá laun í evrum og getur því tekið lán til húsnæðiskaupa á mun hagstæðari kjörum en hinir sem fá greitt í íslenskum krónum. Á einni mannsævi getur munurinn numið fleiri milljónum króna sem evrufólkið greiðir minna í vexti. Er þetta það þjóðfélag sem við viljum sjá hér á landi í framtíðinni?

Ef við getum ekki boðið okkar unga og framtaksama fólki "evrutengd" laun þá mun þetta fólk einfaldlega flytja úr landi.  Nú standa margir foreldrar í þeim sporum að afkomendur þeirra eru á leið frá Íslandi vegna efnahagsástandsins. Vel menntuðum Íslendingum standa  ýmsar dyr opnar í mörgum öðrum löndum vegna EES-samstarfsins og samninga Norðurlandanna á milli. Flestir þessara ungu Íslendinga vilja gjarnan búa á Íslandi en því miður fórst íslenskum stjórnvöldum það fyrir að tryggja undirstöður  efnhagslífsins.. Það leiddi til þess að bankakerfið hrundi og með því töpuðust fleiri hundruð vel launuð störf. Einnig riða mörg önnur fyrirtæki til falls. Þrátt fyrir þessa kollsteypu þráast enn margir stjórnmálamenn við því að horfast í augu við raunveruleikann og tala um að byggja upp landið á nýjan leik með gömlum aðferðum.

Flestir íslenskir og erlendir hagfræðingar hafa ráðlagt íslenskum stjórnvöldum að fljótasta og öruggasta leiðin til að byggja upp traust á íslensku efnhagslífi er að sækja um aðild að Evrópusambandinu og taka upp evru þegar aðstæður leyfa. Hagsmunaðilar í sjávarútvegi og landbúnaði berjast hins vegar eins og ljón gegn þessum hugmyndum því þeir telja að þar með muni þeirra sérhagsmunir verða fyrir borð bornir. Samt sem áður eru flestir á því að ef hagsmunir íslensk almennings sem heild væru hafðir að leiðarljósi væri ekki spurning hvaða niðurstaða yrði ofan á.

En því miður eru það ekki hagsmunir almennings sem eru alltaf hafðir að leiðarljósi. Fyrir skömmu skrifaði verkfræðingur umhugsunarverða grein i Morgunblaðið þar sem hann færði rök fyrir því að við ættum ekki láta kalt hagsmunamat ráð för heldur heitar tilfinningar. Þessi aðili sagði orðrétt í greininni; ,,Það er ekki útilokað að þjóðin kunni frekar að kjósa að hafa aðeins minna á milli handanna en njóti í þess í stað  frelsis og gera sín mistök við og við.“

Það er merkilegt að flestir þeir sem halda þessu fram eru komnir yfir miðjan aldur og hafa komið sér ágætlega fyrir efnahagslega. Eiga flestir fasteignir og skulda lítið. Það er ekki unga fólkið með húsnæðislán  og aðrar sligandi greiðslubyrðar sem heldur þessu fram.  Það fólk mun í stríðum straumi  mun láta kalt hagsmunamat ráða för. Það mun yfirgefa fósturjörðina af því að það getur ekki framleitt fjölskyldum sínum við þær aðstæður sem boðið er upp á Íslandi í dag. Skynsamir menn læra af reynslunni og passa sig á því að gera ekki sömu mistökin tvisvar. Varla getur verkfræðingurinn vonast til að við gerum sömu efnhagslegu mistökin og við höfum gert undanfarin 2-3 ár. Ekki nema að hann vilji að við missum vel menntaða iðnaðarmenn, frumkvöðla og fólk með sérhæfða háskólamenntun til útlanda.

Þetta er fólkið sem  við þurfum til að byggja upp hér nýtt Ísland. Fólk með sérmenntun, fólk með hugmyndir og fólk á þeim aldri sem skapar verðmætin.  Eða viljum við að hér verði eingöngu  börn, gamalmenni og fólk sem af ýmsum ástæðum getur ekki yfirgefið landið.  Það er frekar nöturleg framtíðarsýn.  Látum kalt hagsmunamat en ekki heitar tilfinningar ráða för varðandi  framtíðarstefnu íslensku þjóðarinnar í efnahagsmálum.