Carl Hamilton bjartsýnn á ESB-viðræður

Á RÚV segir: "Carl Hamilton, sem fer fyrir nefnd 16 sænskra þingmanna í heimsókn til Íslands, telur að Evrópusambandið vilji leggja mikið á sig til að ná samningum í aðildarviðræðum Íslands.

Sænsku þingmennirnir eru úr Evrópunefnd og Fjárlaganefnd sænska Ríkisdagsins. Hamilton segir að þeir hafi kynnt sér endurreisn efnahagslífsins, Svíar hafi lánað Íslendingum og vilji fylgjast með. Lánið hafi verið óumdeilt í Svíþjóð. Hann segist bjartsýnn um aðildarviðræður Íslands og Evrópusambandsins.


„Við viljum að Ísland gangi í ESB. Það er engin óvild í því. Við viljum gera allt en skiljum að Ísland verður að vilja vera með, þjóðin þarf að greiða atkvæði um það. Því verðum við að gera aðild aðlaðandi fyrir Ísland þannig að þjóðin samþykki hana í þjóðaratkvæðagrieðslu. Evrópusambandið, rétt eins og við kynntumst á 10. áratugnum, á eftir að gera mjög mikið til að bjóða Íslendinga velkomna. Íslandi á að þykja það velkomið,“ segir Hamilton."

Öll frétt RÚV

Video 

Stuðningur við Evruna eykst - fleiri telja aðild af hinu góða - sterk sveifla yfir á Já-hliðina í könnun Eurobarometer

Á vef Já-Ísland má lesa:

"Íslendingar eru mun jákvæðari í garð aðildar að Evrópusambandinu í nóvember 2010 en þeir voru í maí sama ár.

Í nýrri könnun var spurt hvort aðild að ESB yrði Íslandi til hagsbóta. Um 38% segja að aðild yrði til hagsbóta en 48% að hún yrði ekki til hagsbóta. Sambærilegar tölur frá maí 2010 voru 29% og 58%.

Nú telja 28% aðspurðra að aðild Íslands að ESB væri almennt góð en 34% að aðild væri almennt slæm. Þetta er talsverð breyting frá fyrri könnun en þá voru sambærilegar tölur 19% og 45%.

Á milli kannana eru álíka margir sem telja aðild hvorki góða né slæma eða 32% í fyrri könnuninni en 30% í þeirri síðari.

Þetta kemur fram í könnun ESB Eurobarometer 74 sem var lögð fram í dag. Könnunin sýnir umtalsverða viðhorfsbreytinga Íslendinga í Evrópumálum frá vori 2010 til hausts 2010.

Í báðum tilvikum er um 10 prósentustiga sveifla til jákvæðra frá neikvæðum."

Þá hefur stuðningur við upptöku Evru einni aukist meðal landsmanna:" Nú eru 66% fylgjandi en 28% andvígur. Í maí voru 51% fylgjandi en 41% andvíg," segir á vefnum Já-Ísland.

Á MBL segir um þetta: "Tveir af hverjum þremur Íslendingum eru fylgjandi evrunni sem gjaldmiðli og hefur þeim fjölgað um 15% frá því í síðustu könnun." 

Fjallað er um þetta á helstum frétta miðlum í dag og fróðlegt að bera saman:

Pressan Vísir MBL Eyjan

Nálgast má könnunina hér 

 

Vel mætt hjá Halli Magnússyni

Vel var mætt á fund sem Hallur Magnússon boðaði til með frjálslyndum miðjumönnum í Kópavogi í gærkvöldi. Eins og komið hefur fram hér á blogginu, telur Hallur ástæðu til að mynda vettvang fyrir frjálslynda og miðjumenn í sambandi við ESB-málið.

Sjálfur sagði Hallur sig úr Framsóknarflokknum á sínum tíma vegna óánægju með Evrópuumræðuna innan flokksins.

Meðal þeirra sem sóttu fundinn voru Gísli Tryggvason, talsmaður neytenda, Jónína Bjartmarz, fyrrum umhverfisráðherra, Andrés Pétursson, formaður Evrópusamtakanna og Guðmundur Steingrímsson, þingmaður Framsóknarflokksins.

Fundarmenn töldu og voru sammála um að vettvang sem þennan skorti, en á næstu vikum fer fram undirbúningsvinna að frekari aðgerðum, sem miða að því að stofna með formelgum hætti samtök þar sem frjálsyndar skoðanir á Evrópumálum eiga samastað. 

Ljóst er að Evrópuumræðan er á fleygiferð í samfélaginu, þó önnur mál, sem við virðumst ekki losna við, séu sífellt efst á yfirborðinu. 

 

Sérfæðingar ESB hingað til lands í næstu viku vegna gjaldeyrishafta

Árni Páll Árnason, efnahags og viðskiptaráðherra hét erindi á hádegisfundi hjá Samfylkingunni í dag. Þar rædd hann hagstjórn, efnahags og gjaldmiðilsmál á breiðum grundvelli. Vísum til fréttar á Eyjunni um málið.

Í umræðum á fundinum kom fram að í næstu viku er von á sérfræðingum ESB hingað til lands og miðar heimsókn þeirra að hinni tæknilegu vinnu sem framundan er við afnám gjaldeyrishafta.

Eins og fram hefur komið í fréttum hefur ESB boðið fram aðstoð sína við þá vinnu sem framundan er við afnám gjaldeyrishafta, en um er að ræða ráðgjöf og fleira.

Gjaldeyrishöft voru sett á í kjölfar hruns krónunnar haustið 2008. 

Nýtt Evrópuafl frjálslyndra miðjumanna í fæðingu

Hallur Magnússon, segir á bloggi sínu:

"Undirbúningsfundur vegna stofnunar Evrópuvettvangs frjálslynds miðjufólks verður haldinn í kvöld. Með fundinum er verið að svara kalli fjölmargra á miðju íslenskra stjórnmála sem vilja vinna að framgangi aðildarumsóknar að Evrópusambandinu en eru ekki reiðubúnir til að taka afstöðu til aðildar að Evrópusambandinu fyrr en niðurstöður samningaviðræðna liggja fyrir.

Það eru allir velkomnir á fundinn sem haldinn verður að Digranesvegi 12 í Kópavogi og hefst klukkan 20:00."

Öll færslan

Greinilegt er að það er mikil gerjun í Evrópumálunum þessa dagana! 

ESB-fundur á Akureyri á morgun

Norðlendingar láta ekki sitt eftir liggja í Evrópuumræðunni. Á morgun, miðvikudag 23. febrúar, fer fram fundur Akureyri á vegum bæjarmálafélagsins Pollurinn.

Umræðuefnið er ESB og hagsmunir Eyjafjarðar. Fundurinn fer fram í Deiglunni annað kvöld kl.20.00.

Þar mun Anna Margrét Guðjónsdóttir varaþingmaður fjalla um hagsmuni Norðurlands í Evrópu og Jón Þorvaldur Heiðarsson lektor við HA, fjalla um gjaldmiðilsmál.

Fundarstjóri verður Valgerður Sverrisdóttir, fyrrverandi þingmaður og utanríkisráðherra. 

Allir velkomnir! 

Vilhjálmur Þorsteinsson í Undir feldi um ESB-málið

Vilhjálmur Þorsteinsson var gestur í þættinum Undir feldi á ÍNN um daginn og ræddi þar ESB-málið. Rök hans fyrir aðild eru m.a. þessi, og hann telur þau upp á bloggi sínu:

• Ég byggi afstöðu mína til ESB einkum á því að sambandið sé lýðræðislegur vettvangur 27 þjóða til að taka á sameiginlegum viðfangsefnum.  Þessi viðfangsefni eru þess eðlis að þau ná þvert yfir landamæri.  Dæmi um þetta eru vinnumarkaður og vinnuvernd, fjármálamarkaðir, umhverfismál, loftslagsmál, réttindi neytenda, löggæslumál og svo mætti áfram telja.
• Í dag er aðkoma Íslands að sameiginlegum ákvörðunum Evrópuþjóða nánast engin.  Með aðild hefðum við hins vegar sæti við borðið þar sem reglugerðir og tilskipanir eru samdar og þeim breytt.  Ísland hefði áhrif langt umfram fólksfjölda, m.a. einn fulltrúa af 28 í ráðherraráði ESB og neitunarvald gagnvart breytingum á stofnsáttmálum sambandsins.
• Samstarf þjóðanna gengur ekki út á það að taka auðlindir af einni og færa þær annarri. Um slíkt eru engin dæmi og það mun aldrei gerast.  Fiskistofnar hafa þá sérstöðu að vera „færanleg auðlind“ sem flakkar milli efnahagslögsaga.  Þess vegna er rekin sameiginleg sjávarútvegsstefna í ESB með sjálfbæra stjórnun fiskveiða að markmiði. Ég tel enga ástæðu til annars en að unnt verði að semja um að Íslendingar fari áfram með sjálfbæra stjórnun og nýtingu eigin fiskistofna.
• Stærsta breytingin fyrir okkur við inngöngu í ESB verður á sviði landbúnaðar.  Þá verður í grundvallaratriðum að hverfa frá því að styrkja framleiðslu landbúnaðarafurða með magntengdum styrkjum eða niðurgreiðslum.  (Undanþága er þó gerð fyrir svokallaðan heimskautalandbúnað sem ríkinu verður áfram heimilt að styrkja innan tiltekins ramma.)  Breytingar í þessa átt mun þó þurfa að gera óháð ESB vegna nýrra alþjóðlegra samninga á vegum Alþjóða viðskiptastofnunarinnar (WTO). En í staðinn kemur öflugt stuðnings- og styrkjakerfi dreifðra byggða og sveita, sem hægt verður að sækja í til að styðja uppbyggingu og nýsköpun, t.d. á sviði ferðamennsku, samgöngubóta, umhverfismála, landbóta, varðveislu minja o.s.frv.  Þar eru ýmis tækifæri sem landbúnaðarkerfið og dreifbýlisfólk ætti að skoða með jákvæðum hætti.
• Með aðild að ESB gengju Íslendingar til samstarfs við þær þjóðir sem standa okkur næst menningarlega og pólitískt.  Fullveldi okkar styrktist með aðkomu að mörgum þeim ákvörðunum sem stýra umhverfi okkar.  Mikilvægir praktískir kostir felast síðan í því að losna við krónuna, fá efnahagslegan stöðugleika, lægri vexti og afnám verðtryggingar.

 

Árni Páll um hagstjórn og fleira-hádegisfundur á Sólon á morgun

Minnum á hádegisfund (12.00-13.00) á Sólon á morgun (Bankastræti), þar sem Árni Páll Árnason, efnahags og viðskiptaráðherra, mun tala um hagstjórn og aðild að ESB. Allir velkomnir!

Sjá einnig hér:  

Jón Steindór á Sprengisandi

Jón Steindór Valdimarsson, var gestur í Sprengisandi Sigurjóns M. Egilssonar á sunnudaginn. Þar ræddu þeir meðal annars hinn nýja vettvang Evrópuumræðunnar, Já-Ísland og ýmis atriði er varðar ESB-málið.

Hlustið hér 

Andrés Pétursson: Hundalógík í ESB-umræðu

Formaður Evrópusamtakanna, Andrés Pétursson, skrifar góða grein í Morgunblaðið í dag um rangfærslur í sambandi við ESB og starfsemi þess. Greinin er hér í heild sinni:

 

HUNDALÓGÍK Í ESB-UMRÆÐU

Sumir einstaklingar virðast halda að með því að endurtaka sömu vitleysuna verði hún á einhvern hátt rétt, sérstaklega ef vitleysan er í ómótstæðilegu samhengi við eigin trúarsannfæringu. Það er erfitt að halda uppi málefnalegum rökræðum þegar menn beita þannig hundalógík.

 

Nýleg grein Frosta Sigurjónssonar framkvæmdastjóra í Morgunblaðinu um völd og áhrif innan Evrópusambandsins er af þessum toga. Það er reyndar með ólíkindum að einstaklingur, sem lætur mikið til sín taka í umræðu um kosti og galla aðildar að ESB, skuli bera þetta á borð. Öllum sem hafa áhuga á sannleikanum er ljóst að það eru 27 ráðherrar aðildarríkja ESB (allir með lýðræðislegt umboð sinna aðildarríkja) og Evrópuþingið (hver einasti þingmaður kosinn beinni kosningu af borgurum ESB) sem fara með lykilvöld (lagasetningarvald) innan ESB. Í greininni endurtekur Frosti margar af þeim röngu staðhæfingum sem hann hefur þegar haldið fram bæði í ræðu og riti um stofnanir og skipulag Evrópusambandsins. Þar má til dæmis nefna rökleysuna um að það séu nafnlausir embættismenn í Brussel sem taki flestar ákvarðanir en ekki löglega kjörnir fulltrúar þjóðanna. Einnig að Evrópuþingið sé áhrifalaus stofnun og að það sé framkvæmdastjórn ESB sem hafi í raun löggjafarvaldið. Ég ætla ekki að eyða prentsvertu aftur í allt það sem Frosti heldur fram í grein sinni heldur vísa í fyrra svar mitt í grein í Morgunblaðinu og lesa má á heimasíðunni evropa.is.

 

Frosti eyðir töluverðu púðri í hinn svokallaða lýðræðishalla Evrópusambandsins og dregur af því ákveðnar niðurstöður sem vert er að ræða. Það er rétt að kjörsókn í einstökum löndum er ekki neitt til að hrópa húrra yfir en það má ekki gleyma því að í sumum löndum er kjörsóknin mjög góð. Þar má til dæmis nefna Belgíu og Lúxemborg þar sem kjörsjókn er um 90% og Möltu þar sem kjörsókn er um 80%. Allir þegnar Evrópu hafa hins vegar rétt á því að kjósa, þannig að halda því fram að kjörsókn sé einhlítur mælikvarði á hve mikið lýðræði sé í viðkomandi landi er í besta falli hálfsannleikur. Almenn kjörsókn í Bretlandi er frekar dræm og yfirleitt ekki nema rúmlega 50% þátttaka í almennum þingkosningum. Það þarf því ekki að koma á óvart að þátttaka í Evrópuþingkosningum þar í landi sé líka frekar slök. Sviss er líka gott dæmi um dræma kosningaþátttöku almennings. Í almennum þingkosningum er þátttaka rétt um 40% og í einstaka atkvæðagreiðslum í kantónum fer kjörsókn jafnvel niður fyrir 20%. Samt eru bæði þessi lönd rótgróin lýðræðisríki. Það er því ljóst að kosningaþátttaka er ekki eini mælikvarðinn á lýðræðishefð þjóða.

 

Oft hafa komið fram tillögur um að auka beint lýðræði í Evrópukosningunum en aðildarlöndin hafa verið mjög treg að láta meiri völd yfir til yfirþjóðlegra stofnana. Núverandi fyrirkomulag er því málamiðlun eins og margt annað í samstarfi ríkja Evrópusambandsins. Að halda því fram að ákvarðanataka í sífellt fleiri málaflokkum færist frá lýðræðislega kjörnum þjóðþingum til embættismanna í Brussel er hreinlega ekki rétt eins og því miður margt annað í þessari grein Frosta. Vonandi er andstæðingum aðildar ekki ofviða að ræða kosti og galla Evrópusambandsins og möguleika almennings til að hafa áhrif á störf og stefnu þess án þess að vera með upphrópanir og rangar eða í besta falli vafasamar fullyrðingar um hvernig fyrirkomulagið er í raun og veru.

MBL, 18.2.2011 

 

 

Evru-svæðið:Fjárfestingar aukast!

Dagblaðið The Wall Street Journal segir frá því að fjárfestingar á Evru-svæðinu haldi áfram að aukast.

Alls jókst fjárfesting um rúmlega 26 milljarða Evra, á milli Nóvember og Desember á síðasta ári.

Einnig er jákvæðara hljóð í neytendum, samkvæmt mælikvörðum sem mæla það. Neytendur eru því jákvæðari um þessar mundir en fyrr á þessu ári.  

Það er meðal annars talið tengjast því að mun fleiri hafa fengið atvinnu á síðustu vikum og útlit er fyrir batnandi atvinnuástand. 

Stefán Haukur gestur Spegilsins

Aðalsamningamaður Íslands gagnvart ESB, Stefán Haukur Jóhannesson, var í viðtali í kvöld í Speglinum um ESB-málið.

Hlustið hér 

Dagens Nyheter: Með (í) ESB fyrir Svíþjóð!

Leiðarahöfundur hins virta sænska dagblaðs, Dagens Nyheter, gerir lýðræðis og öryggismál og ESB að umtalsefni í dag. Grunntónninn í leiðaranum er að það styrki rödd Svíþjóðar á alþjóðavettvangi að með aðild að ESB. Landið gekk í sambandið árið 1995, ásamt Finnum og Austurríkismönnum.

Eitt af áhyggjuefnum Svía fyrir aðild var hlutleysi þeirra í varnar og öryggismálum, en landið hefur verið hlutlaust áratugum saman, er til dæmis ekki í NATO.

Skemmst er frá því að segja að aðild Svía að ESB hefur með engum hætti bitnað á hlutleysi þeirra.

Svíar eru hinsvegar í dag þátttakendur í mörgum friðar og öryggisgæsluverkefnum á vegum ESB. Vegna þess að þeir hafa verið beðnir um að vera með eða beðið um það.

Aftur að leiðara blaðsins, en þar segir að Svíar eigi að láta í sér heyra innan ESB, því ESB sé, andstætt Sameinuðu þjóðunum, bandalag 27 lýðræðisþjóða. Blaðið segir það vera ákveðinn galla að stundum taki ákvarðanir of langan tíma, en hvetur til þess að ESB kom til hjálpar á þeim svæðum sem ber mikið á í fréttum þessa dagana, Egyptalandi og Túnis.  

Hægt sé að aðstoða með ýmsum hætti við að koma lýðræði á fót og virðingu fyrir lögum og reglum.

Þá segir einnig í leiðaranum að ESB eigi að láta í sér heyra gagnvart ríkjum sem brjóta mannréttindi og blaðið telur að sameiginleg rödd Evrópu, sem kveður á um lýðræði og frelsi, sé sterkari en bara rödd Svíþjóðar ein og sér. 

 

 

 

BBC: Skráning einkaleyfa gerð einfaldari og ódýrari í ESB

Á vef BBC má lesa að náðst hefur samkomulag innan Evrópuþingsins um að gera útgáfu og skráningu einkaleyfa einfaldari og ódýrari. Meðal annars hefur þetta það markmið að bæta virkni Innri markaðar ESB, sem Ísland hefur jú aðgang að í gegnum EES-samninginn.

Frétt BBC 

Góð heimsókn frá Danmörku: Formaður dönsku Evrópusamtakanna, Erik Boel

Á vefnum www.jáisland.is kemur fram að von er á góðri heimsókn frá Danmörku í næstu viku, en þá mun formaður dönsku Evrópuhreyfingarinnar, Erik Boel, flytja erindi á vegum Já-Ísland, um Evrópumál. Í tilkynningu segir:

"Danir gengu í Evrópusambandið þegar árið 1973. Evrópumálin eru því daglegt brauð í dönsku þjóðlífi og stjórnmálum.

Danir hafa til dæmis fimm sinnum gengið til þjóðaratkvæðagreiðslu um margvíslega þætti tengda Evrópusamvinnunni, síðast árið 2000 um evruna.

Erik Boel er formaður dönsku Evrópuhreyfingarinnar (Europabevægelsen). Hann hefur mikla reynslu og þekkingu á Evrópumálum og umræðunni í Danmörku og hvað er efst á baugi þar.

Erik Boel verður með innlegg í fundaröðinni Fróðleikur á fimmtudegi þann 24. febrúar kl. 17.

Fundurinn fer fram á ensku. Að loknu erindi verða fyrirspurnir og umræður.

Að venju er fundurinn í salnum að Skipholti 50a, 2. hæð."