Formaður Samtaka Iðnaðarins: Landsmenn vilja kjósa - stefna SI óbreytt!

Helgi Magnússon, formaður Samtaka Iðnaðarins, skrifar grein í Fréttablaðið í dag um ESB-málið. Greinin ber yfirskriftina: Landsmenn vilja kjósa. Í greininni segir Helgi til að byrja með: "Tveir af hverjum þremur landsmönnum vilja að Ísland ljúki aðildarviðræðum við Evrópusambandið þannig að unnt verði að efna til þjóðaratkvæðagreiðslu um málið. Þetta kom fram í marktækri skoðanakönnun Fréttablaðsins sem birtist þann 12. september. Þessi niðurstaða er þvert á það sem ýmsir ákafir andstæðingar aðildarviðræðna hafa haldið fram í ræðu og riti. Algengt er að þeir hafi leyft sér að fullyrða að „þjóðin og þingið" séu á móti aðildarviðræðum og því sé við hæfi að slíta þeim hið fyrsta.

Slíkur málflutningur fellur um sjálfan sig ef marka má þessa skoðanakönnun. Samkvæmt henni vilja landsmenn ljúka samningum með sem bestri niðurstöðu fyrir okkur og kjósa svo um málið í heild."

Síðar segir í grein Helga: "Ef Íslendingar velja að hætta við að ná hagstæðum samningum við ESB þá þurfa þeir að gera sér ljóst að með slíkri ákvörðun væri verið að ákveða að standa utan við Evrópusamstarfið næstu árin eða áratugina. Við þurfum að svara því hvort framtíðarsýnin sé sú að notast við íslenska krónu og þá væntanlega gjaldeyrishöft af einhverju tagi til fyrirsjáanlegrar framtíðar. Fátt bendir til þess að krónan muni standa ein og óvarin eftir þær tilraunir sem hafa verið gerðar með hana. Tilraunir sem tókust ekki vel. Veik staða krónunnar átti sinn þátt í hruninu árið 2008. Eða trúa menn því að krónan geti dugað okkur til frambúðar – óvarin?

Ætla má að valið sé um íslenska krónu og væntanlega gjaldeyrishöft eða að efla samstarf við aðrar þjóðir í gjaldmiðlamálum og horfa til alþjóðlegra viðskipta og alþjóðlegs samstarfs í auknum mæli. Gleymum því ekki að Íslendingar hafa óhræddir efnt til samstarfs við stórþjóðir heimsins á vettvangi NATO, Sameinuðu þjóðanna, Norðurlandaráðs, EFTA og EES svo eitthvað sé nefnt.

Ástæða er til að vara við þjóðernishyggju sem stafar af þröngsýni, þekkingarleysi og vantrausti á nútímann og framtíðina. Smáþjóðir hafa áður gengið í ESB og una þar hag sínum vel eins og Lúxemborg, sem hefur verið með frá upphafi, og Malta sem gekk inn fyrir nokkrum árum."

Í greininni leggur Helgi áherlsu á að stefna Samtaka Iðnaðarins í Evrópumálum sé óbreytrt: "Stefnan var áréttuð í tilkynningu frá samtökunum þann 18. ágúst. Þar sagði m.a.: „Ísland hefur sótt um aðild að Evrópusambandinu. Samtök iðnaðarins telja mikilvægt að umsóknarferlinu sé haldið áfram af fullum heilindum og í náinni samvinnu við atvinnulíf og aðra hagsmunaaðila."

Ennfremur: „Samtök iðnaðarins telja engar líkur til að samningur, þar sem veigamiklum hagsmunum verður fórnað, verði samþykktur í þjóðaratkvæðagreiðslu. Af þessum sökum er mikilvægt að ljúka ferlinu með það að markmiði að tryggja hagsmuni þjóðarinnar með sem hagstæðustum samningum til langs tíma."

Öll greinin
 

ESB-getraun á Já-Ísland - Flugmiðar fyrir tvo í verðlaun!

Á Fésbókinni/Fasbókinni hjá Já-Íslandi er að finna skemmtilega getraun, þar sem tveir flugmiðar eru í boði sem verðlaun.

Til að taka þátt, farið hingað! Góða skemmtun.

Guðmundur Gunnarsson á Eyjunni: ESB og kjarabaráttan

Guðmundur Gunnarsson, Eyjubloggari, tekur fyrir ESB og kjaramálin í nýjum pistli þar. Hann segir meðal annars: "Stærsta kjaramál íslenskra launamanna er að finna varanlega lausn á gjaldmiðilsmálum Íslendinga. Við verðum að horfast í augu við þá staðreynd að ef við ætlum að búa áfram við krónuna verður að taka upp mun strangari efnahagsstjórn en ef við tækjum upp Evru. Krónan kallar á mjög digra og dýra gjaldeyrisvarasjóði, sem veldur því að vaxtastigið þarf að vera um 3,5% hærra en það er t.d. í Danmörku.

T.d. má benda á auglýsingar bankanna þessa dagana burtu með verðtrygginguna, í stað þess bjóðum við upp á langtímalán með 6,45% vöxtum. Hér er verið að færa það sem við borguðum með verðtryggingu yfir í annað form, þú greiðir kostnaðinn strax í stað þess að færa hann yfir á seinni hluta lánstímans.

Í löndum sem búa við stöðugan gjaldmiðil eins og t.d. á hinum norðurlöndunum eru langtímavextir frá 2 – 3%. Ef fjölskylda kaupir sér eitt hús á Íslandi og önnur fjölskylda hús í t.d. í Danmörku, er staðan sú eftir 30 ár að íslenska fjölskyldan hefur greitt sem svarar andvirðis rúmlega tveggja húsa, séu greiðslur bornar saman við stöðu dönsku fjölskyldunnar. Þá er eftir að taka inn í dæmið mismun á verðbólgu, sem ætla má að muni um tvö til þrefalt meiri á Íslandi, sem verður gert upp á 5 ára fresti eins bankarnir bjóða í dag .

Menn strika ekki út háa verðbólgu, sveiflur í efnahagslífi, okurvexti, verðtryggingu, hátt vöruverð, slakan kaupmátt og segjast ætla að taka upp laun eins og þau gerast best í nágrannalöndum okkar, henda verðtryggingu og lækka vexti. Það hefst ekki nema með stórbættri efnahagsstjórn landsins. Ef við ætlum að halda áfram í krónuna kallar á það á mun harkalegri efnahagsstjórn en ef við gengjum í ESB.

Allur pistill Guðmundar

Guðni og gosdrykkurinn!

Guðni Ágústsson, fyrrum ráðherra í ríkisstjórn Íslands og formaður Framsóknarflokksins ritaði grein um Evrópumál (!) í Fréttablaðið um helgina. Þar líkir hann ESB við fyrirtæki sem færir okkur ákveðinn gosdrykk! Þetta er umfjöllunarefni dálksins Frá degi til dags í Fréttablaðinu í dag og þar segir:

"Staðreyndir skipta engu
Guðni Ágústsson, fyrrverandi ráðherra Framsóknarflokksins, ritar grein um ESB í Fréttablaðið á laugardag. Guðni fellur þar í sama pytt og margir aðrir þegar kemur að Evrópumálum; staðreyndir hætta að skipta máli. Þannig segir hann: "Stærstur hluti mannafla stjórnarráðsins er undirlagður í vinnu við aðlögunina og kostnaðurinn hleypur á milljörðum króna." Guðni færir engin rök fyrir þessari fullyrðingu, hann trúir því einfaldlega að svo sé, eða veit betur, en beygir sannleikann að málstað sínum."

Og síðar segir: "Rétt skal vera rétt
Nú ber svo við að kostnaður við aðildarviðræðurnar er ekki leyndarmál. Í meirihlutaáliti utanríkismálanefndar um aðildarumsóknina er kveðið á um hver kostnaðurinn verður. Á árunum 2010 til 2012 nemur hann 800 milljónum króna. Viðræðurnar eru innan þessara heimilda. Og að láta sér detta í hug að stærstur hluti starfsmanna stjórnarráðsins sé upptekinn í viðræðunum er í besta falli barnalegt. Það góða fólk hefur nóg annað að gera í vinnunni."

Fundur um gjaldmiðilsmál á vegum sjálfstæðisfélaganna

Sjálfstæðisfélögin munu um næstu helgi efna til fundar í Turninum í Kópavogi gjaldmiðilsmál. Fundurinn verður klukkan tíu næstkomandi laugardagsmorgun.

Þar verður fjallað um þrjá kosti: Einhliða upptöku, krónuna áfram og Evru með aðild að Evrópusambandinu.

Fylgist með! 

Myndin talar sínu máli

Á Eyjunni er svo önnur frétt sem er athygliverð. Eiginlega segir myndin við fréttina allt sem segja þarf.

Árni Páll í DV: Krónan ekki sett á flot

Á vef DV segir , tilvitnun: "Árni Páll Árnason, viðskipta- og efnahagsráðherra, segir að krónan verði ekki sett aftur á flot. „Við þurfum að hafa einhverskonar takmarkanir á frjálsu gengi gjaldmiðilsins,“ segir hann í samtali við Bloomberg-fréttaveituna.

„Eina leiðin sem við getum treyst á að færi okkur algjörlega frjálsan aðgang er með upptöku evrunnar,“ segir í lauslegri þýðingu á ummælum Árna Páls en viðtalið fór fram á ensku. „Peningamálastefnan verður að gera okkur kleift að taka upp evruna ef við ákveðum að gerast aðilar að Evrópusambandinu.“

Talsmenn krónunnar segja hana bjargvætt, en hvar sést þessi stórkostlegi björgunarmáttur? Í hagvaxtartölum? Af hverju er ekki allt hér á blússandi siglingu vegna krónunnar?

Á Eyjunni er frétt þess efnis að Pétur Blöndal, þingmaður Sjálfstæðisflokksins, vilji höftin burt, krónan geti ekki lækkað meira. Við skulum vona að hann sé spámannlega vaxin í sambandi við þetta. Þjóðin þarf ekki og vill ekki annað gjaldmiðilshrun! Eitt er nóg, að eilífu!

Ps. Annars nokkuð magnað hvað menn eru byrjaðir að tala um á hinu háa Alþingi Íslendinga! 

Stefán Rafn á www.jaisland.is: Hvernig þú og ég getum haft áhrif á Evrópusambandið

Á heimasíðu samtakanna Já Ísland er að finna pistil eftir Stefán Rafn Sigurbjörnsson, formann Ungra Evrópusinna, þar sem hann setur fram sína perónulegu sýn á málin. Hann segir meðal annars:

"Tilfinning mín er sú að umræða um Evrópusambandið hér á Íslandi sé mun sjálfhverfari en þekkist annarsstaðar. Umræðan einkennist af okkar eigin hagsmunamálum, sjávarútveg og landbúnaði, og hvernig við gætum hagnast sem mest af samstarfi við Evrópusambandið. Á sama tíma og ég legg áherslu á að standa vörð um hagsmuni okkar gagnvart Evrópusambandinu langar mig til að fordæma umræðuhefð á Íslandi um Evrópusambandið. Ósk mín er að við íslendingar gerumst virkari þátttakendur í umræðu um þróun Evrópusambandsins. Ekki bara aðild íslands að sambandinu.

Sjálfur hef ég tekið virkan þátt á alþjóðlegum ráðstefnum og fundum höldnum af Evrópskum hagsmunasamtökum. Þar má nefna Evrópusamtök framhaldsskólanema (Obessu) og Ungmennasamtök Evrópu (European Youth Forum). Kynni mín af starfsemi þessara samtaka og af þeim færu jafnöldrum mínum sem starfa þar hafa vakið upp grunsemdir um að við á íslandi séum töluvert á eftir í umræðuhefð um eðli Evrópusambandsins. Krakkarnir sem ég hef unnið með hafa risið ofar þröngum þjóðarhagsmunum og einblína mun frekar á hagsmuni einstaklinga þvert á landamæri. Umræðan er á öndverðu meiði hér á Íslandi."

Síðar segir Stefán: "

Á meðan ég fordæmi umræðuhefðina ítreka ég jafnframt mikilvægi lýðræðislegrar þátttöku. Líkt og með umræðuhefðina virðist íslenskt samfélag einskorðast við eigin landsteina. Lýðræðisleg þátttaka innan Evrópusambandsins er möguleg og hún er aðgengilegari en marga grunar.

Mín persónulega reynsla hefur gefið góðan gaum. Ýmisleg íslensk félagasamtök taka virkan þátt í alþjóðastarfi og hafa bein áhrif á stefnu Evrópusambandsins. Fyrr á árinu tók ég þátt í ráðstefnu í Búdapest þar sem ungt fólk fékk að ræða við evrópska stjórnmálamenn um atvinnuleysi ungs fólks í Evrópu og hvaða skref framkvæmdastjórn Evrópusambandsins gæti tekið til að mæta þeim vanda. Niðurstöður samræðunnar voru svo sendar framkvæmdastjórn Evrópusambandsins til umræðu.

Ég hvet sérstaklega ungt fólk til að kynna sér starfsemi æskulýðsfélaga, stúdentahreyfinga, verkalýðsfélaga og stjórnmálaflokka til að kanna hvort ekki sé möguleiki á að taka þátt í alþjóðlegu lýðræðislegu samtali.

Áhrif ungs fólks í hinu hnattræna samfélagi á sér engin takmörk, en við íslendingar þurfum að læra að beisla þá möguleika. Evrópusambandið verður aldrei betra eða verra en fólkið sem tekur þátt í því. Lýðræðisleg ábyrgð er okkar megin. Ef við kjósum að sitja hjá erum við að kjósa okkur lélegt samfélag, hvort sem það er sveit okkar land eða álfa."

Magnús Orri Schram: Almenningur situr eftir

Magnús Orri Schram skrifar áhugaverðan pistil á Eyjuna um þá staðreynd að fjöldi íslenskra (stór)fyrirtæka, eru farin að gera upp í öðrum gjaldmiðlum en íslenskum krónu, flest í Evrum. Magnús skrifar:

"Hvað skyldu eftirtalin fyrirtæki eiga sameiginlegt ? Bakkavör, Actavis, Marel, Alcoa, Samherji, Norðurál, Össur, Landsvirkjun, HB Grandi, Síldarvinnslan, Íshúsfélagið, Þorbjörn, Vinnslustöðin, Hampiðjan, CCP, Vísir, Eskja, Bláa Lónið, Nikita, Latibær, Íslensk Erfðagreining og frá og með næstu áramótum Icelandair. Jú, þessi fyrirtæki og fleiri til, alls 37 fyrirtæki af 300 stærstu fyrirtækjum landsins, eiga það sameiginlegt að hafa horfið úr íslensku krónuhagkerfi og gera nú upp efnahagsreikninga sína í erlendri mynt. Þau hafa gefist upp á sveiflukenndu óvissuástandi og háum vöxtum íslenskrar krónu.

Það vekur athygli að á þessum lista eru 11 sjávarútvegsfyrirtæki með yfir 42% af úthlutuðu aflamarki en samtök þessara fyrirtækja (LÍÚ) berjast með kjafti og klóm gegn því að almenningur fá notið sömu kjara. Útgerðarmennirnir gera upp í evrum og njóta þannig lægri vaxta og minni sveifla en standa svo í baráttunni gegn því að starfsmenn þeirra; fiskvinnslufólk og sjómenn fái sömu kjör."

Síðar segir Magnús: "Almenningur hefur ekki sama valkost og situr eftir með háa vexti og óvissu í rekstri heimila. Það kemur því einkennilega fyrir sjónir að hluti þeirra sem hafa flúið krónuna, berjast gegn því að að almenningur fái einnig að taka upp nýjan gjaldmiðil og njóta lægri vaxta og meira öryggis. Það er forræðishyggja af verstu sort."

Pistillinn í heild sinni 

Valgerður Bjarnadóttir í FRBL: Andstæðingar ESB kæra sig kollótta um staðreyndir

Valgerður Bjarnadóttir, þingmaður, skrifaði grein í Fréttablaðið í dag um ESB-málið, sem hefst með þessum orðum:

"Rýniskýrsla Evrópusambandsins um landbúnaðarmál sem barst utanríkisráðuneytinu í síðustu viku hlýtur að hafa komið einhverjum á óvart. Sérstaklega hlýtur hún að hafa komið þeim á óvart sem hafa haldið því fram að enginn skilningur væri innan Evrópusambandsins á því að Ísland er öðru vísi en löndin sunnar í álfunni. Kannski breytir skýrslan samt engu.

Þeir sem fremstir eru í flokki andstæðinga þess að Ísland verði hluti af Evrópusambandinu kæra sig kollátta um allar staðreyndir sem varða aðildarviðræður og samninga við Evrópusambandið. Þess vegna er svolítið erfitt við að ræða við það fólk, – það snýr öllu á hvolf sem sagt er.

Andstæðingarnir kæra sig kollótta um að framsal fullveldis er miklu meira í EES samningum en við inngöngu í Evrópusambandið. Allar meiriháttar ákvarðanir innan Evrópusambandsins eru teknar í ráðherraráðinu, þar sem ráðherrar aðildarríkjanna eiga sæti.

Flestar þeirra ákvarðana snerta okkur beint, en við höfum ekkert um það að segja þegar þær eru teknar. Við erum ekki einu sinni í byggingunni þar sem fundurinn er haldinn, hvað þá í fundarherberginu. Mér er fullkomlega óskiljanlegt hvernig það getur þótt betri kostur en að vera fullgildur meðlimur sem getur beitt sér í samstarfi ríkjanna. – Skilningsleysi mitt breytir því þó ekki að andstæðingarnir halda áfram hrópum um afsal fullveldis."

Öll greinin

Eldingarmenn vilja ganga í ESB!

Athyglisverða frétt má lesa á vef Bæjarins besta á Ísafirði, en hún hefst svona:

"Stjórn Eldingar, félags smábátaeigenda við Ísafjarðardjúp, hyggst leggja fram tillögu um að gengið verði í Evrópusambandið, á aðalfundi félagsins sem haldinn verður á sunnudag. „Við ætlum að leggja fram þessa tillögu því bæði ríkisstjórn Íslands og Hafrannsóknastofnun vinna gegn landsbyggðinni. Við vonumst til að Evrópusambandið hafi betri skilning á málefnum landsbyggðarinnar og að hagur okkar verði betur borgið þar inni,“ segir Sigurður K. Hálfdánarson, formaður Eldingar. Sigurður segir að stjórn Eldingar vonist til að með inngöngu í ESB, geti smábátaeigendur fengið styrki frá sambandinu þannig að jafnvel verði hægt að lifa af fiskveiðum."

Kuosmanen um reynslu Finna af ESB og leiðina þangað

á www.visir.is stendur: "Það er lykilatriði fyrir Ísland í aðildarviðræðum við Evrópusambandið (ESB) að samninganefndin hafi fá og skýr markmið í viðræðunum, segir Antti Kuosmanen, sendiherra Finnlands hjá Efnahags- og framfarastofnun Evrópu (OECD).

„Það er mikilvægt að vita nákvæmlega hvað þið viljið fá út úr viðræðunum. Samningamennirnir ættu að hafa mjög skýra hugmynd um hvaða bil gæti reynst erfitt að brúa og leggja mesta áherslu á fá, skýr lykilatriði," segir Kuosmanen. Hann var í samninganefnd Finnlands sem samdi um aðild að ESB á árunum 1993 og 1994, og hélt fyrirlestur í Norræna húsinu í gær um þá vegferð."

Síðar segir í fréttinni: "Spurður hvaða mál hafi reynst erfiðust í samningaviðræðum Finna segir Kuosmanen: „Það voru nokkur mál erfið en það erfiðasta varðaði landbúnaðarmál. Framleiðni finnskra bænda er lítil vegna norðlægrar stöðu landsins."

Finnskir bændur þurfi því annaðhvort talsverða niðurgreiðslu eða hátt verð á markaði til að vera samkeppnishæfir. „Áður en við gengum í ESB tryggðu háir innflutningstollar hátt verð. Við þurftum hins vegar að breyta kerfinu með hliðsjón af landbúnaðarstefnu ESB, sem var mjög erfitt viðfangsefni," segir Kuosmanen.

„Lausnin fólst í ýmsum tæknilegum atriðum en þó aðallega í tvennu. Við fengum að nýta okkur ákveðin verkfæri í sameiginlegu landbúnaðarstefnunni af meiri krafti en önnur ríki. Síðan gaf ESB Finnlandi leyfi til að styrkja innlendan landbúnað beint á máta sem önnur ríki máttu ekki."

Össur í DV: Þjóðin vill kjósa um ESB

Utanríkisráðherra Íslands, Össur Skarphéðinsson, skrifar góða grein í DV í dag, fyrirsögnin er: Þjóðin vill kjósa um ESB.

Össur segir: "Skoðanakönnun Fréttablaðsins á mánudaginn sýndi enn og aftur að yfirgnæfandi meirihluti Íslendinga vill ljúka samningaviðræðunum við Evrópusambandið. Í þremur könnunum blaðsins á síðustu 15 mánuðum hefur um 2/3 hluti Íslendinga sagst vilja fá að kjósa um ESBaðild. Skýrara getur það vart verið. Meirihluti íbúa á landsbyggðinni vill ljúka viðræðunum, innan Sjálfstæðisflokksins er hnífjafnt milli stuðningsmanna viðræðna og þeirra sem vilja hlaupa frá miðju verki, og um þriðjungur Framsóknar vill klára málið. Þrátt fyrir mikinn andróður formanna Sjálfstæðisflokks og Framsóknarflokks síðustu daga, og þaulskipulagða tilraun til að safna undirskriftum á netinu gegn viðræðunum, heldur íslenska þjóðin sínu striki. Mikill meirihluti er eftir sem áður sammála um að besta leiðin til þess að taka upplýsta ákvörðun um kosti og galla aðildar sé að sækja um aðild, semja um aðild og leyfa þjóðinni að kjósa. Það er réttlætismál. Það er skynsemi."

Öll greinin

Aðeins 2% kosningabærra skrifað undir áskorun um að leggja ESB-málinu!

Nokkrir stjórnarmenn úr Nei-samtökunum, Heimssýn og aðrir þekktir andstæðingar aðildar Íslands að Evrópusambandinu, hafa komið sér fyrir á netinu og krafist að aðildarumsókn Íslands að ESB verði lögð til hliðar.

Þegar þetta er skrifað hafa aðeins um 4500 manns skrifað undir, eftir um heila viku á netinu! Það er um 1,4% af þjóðinni og um 2% af kosningabærum einstaklingum.

Hljómgrunnurinn virðist því enginn!

Íslendingar vilja sjá aðildarsamning og kjósa um hann. Það er eðlileg krafa og sanngjörn!

Nei-sinnar óttast góðan gang aðildarviðræðna!

Eyjan skrifar: "Össur Skarphéðinsson, utanríkisráðherra, segir það mikla ráðgátu hvers vegna andstæðingum Evrópusambandsins er svo mjög í mun að koma í veg fyrir að þjóðin fái að kjósa um aðildarsamning. Líklegast er að þeir séu hræddir um að viðræðurnar gangi mun betur en búist hafi verið við.

Var ráðherrann í viðtali í Morgunútvarpi Rásar 2 í morgun þar sem Evrópusambandsaðildin var meðal annarst rædd. Sagði Össur þar að viðræðurnar gengju vonum framar í erfiðustu málaflokkunum og Íslendingar fengju hrós fyrir góðan undirbúning viðræðanna."

Versta "sena" Nei-sinnanna: Að aðildarviðræður gangi vel! Segir nokkuð um hugarfar þeirra!