Samherji á fullu í ESB!

Stöð 2 birti áhugaverða frétt um umsvif Samherja í fiskveiðum í ESB-lögsögum (og ríkjum annarra landa).

Eftir fréttina vaknaði spurningin: Eru viðskiptatækifæri fyrir íslenska sjávarútvegsaðila í ESB?

Á vefsíðu Samherja kemur fram að fyrirtækið er m.a. með umsvif í Póllandi, Þýsklandi og Bretlandi. Allt lönd í ESB! Sjá: http://samherji.is/page/operations_abroad

Fram kemur á vefnum: "Overseas operations of the Samherji group are around 70% of the total turnover with Samherji´s ownership of shares in several companies."

Sterkara Ísland: Eðlilegt samningaferli, eins og hjá öðrum!

Eftirfarandi færslu er að finna á vef STERKARA ÍSLAND:

"Það er pínlegt að sjá hvernig andstæðingar aðildar reyna að teygja og toga sannleikann til þess eins að reyna að koma í veg fyrir að Íslendingar fá að kjósa sjálfir hvort þeir vilji aðild að ESB eða ekki þegar samningurinn liggur fyrir.

Í margumræddu minnisblaði um stuðningsaðgerðir Evrópusambandsins við Ísland í umsóknarferlinu kemur nefnilega ýmislegt fram sem andstæðingar hafa alveg sleppt að nefna enda ákaflega óhentugt þeirri mýtu sem þeir eru að reyna að búa til að samningaviðræðurnar séu eitthvað séríslenskt ,,aðlögunarferli að ESB”.

Í fyrsta lagi kemur fram í minnisblaðinu að ,,stuðningur ESB við umsóknarríki er án kvaða eða skuldbindinga þannig að þótt ekkert verði af aðild gerir ESB enga kröfu um endurgreiðslu á styrkjum eða kostnaðarþátttöku…” Jafnframt kemur fram að ,,..mikilvægt er að útfæra verkefni þannig að þau verði gagnleg, óháð því hvort Ísland gerist aðili að ESB eða ekki”.

Í öðru lagi fær Ísland ekki eitt ríkja slíkan stuðning við samningaviðræðurnar eins og andstæðingar hefðu viljað að fólk tryði.  Um er að ræða hefðbundið ferli í samningaviðræðum ríkis við ESB og ef andstæðingar hefðu haft fyrir því að kynna sér hvernig samningaferli ríkis við ESB er háttað hefði þetta ekki komið á óvart.

Í um áratug hafa umsóknar ríki fengið slíka stuðning og hefðu þótt heldur óeðlilegt ef Ísland hefði verið undanskilið stuðningnum. Ekki síst í ljósi þess að umsóknarferlið kallar á mikil vinnu fyrir m.a.  íslenska stjórnsýslu og eins og þekkt er sætir hún miklum niðurskurði eins og annað hér á landi.  Þrátt fyrir þetta kemur fram í minnisblaðinu að stuðningur til Íslands yrðu minni en til þeirra ríkja sem hafa fengið sambærilegan stuðning frá ESB: ,,Ljóst var í upphafi að umfang á stuðningi til Íslands yrði mjög takmarkaður miðað við aðstoð við önnur umsóknarríki, enda ólíkar þarfir hér og á Balkanskaganum.”

Í þriðja lagi er galið að halda því fram að ESB sé í einhverri herferð að innlima Ísland bakdyramegin.  Íslendingar hafa verið aukaaðilar að ESB í nær tvo áratugi og tekið upp löggjöf ESB að miklu leiti án þess að hafa neitt um þá löggjöf að segja.  Sú ,,aðlögun” hefur ekkert með aðildaviðræðurnar að gera – nema það eitt að nú er möguleiki fyrir okkur Íslendinga að taka ákvörðun hvort við viljum verða fullgildur meðlimur í ESB eða ekki.

Andstæðingar aðildar að ESB treysta ekki þjóðinni til að segja nei við aðild þegar öll rök eru komin upp á borðið og leggja nú allt kapp á að taka lýðræðislegan rétt af Íslendingum að við  fáum að kjósa já eða nei þegar samningurinn liggur fyrir.

Við sem erum hlynnt aðild ætlum að halda áfram að treysta því að lýðræðið sé sú leið til að fá úr því skorið hvernig Íslendingar vilja haga framtíð sinni."

Heimild

 

Þór Saari: Fráleitt að draga ESB-umsókn til baka! Björn Valur sammála.

Annar sem telur þessa hugmynd beinlínis FRÁLEITA, er Þór Saari, þingmaður Hreyfingarinnar. Í athugasemd við færslu Marðar Árnasonar um ESB-málið, segir Þór umræðuna vera koman á mjög lágt plan og að "Evrópuhersútspil" Ungra bænda sé besta dæmið. Athugasemd Þórs er í heild sinni svona:

" Sæll Mörður.
Þetta er áhugaverð tillaga og eftir nokkra umhugsum held ég að hún sé mjög skynsamleg. Þótt þetta hljómi vitleysislega í miðjum aðildarviðræðum er umræðan hins vegar komin í hjólför á svo lágu plani að það er beinlínis pínlegt. „Íslenskir bændasynir kvaddir í Evrópuher“ er bara eitt dæmið. Ég mun ekki styðja tillögu um stöðvun aðildarviðræðna og tel hana í raun fráleita. Það mætti hins vegar lýsa eftir rökum þeirra sem telja að við séum á fullri leið inn og reyna að svara þeim rökum og jafnvel koma til móts við áhyggjur þeirra eins og hægt er."

Það virðist nefnilega vera þannig með Nei-sinna að tilfinningarnar séu að bera þá ofurliði vegna þess að:

Landhelgin mun EKKI fyllast af erlendum togurum við aðild

Landbúnaðurinn þurrkast ekki út (hann gæti hinsvegar orðið enn verr úti ef við fáum ekki nothæfan gjaldmiðil!)

Ísland hættir ekki að vera frjáls og fullvalda þjóð (áhrifin muna sennilega aukast, t.d. með áhrifum á löggjöf, sem við annars kyngjum "hrárri" í dag!).

ESB mun ekki taka af okkur auðlindirnar, það hefur hvergi gerst!

En UMSÁTURSMENN, sem sjá skrattann í hverju horni og telja að ESB muni gleypa hér allt kvikt, eru margir og þeir hafa hátt.

Áróður þeirra er einfaldur og höfðar til tilfinninga, eins og "ESB+Ísland = Nei takk"- skiltin sem flettast út um allan bæ sýna og sanna. Þetta er á leikskólastiginu!

Björn Valur Gíslason, þingmaður VG, tjáir sig einnig um málið á Smugunni

Friðrik Jónsson um bægslagang og fleira

Friðrik Jónsson, bloggari á Eyjunni, skrifara áhugaverðan pistil í dag um Nei-sinna,  baráttu þeirra til að umsókn Íslands að ESB verði dregin til baka og Ísland þar með gert að atlægi meðal Evrópuþjóða. Friðrik skrifar:

"Bægslagangur bóksala, fyrrum samlokusala og annarra andstæðinga lýðræðisins gegn aðildarumsókn Íslands að Evrópusambandinu er farin að ganga fulllangt. Fullyrt er að fyrir málinu sé engin meirihlutastuðningur, hvorki hjá þjóð né þingi.

Ansi bratt taka menn sér stóryrði í munn í þessum efnum, samhliða því að okkur, sem treystum þjóðinni til að geta sjálf lagt mat á aðildarsamning, er brigslað um landráð og ódrengskap.

Fyrir skoðunum þjóðarinnar um mótstöðu við aðildarumsókn hafa menn lítið fyrir sér annað en skoðanakannanir, sem sýnt hafa á síðustu tólf mánuðum að skoðun þjóðarinnar sveiflast sitt á hvað eftir dagsumræðunni. Sama virðist hins vegar jafnan upp teningnum, ef spurt er, að þjóin telur sig ekki vita nóg um ESB til að geta tekið afstöðu. Aðildarumsóknarferlið og umræður um kosti og galla aðildarsamnings munu bæta úr því. Þá munu eflaust einhverjir frelsast í báðar áttir, með eða á móti.

Á þingi virðist hins vegar meirihluti fyrir áframhaldandi aðildarviðræðum nokkuð traustur. Sjálfur lék ég mér við að skella núverandi þingmönnum í littla excel-töflu og miðað við þekkta afstöðu þeirra geta í eyðurnar um hvar viðkomandi þingmaður stendur varðandi það hvort halda eigi aðildarviðræðum áfram. Þetta varð mín niðurstaða:"

Afgangurinn!

 

Jón Sigurðsson um sjávaútvegsmál á Pressunni

Jón Sigurðssonn, fyrrum formaður Framsóknarflokksins, ritar grein á www.Pressan.is í dag um ESB-málið, sjávarútveg og sérlausnir Hér er greinin:

Mikið er rætt um undanþágur frá meginreglum Evrópusambandsins og þær taldar skipta máli fyrir Íslendinga. Andstæðingar aðildar Íslands að ESB reyna að skjóta undanþágurnar í kaf. Þessi umræða er full af misskilningi.

Hér skal vikið að nokkrum atriðum sem varða sameiginlega fiskveiðistefnu Evrópusambandsins.

Aðeins eitt atriði sameiginlegu fiskveiðistefnunnar er alfarið í lögsögu sameiginlegra stofnana ESB: Vernd fiskistofna til sjálfbærni. Aðrar meginreglur eru ýmist á skiptu forræði ESB og aðildarríkis eða alveg á forræði aðildarríkis.

Fráleitt er að sameiginleg ákvörðun ráðherraráðs ESB um vernd fiskistofna til sjálfbærni geti orðið andstæð hagsmunum Íslendinga. Ef Ísland verður aðildarríki er það íslenskur ráðherra sem gerir tillögu um heildarafla á Íslandsmiðum byggða á rannsóknum íslenskra vísindamanna og íslenskri reynslu. Engir aðrir hafa hér atvinnuhagsmuna að gæta, reynslu við að styðjast eða frumkvæðisstöðu til að flytja sérstaka tillögu um Íslandsmið.

Regla ESB um stöðug hlutföll og nálægðarregla ESB tryggja forræði og hagsmuni Íslendinga til frambúðar. Þessar reglur tryggja að Íslendingar einir hafa veiðiheimildir á Íslandsmiðum og fara með stjórnun fiskveiðimála á Íslandsmiðum.

Reglur ESB um ráðgefandi svæðisráð tryggja þetta enn frekar. Lega og einkenni Íslandsmiða kalla beint á slíka skipan. Þau eru ekki samlæg við önnur mið ESB, langflestir fiskistofnar eru sérstakir og aðrar þjóðir hafa ekki viðurkennda veiðireynslu á Íslandsmiðum.

Í 349. grein aðalsáttmála ESB eru ákvæði sem tryggja fulla sérstöðu og eigið forræði Azoreyinga, Madeirabúa, Kanaríeyinga og fleiri fjarlægra eyjasamfélaga á sviði sjávarútvegar og landbúnaðar. Í lokagreinum aðalsáttmálans og fylgiskjölum eru nefnd ákvæði aðildarsamninga um ,,hembygdsrätt" heimamanna á Álandseyjum, tómstundahús í Danmörku og margt fleira sambærilegt.

Ákvæði 349.gr. aðalsáttmála ESB og ákvæðin um ,,hembygdsrätt" Álendinga ganga miklu lengra en íslenskar reglur um eignaraðild útlendinga í íslenskum sjávarútvegi. Þessi ákvæði ESB útiloka útlendinga. En íslenska reglan kveður á um heimild til eignaraðildar útlendinga sem nemi 25% beinni eign og 24,9% óbeinni eign eða samtals 49,9%.

Ekkert þessara atriða ESB er undanþága. Öll eru þau hluti af varanlegum skipulagsreglum Evrópusambandsins. Ekki skal gert lítið úr undanþágum, en þær varða yfirleitt miklu smærri málefni. Fyrir hendi eru fordæmi og fyrirmyndir í sjálfum meginreglum ESB um sérlausnir sem hljóta að koma til skoðunar áður en athygli fer að beinast að einhverjum hugsanlegum undanþágum.
(Mynd: Pressan)

 

 

Sprengjubeltamaðurinn játar

Pressan greindi frá því í dag að sá aðili sem stóð í hótunum gagnvart Evrópusinnum á Facebook, hefði játað og að síðan hfði verið fjarlægð.

Frétt Pressunnar: "Lögreglan hefur yfirheyrt og tekið skýrslu af manni sem hafði í hótunum við fund Evrópusinna sem haldinn var fyrr í vikunni. Hótanirnar komu fram á Facebook síðu sem maðurinn stofnaði og vakti mikinn óhug meðal skipuleggjenda fundarins.

Pressan greindi frá því í vikunni að Bryndís Ísfold Hlöðversdóttir, framkvæmdastjóri Sterkara Íslands sem stóð að fundinum, hafi verið mjög brugðið vegna síðunnar, en titill hennar var „Við myndum fórna öllu fyrir Ísland“.

Í samtali við Pressuna fyrir helgi sagðist Bryndís hafa lagt inn kæru hjá lögreglu vegna málsins;

Okkur var illa brugðið sem og fleirum sem bentu okkur á þetta. Það er sorglegt þegar fólk hótar ofbeldi þegar það er orðið rökþrota. Þetta eru miklar öfgar. 

Á meðal þess sem var að finna á síðuni voru hótanir til Evrópusinna og tal um sprengjuárásir;

Brátt munum við birta lista yfir "óvini nýja Íslands", lista yfir réttdræpa landráðamenn, mafíósa, evrópusinna og önnur skotmörk sem þarf að uppræta með öllum tiltækum ráðum...ÁFRAM ÍSLAND ! 

Friðrik Smári Björgvinsson, yfirlögregluþjónn hjá Lögreglunni á höfuðborgarsvæðinu, staðfesti í samtali við Pressuna að lögreglan hefði haft uppi á eiganda síðunnar og að viðkomandi hefði verið yfirheyrður.

Hann var yfirheyrður og af honum tekin skýrsla. Hann viðurkenndi að hann hefði staðið fyrir hótuninni en sagði að um grátt gaman hefði verið að ræða. Hann hafði sjálfur lokað síðunni þegar við ræddum við hann.

Friðrik Smári segir ekki ljóst á þessu stigi hvort ástæða væri til þess að taka málið lengra. Það yrði athugað síðar.

Nei sinnar eru á móti umbótum: Guðmundur Gunnarsson

Guðmundur Gunnarsson Eyjubloggari segir í nýjasta pistli sínum: "Öll vitum við að helsta niðurstaða Rannsóknarskýrslunnar var falleinkunn á íslensku stjórnsýsluna. Ljóst er að þar þarf að taka til það skiptir engu hvort við göngum í ESB eða ekki. Ef við tökum ekki til munum við búa áfram við hinn dýra óstöðugleika sem veldur lækkandi kaupmætti, háum vöxtum og háu verðlagi."

Og hann heldur áfram: "Við sjáum það að málflutning NEI manna að þeir vilja ekki þessar umbætur, enda blasir fara þar fremstir í flokki sérhyggjumenn sem hagnast á því að núverandi ástand verði áfram, svo þeir geti áfram ástundað valdabrölt sitt og eignatilfærslur frá launamönnum til fárra. Afleiðingar þessa blasa við, Ísland hefur tapað efnahagslegu fullveldi og allt undir því að fá lán sem eru niðurgreidd af vinaþjóðum okkar og AGS.

Þeir beita öllum brögðum í bókinni til þess að afvegaleiða umræðuna. Þeir hafa til þess tvo fjölmiðla sem reknir eru að útvegsmönnum og bændaforystunni. En það sem verra er að aðrir fjölmiðlamenn láta ítrekað afvegaleiða sig með fullyrðingum sem blasir við ef málið er skoðað að eru klár endaleysa.

Með þessari stefnu er stefnt að því að Ísland verði láglaunasvæði með gamaldags efnahagsstjórn, háum vöxtum og verðtryggingu. 53% af viðskiptum Íslands fara fram í Evrum, þannig að liðlega helmingur gengisáhættu íslendinga hverfur við upptöku evru. Norska krónan er með 4% af viðskiptum okkar dollarinn 11% og Kanadadollar 1%. En sumir hafa nefnt þessar myntir til þess að komast hjá því að ræða þessi mál á málefnalegan hátt og drepa vitrænni umræðu á dreif.

Innganga í ESB og upptaka evru er ekki skyndilausn eins og NEI-menn hafa haldið fram. Hún er nauðsynleg framtíðarlausn ef við ætlum að losna við óábyrga efnahagsstjórn, þar sem mistök íslenskra stjórnmálamanna hafa endurtekið verið leiðrétt með því að sveifla krónunni með skelfilegum afleiðingum fyrir launamenn. Meiri verðbólgu, hærri vexti og hærra verðlag."

Allur pistill GG

Bændablaðið:Hátt raforkuverð ESB að kenna!

Bændablaðið er komið úr sumarfríi. Í leiðara blaðsins skrifar formaður samtakanna, Haraldur Benediktsson um ESB-umræðuna.

Haraldur kvartar yfir því að umræðan um landbúnað sé oft sérkennileg og hann segir hana viðkvæma, vegna þess að fátt sé mikilvægara en að hafa aðgang að mat. Þessu getum við verið sammála. En þýðir þetta að það megi ekki ræða íslenskan landbúnað? Er hann svona "gullagull" hér á Íslandi, sem á bara að lifa sínu eigin lífi án allrar gagnrýni. Er íslenskt landbúnaðarkerfi kannski bara það albesta í heimi?

Nei, það er nefnilega ekki svo, t.d. er stór hluti íslenskra mjólkurbænda tæknilega gjaldþrota. Hverjum er það að kenna? Og þá vaknar spurningin; geta tæknilega gjaldþrota bændur staðið undir þessu matvæla og fæðuöryggi sem forysta bænda er sífellt að tala um?

Og í leiðaranum gerir Haraldur hækkun á matarverði að umtalsefni og segir að erlend matvæli hafi hækkað um 60% en innlend bara um 20% og spyr hvað vertryggðu lánin okkar væru mikið hærri ef innlendrar búvöru nyti ekki við. Við erum s.s. svo ljónheppin að hafa þetta svona! En það er hinsvegar þá "vondu" erlendu matvælunum um að kenna hvað lánin okkar hafa hækkað!

En Haraldur skautar alveg framhjá því að hér hrundi gjaldmiðillinn og bankakerfið. Blessuð krónan okkar féll um 100%. Með tilheyrandi kostnaði fyrir alla í landinu, þar með talið bændur!

Í lokin spyrðir svo Haraldur saman hækkun að raforkuverði við innleiðingu á tilskipun frá ESB, sem hann segir hafa verið misheppnaða. En er það ESB að kenna að innleiðing á tilskipun sambandsins tókst ekki sem skyldi? Samkvæmt BS ritgerð frá Háskólanum á Bifröst var markið með nýjum raforkulögum 2008 að láta markaðslögmálin ráða meira við framleiðslu á raforkumarkaðnum. Er það ekki frekar okkur sjálfum að kenna hvernig innleiðingin hefur misfarist? Verðum við þá ekki bara að standa okkur betur?

Bændur og bændahreyfingin eru á móti ESB, m.a. annars með þeim sérkennilegu rökum að íslenskur landbúnaður muni hrynja við inngöngu. Það hefur ekki gerst í neinu hinna 27 aðildarríkja ESB. Miklar breytingar hafa orðið á íslenskum landbúnaði síðustu áratugi, án þess að við værum í ESB! Og þessar breytingar mun halda áfram. T.d. eru enn í gangi viðræður innan WTO (World Trade Organisation) um landbúnað og markaðsaðgang, en þær kallast DOHA Þær miða m.a. að því að lækka tolla, til þess að efla og auka viðskipti.  En hér á Íslandi er verið að reisa tollmúra fyrir íslenskan landbúnað!

Bændasamtökin og samtök NEI-sinna, Heimssýn, vinna saman gegn aðild að ESB. Í september í fyrra kom t.d. út fylgiblað eða "kálfur" með Bændablaðinu, þar sem einhliða áróðri Nei-sinna var dreift til bænda. Á forsíðu þakkar Heimssýn ellefu (af 15) búnaðarsamböndum landsins stuðninginn.

Hvernig var þessi stuðningur? Tóku búnaðarsamböndin þátt í kostnaði við gerð þessa rits frá Nei-sinnum? Og var það gert fyrir almannafé? Er hægt að fá upplýsingar um þessa styrki frá búnaðarasamböndunum? Sjást þeir í bókhaldinu? Eða var þetta bara andlegur stuðningur?

Við minnum á hér á þessu bloggi, að Bændasamtökin fá yfir hálfan milljarð á ári frá ALMENNINGI ÍSLANDS til þess að þau geti rekið sig!

Því er það í raun alvarlegt mál ef svona hefur verið farið með almannafé!

 

Sr. Þórir Stephensen: Þeirra eigin orð II

Sr. Þórir Stephensen ritaði fyrir skömmu grein í FRBL, undir fyrirsögninni Þeirra eigin orð II. Í henni víkur Sr. Þórir sér að Birni Bjarnasyni, fyrrum dómsmálaráðherra:

"Umræðan um hugsanlega aðild okkar Íslendinga að ESB er lífleg um þessar mundir. Hún hefur kallað á skoðun heimilda um þau málefni, sem hæst ber í rökræðunni. Ég sagði hér nýlega frá því, að mér hefði fundist bera dálítið á milli þess, sem fram kom í „Tengsl Íslands og Evrópusambandsins", skýrslu Evrópunefndarinnar frá 2007, og málflutningi sumra nefndarmanna undanfarna mánuði. Önnur heimild barst mér nýlega og vakti svipaðar hugrenningar.

Björn Bjarnason skrifaði þetta á „Evrópuvaktina" 28. júní sl.:
„Aðild Íslands að ESB þýðir, að Íslendingar afsala sér forræði á sjávarauðlindinni og gera atlögu að eigin landbúnaði. Fleiri náttúruauðlindir eru í húfi." Hann og fleiri hafa hamast á þessum hræðsluáróðri í greinum sínum þar og víðar.

Við sem aðhyllumst samningaleiðina, höfum undrast skrif þeirra og aðeins hefur verið ýjað að því, að þeir hafi gerst málsvarar sérhagsmuna.
Svo vel vill til, að Björn Bjarnason hefur ekki ætíð talað svona, jafnvel mótmælt skrifum Morgunblaðsins í þessa veru. Það gerði hann í grein 10. mars 1992. Síðan hefur það eitt breyst í sjávarútvegsstefnu ESB, þá EB, að hún hefur heldur færst nær stefnu okkar."

Öll greinin

Getraun: Hver skrifar og í hvaða blað?

ES-bloggið efnir hér með til getraunar. Lesið eftifarandi:

"En af hverju hafa nágranna- og vinaþjóðir okkar, sem við höfum kallað svo, í Evrópu, svona mikla tilhneigingu til að kúga okkur, hvort sem um er að ræða þorsk, makríl eða Icesave?

Það er erfitt að skilja það eða festa hendur á því hvers vegna svo er en liðin saga í samskiptum okkar við þessar þjóðir segir sitt og veruleikinn, sem við stöndum frammi fyrir nú segir sína sögu. Það á að kúga okkur, hvað sem það kostar bæði vegna Icesave og makrílsins. Ætli ástæðan sé ekki helzt sú, að flestar þessara þjóða eru ekki enn búnar að venja sig af því að kúga smáþjóðir ef þær mögulega geta? Við eigum ekki annan kost en að herða varnir okkar. Það er það, sem þjóðir gera, þegar á þær er ráðizt."

Getraunin er:

1) Hver skrifar og

2) Í hvaða blað?

 

Evrópusinnum hótað

Á Íslandi er enginn her. ESB er ekki með her heldur. Þessvegna kom það ritara nokkuð á óvart þegar Pressan.is birti frétt með þessari fyrirsögn:

Er verið að stofna íslenskan skæruliðaher? Evrópusinnar og mafíósar hugsanleg skotmörk

Lesið fréttina alla hér.

Þetta er hinsvegar ekkert grín, heldur dauðans alvara! Er það virkilega orðið svo að Evrópusinnar geti ekki um frjálst höfuð strokið á Íslandi í dag?

Þróun sem þessi er eitt fyrsta merki þess þegar lýðræði þróast í andstöðu sína, þ.e. ógnarstjórn.

Er það makrmið þessara manna?

Samkvæmt annarri frétt í Pressunni hefur málið verið til lögreglunnar.

Af ómálefnalegum sápukúlum. Þortsteinn Pálsson í FRBL

Þorsteinn Pálsson, fyrrum ráðherra, ritar bréf af Kögunarhóli sínum í Fréttablaðið í dag og ræðir þar landsmálin. Hann byrjar á að ræða það sem hann kallar "ómálefnalegar sápukúlur" og á þar við rykið sem Jón Bjarnason hefur verið að þyrla upp að undanförnu. Þorsteinn skrifar:

"Sjávarútvegs- og landbúnaðarráðherra tókst í liðinni viku að láta Evrópuumræðuna snúast um þær staðhæfingar Heimssýnar að umsóknarferlið sé aðlögunarferli. Í því felst sú hugsun að Ísland þurfi að innleiða löggjöf Evrópusambandsins áður en þjóðin fær tækifæri til að greiða atkvæði um hugsanlegan samning.

Veruleikinn er nokkuð á annan veg. Það veit ráðherrann jafn vel og aðrir talsmenn Heimssýnar. Þetta útspil á hins vegar rætur að rekja til þeirrar valdabaráttu sem nú er háð innan VG um völd og ráðherrastóla.

Heimssýnararmar Sjálfstæðisflokksins og Framsóknarflokksins styðja Jón Bjarnason og órólegu deildina í VG í þeim átökum. Með því að ráðherrann hafði engin málefni til að styrkja stöðu sína í þessari baráttu var ákveðið að blása þessa staðhæfingu upp eins og hún væri sönn og sjá hvort það dygði ekki.

Umsókn felur í sér markmið um aðild ef samningar takast. Við stígum þetta skref í þágu eigin hagsmuna. Ísland hefur þegar lagað sig að stærstum hluta regluverks Evrópusambandsins vegna EES-samningsins. Þar eru þó einhver óleyst mál sem þrýst verður á, til að mynda varðandi tölfræði-upplýsingar. Það hefði reyndar gerst óháð aðildarumsókn.

Ugglaust mun koma þar í viðræðunum að Ísland þarf að sýna fram á hvernig það hyggst leysa mál þar sem breytinga er þörf eftir að aðildarsamningur verður samþykktur. Það á hins vegar ekkert skylt við þær fullyrðingar sem Heimssýn og sjávarútvegs- og landbúnaðarráðherrann nota í innanflokksátökunum.

Það lýsir veikleika fjölmiðlunar í landinu að unnt skuli vera að rugla þjóðina í ríminu með ómálefnalegum sápukúlum af þessu tagi."

Hér allur "Kögunarhóll" Þorsteins (Leturbreyting ES-bloggið)

Menn með fullu viti?

Eyjan birti þessa frétt í dag: Jón Baldvin: "ESB- umsókn að skrípaleik. Svona tala menn ekki með fullu viti"

Fréttin er svona: "Jón Baldvin Hannibalsson, fyrrverandi utanríkisráðherra, segir það orðhengilshátt hjá Jóni Bjarnasyni landbúnaðar- og sjávarútvegsráðherra að tala um aðlögunarviðræður í stað aðildarviðræðna við ESB. Hann efast um að ráðherrann viti sjálfur hvað hann sé að fara.

Jón Bjarnason telur að aðlögunarferli sé hafið að Evrópusambandinu. Því hafa þrír ráðherrar í ríkisstjórninni mótmælt og sagt að Jón misskilji ferlið.

Í viðtali á Útvarpi Sögu sagði Jón Baldvin að orðaleikur ráðherrans væri merkingarlaust þras. Hann sagði þessi ummæli ráðherrans og einnig þá skoðun þingflokks Sjálfstæðisflokksins að draga umsóknina til baka vera tilraun til að gera aðildarviðræðurnar að skrípaleik og að svona tali ekki stjórnmálamenn með fullu viti. Jón Baldvin sagði að Vinstri grænir væru vissulega á móti aðild að ESB en að þeir hefðu samþykkt að íslensk stjórnvöld sæktu um aðild og um leið að fara í aðildarviðræður og leyfa svo þjóðinni að skera úr um málið. Við þetta eigi menn að standa, annað sé ótrúverðugt.

Jón Baldvin hefur lengi verið þeirrar skoðunar að hagsmunum Íslands sé betur borgið innan Evrópusambandsins en utan."

 

Svarthöfði fer á kostum um "útlendingafóbíuna"

Svarthöfði DV skrifar um "útlendingafóbíuna" sem næstum tröllríður íslensku samfélagi um þessar mundir og bregst ekki bogalistin, eins og oft áður og heitir pistillinn: VARIST EVRÓPU!

"Svarthöfði hefur alla tíð haft varann á gagnvart ókunnugum. Móðir hans kenndi honum í æsku að tala ekki við ókunnuga, því manni er ókunnugt um hvað ókunnugir geta gripið til ráðs. Svarthöfði þekkir Íslendinga, enda býr hann á landinu. En útlendinga þekkir hann verr og varast þá. 

Hefur Svarthöfði heyrt að í Evrópu sé bændum leyft að mjólka eins mikið og þeir vilja. Mjólk flæðir um víðan völl og veldur mjólkuróþoli í álfunni allri. Svo illa þola þeir mjólkina að þeir þamba skattlaust rauðvínið út í eitt á milli þess sem þeir kaupa bjór í matvöruverslunum. Í Evrópu eru allir ölvaðir.

Suður í Evrópu mun vera svo margt um manninn að innflytjendur troða sér ofan á þá sem búa þar fyrir og standa á herðum þeirra allan liðlangan daginn. Svo sofa þeir ofan á þeim og konunum þeirra vegna plássleysis.

Heyrt hefur Svarthöfði að Evrópubúar þrái fátt heitar en lífsrýmið á Íslandi. Því sammæltust þeir um að rægja íslensku bankana og fella þá með árásum svo þeir gætu narrað þjóðina til lags við sig í gegnum Evrópusambandið. 

Heimildir Svarthöfða herma að í Evrópu séu áform um að stráfella íslenska sauðfjárstofninn og nýta í keböbb. Þar þrífst ekki sauðfé, nema geislavirkt. Þar eru skógareldar á hverju strái.

Frændi Svarthöfða ferðaðist til Evrópu og heyrðist Svarthöfða á áreiðanlegum heimildum hans að ætlun Evrópumanna væri að skrá unga Íslendinga í sameiginlegan Evrópuher sem þenja ætti út landamæri Evrópu til austurs. Eða er tilviljun að bæði Ísrael og Aserbaídsjan séu þátttakendur í Söngvakeppni evrópskra sjónvarsstöðva, þrátt fyrir að teljast (enn) asísk lönd?

Restin er hér

Frændur okkar á Norðurlöndunum í góðum málun innan ESB

Europarameter birti áhugaverðar tölur í í gær en sú stofnun sér um að mæla almenningsálitið í Evrópusambandsríkjunum svo og umsóknarríkjum - því er Ísland í fyrsta sinn þátttakandi.  Í ljós kemur að svo virðist sem frændur okkar Danir séu kampakátir með aðild sína að ESB en 76% þeirra telja áhrif aðildar hafa bætt hag Danmerkur.  Finnar eru hógværari en 54% er þessu sammála fyrir Finnland, 52% Svía eru telja svo aðild hafa bætt hag Svíþjóðar. 

Íslendingar eru öllu svartsýnni á að aðild geti bætt hag sinn en þó telja 29% ESB muni bæta hag Íslands - en eins og fyrr er vert að benda á að það er ágætis útkoma miðað við að enn er alveg óljóst hvernig samningurinn við ESB mun líta út. 

Frændur okkar á Norðurlöndunum virðast því una sínum hag vel innan ESB og ekki virðast dómsdagsspár Nei-sinna á Íslandi hafa ræst hjá þessum vinaþjóðum okkar!

Hér eru slóðin á þessi svör.

Norðurlandaþjóðirnar ánægðar í ESB (spurning QA 10) 

Þegar Danir eru spurðir sömu spurningar kemur í ljós að 76% þeirra segja ESB aðild hafa haft jákvæð áhrif fyrir Danmörk (beneficial) : http://ec.europa.eu/public_opinion/archives/eb/eb73/eb73_fact_dk_en.pdf

Þegar Finnar eru spurðir sömu spurningar kemur í ljós að 54% þeirra segja ESB aðild hafa haft jákvæði áhrif fyrir Finnland:  http://ec.europa.eu/public_opinion/archives/eb/eb73/eb73_fact_fi_en.pdf

Þegar Svíar eru spurðir sömu spurningar kemur í ljós að 52% þeirra telja ESB aðild hafa haft jákvæð áhrif fyrir Svíþjóð : http://ec.europa.eu/public_opinion/archives/eb/eb73/eb73_fact_fi_en.pdf

Meðaltal ESB ríkjanna við þessari spurningu er 53%