Der man und die mauer (Maðurinn og múrinn)

Árið 1989 féll Berlínarmúrinn, sem var tákn kúgunar og ófrelsis. Síðan þá hafa ekki verið reistir fleiri múrar í Evrópu.

Árið 2010 setur Jón Bjarnason á tollmúra til að "vernda" íslenskan landbúnað.

Þetta þýðir að erlendar vörur verða dýrari. Fréttablaðið fjallar m.a. um þetta hér. Jón Bjarnason veit að hann getur stýrt fólki með buddunni!

Þetta er ekkert annað en höft gagnvart íslenskum neytendum, sem eins og annað venjulegt fólk, vill valfrelsi.

Íslenskir neytendur vilja geta valið á milli t.d. íslenskra og danskra kjúklingabringa, án þess að Jón Bjarnason komi þar mikið nærri. Sama má segja um osta.

Við erum með krónu í höftum, en er næsta skref að setja matvælamarkaðinn í höft líka?

Bendum einnig á leiðara í FRBL um þetta mál.

Á hvaða leið er Jóna Bjarnason? Hvert er ferð hans heitið?

Við þurfum að brjóta niður múra, ekki reisa þá!

Jón Steindór: Að semja eða semja ekki

Jón Steindór Valdimarsson, lögfræðingur skrifar grein í Fréttablaðið í dag undir fyrirsögninni Að semja eða semja ekki. Í grein sini segir Jón m.a.:

" Ísland og ESB hófu formlegar samningaviðræður um aðild Íslands að ESB þann 27. júlí 2010. Það er merkur áfangi í samskiptasögu landsins við umheiminn og rökrétt framhald vaxandi samskipta og samvinnu við þau 27 ríki sem eiga aðild að ESB.Loksins er hafið ferli sem mun sýna okkur svart á hvítu hvernig aðild okkar getur verið háttað. Í lok þess mun liggja fyrir samningur sem harðsnúið samningalið okkar mun skila af sér til þjóðarinnar. Þar verða ákvæði um þau atriði sem nú er helst deilt um hér innanlands en enginn veit hvernig verða til lykta leidd í samningnum. Það er næsta tilgangslaust að þræta um slík atriði. Skynsamlegra er að lesa samninginn þegar hann liggur fyrir og þá tekur hver og einn afstöðu til þess hvort einstök ákvæði hans og samningurinn í heild eru fullnægjandi.

Ekki er hægt að meta kosti og galla aðildar nema á grundvelli raunverulegs samnings. Fyrr getur þjóðin ekki gert upp hug sinn um hvort aðild sé hagstæð fyrir framtíð Íslands eða ekki. Þeir sem fullyrða annað og þykjast vita upp á hár hver niðurstaðan verður áður en viðræður hefjast eru ekki sannfærandi.

Það er því grátlegt til þess að hugsa að nú sé róið að því öllum árum af sterkum öflum utan þings og innan að koma í veg fyrir að samningaferlið verði til lykta leitt. Markmið þeirra er að svipta þjóðina réttinum til að eiga raunverulegt val um framtíð sína og sess meðal helstu samstarfs- og vinaþjóða sinna.

Flokkadrættir á Alþingi og gamaldags átök stjórnar og stjórnarandstöðu mega ekki spilla þessu stóra máli sem þjóðin vill ræða og taka afstöðu til með atkvæði sínu þegar samningur liggur fyrir."

Öll grein Jóns

ESB er líka menntun og fræðsla

Nú eru skólar að hefjast um allt land, eftir frábært sumar. Við sem erum að fjalla um Evrópumái einbeitum okkur mikið að efnhags og stjórnmálum, krónum og Evrum og slíku.

ESB er hinsvegar miklu meira heldur en það. ESB kemur mjög mikið að menntun og fræðslu í gegnum allskyns verkefni og áætlanir (sjá hér)

Þessi verkefni snúast um allt möguleg, endurmenntun, menntunartækni, upplýsingatækni o.s.frv.

Undanfarin ár hefur Ísland tekið þátt í um 200 verkefnum sem snúa að menntamálum. Og hver kannast t.d. ekki við orðið ERASMUS?

Önnur síða er www.etwinning.is, sem er t.d. síða um rafrænt skólastarf.

Þar er m.a. þetta að gerast:

Landskeppni eTwinning 2010-2011: Landskeppni eTwinning verður haldin í fimmta sinn skólaárið 2010-2011 og veitt vegleg verðlaun við hátíðlega athöfn að vori eða hausti á komandi ári.

5 ára afmælishátíð eTwinning verður haldin nú í haust – verða m.a. veitt verðlaun fyrir verkefni sem starfrækt voru á síðasta skólaári.

eTwinning-vikur: Í október verða haldnar eTwinning-vikur og ýmislegt gert til hátíðabrigða bæði hér á landi og vítt og breitt um Evrópu – nánari upplýsingar þegar nær dregur. 

Comenius er svo hér

Hvetjum alla sem hafa áhuga á þessu að kynna sér málið!

Til gamans: Listi yfir 100 bestu háskólar í Evrópu

 

Að sýna ekki öll spilin

Andrés Pétursson, formaður Evrópusamtakanna, skrifar grein í Fréttablaðið í dag, þar sem hann svarar Ásmundi E. Daðasyni, foringja Nei-sinna og alþingismanni. Greinin er hér í heild sinni:

AÐ SÝNA EKKI ÖLL SPILIN

Það er mér bæði ljúft og skylt að taka áskorun Ásmundar Einars Daðasonar alþingismanns, um svar vegna ummæla Stefan Fule, stækkunarstjóra ESB um varanlegar sérlausnir fyrir einstök aðildarlönd Evrópusambandsins.  

Ekki veit ég hvort Ásmundur hefur tekið þátt í samningaviðræðum af einhverju tagi  en það er lykilatriði í öllum slíkum viðræðum, ef maður ætlar að ná árangri, að sýna ekki öll spilin í upphafi.  

Stefan Fule er embættismaður og hans skylda er að verja hagsmuni ESB . Það gerir hann ekki með því að lýsa því yfir fyrirfram að eitthvert aðildarland fái sérsamninga. Þá væri hann að bregðast skyldu sinni . Öll lönd hafa hins vegar samið um sérlausnir og fengið lausn á þeim málum sem miklir þjóðhagslegir hagsmunir  eru í húfi.

Það er skemmtileg tilviljun að í sama dag og Ásmundur birti áskorun sína í Fréttablaðinu þá skrifaði Sema Erla Serdar, formaður ungra Evrópusinna, grein í sama blað og svaraði í raun mörgu af því sem Ásmundur velti upp í grein sinni.  Þar fjallar hún um aðlögunarfresti, tímabundnar undanþágur og varanlegar sérlausnir  Ég hvet því ég Ásmund Daða og aðra að lesa þessa grein Semu Erlu.

Það er skrýtin árátta margra Nei-sinna á Íslandi að klifa í sífellu á því að það sé ekki til neitt sem heiti samningaviðræður.  Ef það væri raunin þá myndi Evrópusambandið senda öllum nýjum aðildarlöndum lög og reglur sambandsins og sagt. ,,Þetta er það sem við bjóðum upp á,  ,,take it or leave it“!

Þannig ganga kaupin hins vegar ekki fyrir sig á eyrinni.

Það er staðreynd að Malta fékk yfir sjötíu aðlögunarfresti og undanþágur frá reglum ESB, Svíar og Finnar fengu lausn fyrir heimsskautabúskap sinn, og danska sérákvæðið um kaup erlendra ríkisborgara á sumarbústaðalandi á Jótlandi lifir góðu lifi eftir 35 ár. Staðreyndin er einnig sú að aðildarsamningar einstakra landa hafa meira vægi en stofnsáttmálar ESB. Evrópusambandið getur því ekki einhliða ákveðið að ganga gegn rétti einstakra ríkja.  Þess vegna tek ég undir orð Semu Erlu og hvet Ásmund Einar og aðra að sameinast um að semja sem best um okkar þjóðarhagsmuni. Það verður síðan íslensku þjóðarinnar að meta hvort okkur hafi tekist að ná góðum samningi við Evrópusambandið eður ei.

Stórhættuleg EGG frá EVRRÓPUUUUUUU!

Björgvin Valur, Eyjubloggari, er með skondna færslu um ESB, Ögmund og Jóna Bjarnason:

"Nú þegar Ögmundur Jónasson hefur komið Jóni Bjarnasyni til varnar og greint það svo að ráðherrann sé lagður í einelti, rifjast upp fyrir mér rökin sem Ögmundur brúkaði gegn aðild að ESB í hitteðfyrra.

Hann sagði að maturinn þar væri hættulegur og að maður ætti aldrei að borða linsoðin egg í Evrópu.  Þeim hluta hennar sem er utan Íslands, nánar til tekið.

Því beini ég þeim eindregnu tilmælum til þeirra íslensku bændasona sem verða kallaðir í Evrópuherinn innan skamms, að láta nú eggin í Evrópu alveg eiga sig."

Velsæmi, takk!

Evrópusamtökin vilja af gefnu tilefni minna notendur/lesendur bloggsins að gæta velsæmis í athugasemdum sínum.

Athugasemdir sem ekki uppfylla þau skilyrði eru viðkomandi ekki til sóma og biðjum við þá að halda sig annarsstaðar!

Evru-maðurinn sem kom og hvarf...

Hinn sænski Stefan De Vylder, "Evru-sérfræðinguinn" sem Nei-samtökin fluttu inn fyrir skömmu, kom og fór hljóðlega, vægast sagt.

Hingað kom hann og svaraði 10 spurningum sem Nei-sinnar sendu honum, en sem þeir hefðu alveg bara getað svarað sjálfir!

Hann sagði nei-sinnum allt sem þeir vildu heyra.

En talaði einhver við Stefan? Einhver fjölmiðill? Okkur vitanlega ekki. Sé t.d. nafnið hans slegið inn í gagnasafn MBL kemur ekkert "hit", ekkert finnst!

Undir lok "fyrirlestursins" ráðlagði hann fundarmönnum að selja Evrur og kaupa sænskar krónur, sem er einn af minnstu gjaldmiðlum í heimi (enda Svíar bara 9 milljónir).

Og þá er það spurningin; átti eða á, einhver af þessum fundarmönnum EVRUR?

Mögulega Jón Baldvin, sem var þarna á fundinum, en örugglega ekki Ásmundur Einar Daðason, eða Bjarni Harðarson! 

Ólafur Arnarson: Evran myndi loka fjárlagagatinu

Ólafur Arnarson á Pressunni skrifar um Evruna og málefni tengd henni í nýjasta pistli sínum.  Hann segir m.a: 

"Benedikt Jóhannesson, stærðfræðingur og formaður Sjálfstæðra Evrópusinna, skrifaði pistil skömmu fyrir síðustu Alþingiskosningar og fjallaði m.a. um þann ávinning, sem við Íslendingar munum hafa af upptöku evru. Benedikt miðaði við, að skuldir íslenska ríkisins næmu 1500 milljörðum. Þannig myndi hvert prósentustig vaxta þýða 15 milljarða króna á ári hverju. Benedikt var hófsamur í útreikningum sínum og gerði ráð fyrir, að aðild að myntsamstarfinu myndi skila okkur lækkun vaxta, sem nemur 3 prósentustigum. Það hefði í för með sér sparnað á vaxtakostnaði ríkisins, sem nemur 45 milljörðum, eða nálega þriðjungi fjárlagahallans.

Staðreyndin er sú, að vaxtamunur milli Íslands og evrusvæðisins hefur verið miklu meiri en 3 prósentustig. Raunvextir á Íslandi eru núna nálægt 10 prósent á sama tíma og raunvextir á evrusvæðinu eru undir núllinu. Segjum, að munurinn sé 8 prósentustig. Þá kostar það okkur 120 milljarða á ári að vera með krónu í stað þess að vera aðilar að evrunni. Ef við bætum svo við kostnaðinum, sem fylgir því, fyrir áætlunargerð fyrirtækja og heimila, að notast við handónýta örmynt, sem sveiflast eins og korktappi í stórsjó er ljóst, að varlega er talað, þegar rætt er um að ávinningur okkar af upptöku evru nemi á annað hundrað milljarða.

Þegar við tökum skuldbindingar fyrirtækja og heimila með í reikninginn er augljóst, að kostnaður okkar Íslendinga við það að nota krónu í stað þess að ganga í ESB og taka upp evru hleypur á hundruðum milljarða króna á hverju einasta ári.

Allur pistill Ólafs

Sandkorn frá DV

Eitt Sandkorn í DV í gær var svona:

"Jón Bjarnason landbúnaðarráðherra skrópaði á mikilvægum ríkisstjórnarfundi í gærmorgun. Sama dag birtist hann á forsíðu Morgunblaðs Davíðs Oddssonar og fullyrti að samningaviðræður við Evrópusambandið væru í raun aðlögunarferli.

Þetta er talið undirstrika hversu nærri hjarta Sjálfstæðisflokksins stendur því vinstri græna núorðið, og hversu fjarlægur Ögmundar-armur Vinstri-grænna er Samfylkingunni. Jón hefur fengið þann stimpil frá Davíð að skoðanir hans séu stærsta frétt dagsins."

Jóhann Hauksson um "lævíslegan ESB-áróður"

Jóhann Hauksson, blaðamaður á DV, birtir skemmtilega færslu á bloggi sínu um ESB, sem hann kallar LÆVÍSLEGUR ESB-ÁRÓÐUR. Jóhann skrifar:

,,Ég er ekki viss um að Villta vinstrið í VG geri sér fyllilega grein fyrir því hversu alvarlegur og víðtækur ESB áróðurinn er í landinu. Þó hafa nú Atli Gíslason og Jón Bjarnason landbúnaðar brugðist til varnar. „Kominn tími til að segja stopp,“ segir Jón í málgagni sínu, Morgunblaðinu, í dag. Og það á forsíðu.

Ögmundarflokkurinn og Davíð Oddsson eru sem sagt uppfullir af því að aðildarumsóknin hafi nú breyst í aðlögunarferli með lævíslegum hætti.

Ég veit ekki hvort þeir hafa tekið eftir því, en Veðurstofa Íslands og RÚV taka þátt í áróðrinum og hafa lengi gert átölulaust.

Hvað á það að þýða að Veðurstofa Íslands birtir á eftir veðurspá fyrir Ísland hitastig og veður í helstu borgum Evrópusambandsins en ekki frá öðrum heimshlutum? Er fólk virkilega á kaupi á Veðurstofunni við að útbúa þennan áróður í landsmenn? Og tekur RÚV þátt í heilaþvottinum með því að hleypa Veðurstofunni að á besta tíma sjónvarpsins alla daga ársins?"

Öll færsla Jóhanns

Lífleg umræða!

Margar áhugaverðar greinar hafa birst um Evrópumál að undanförnu, aðallega í Fréttablaðinu. Þar má til dæmis nefna greinar eftir Semu Erlu Serdar, Einar Benediktsson og Jón Steindór Valdimarsson. Evrópusamtökin hafa birt þessar greinar á heimasíðu sinni http://www.evropa.is og hvetjum við alla til að lesa þessar greinar.

En leiðari Ólafs Stephensen ritstjóra í Fréttablaðinu í dag er skyldulesning fyrir hugsandi fólk. Þar tætir hann í sig rök þeirra aðila sem hafa verið að gagnrýna aðildarviðræður og kallað þær ,,aðlögunarviðræður". Ólafur skrifar meðal annars:

,,Það er svolítið spaugilegt að ýmsir þeir, sem nú hlaupa upp til handa og fóta vegna gruns um „aðlögun" hafa sjálfir staðið fyrir slíkri aðlögun, og það án þess að búið væri að sækja um aðild að ESB. Einar K. Guðfinnsson, sem nú vill fund í landbúnaðar- og sjávarútvegsnefnd vegna málsins, lagði til dæmis fram frumvarp um aðlögun íslenzks landbúnaðar að heilbrigðisreglum ESB, sem landbúnaðurinn kunni honum reyndar litlar þakkir fyrir.

Evrópusambandið er svo fyrirferðarmikið á alþjóðavettvangi og samskipti Íslands við sambandið svo mikil, að alls konar aðlögun að reglum sambandsins er og verður nauðsynleg, jafnvel þótt Ísland gangi aldrei í ESB. Þannig hefur verið nokkuð víðtæk samstaða um að náist samkomulag um aukna fríverzlun á vettvangi Heimsviðskiptastofnunarinnar, muni Ísland þurfa að breyta stuðningi sínum við landbúnað til samræmis við það sem gerist í ESB.

Með aðild að Evrópusambandinu hefði Ísland áhrif á alls konar reglur, sem það þarf í dag að laga sig að, þótt það standi utan ESB. Þannig væri hagsmunum Íslands betur borgið. En það vilja þeir auðvitað alls ekki sjá, sem nú hræðast „aðlögunina".

Hægt er að lesa leiðarann á þessari slóð:

 

http://www.visir.is/esb-og-adlogunin/article/2010634279123

Taktu hár úr hala mínum......

Meira af Jóni Bjarnasyni: Félag atvinnurekenda íhugar að kæra Jón. RÚV birti frétt um málið:

"Almar Guðmundsson, framkvæmdastjóri Félags atvinnurekenda segir landbúnaðarráðherra brjóta alþjóðasamninga. Hann reisi allt of háa tollmúra á innfluttar landbúnaðarafurðir með því að verðleggja tollkvóta á innfluttar landbúnaðarvörur hærra en tíðkast hefur. Kaupmenn íhuga að kæra ráðherrann.

Samkvæmt alþjóðalögum ber landbúnaðarráðherra að gefa út ákveðinn kvóta af erlendum landbúnaðarvörum sem bera lægri tolla en aðrar slíkar vörur. Þetta hefur ráðherrann hinsvegar hundsað síðustu misserin og býður kvótann út á hærra verði en áður hefur tíðkast. Þegar þetta bætist við hrun krónunnar er verð á mörgum innfluttum landbúnaðarvörum orðið mjög hátt. Yfir þessu kvarta kaupmenn og beita Félagi atvinnurekenda fyrir sig.

Almar Guðmundsson, framkvæmdastjóri félagsins, bendir á að þetta hafi verið kært til umboðsmanns Alþingis. Í áliti hans komi fram að ráðherra sé að brjóta alþjóðasamninga Íslands með því að bjóða ekki innflutningskvóta með lægri tolli en almennt sé kveðið á um. Íslenskar landbúnaðarafurðir séu frábærar en neytendur vilji val. Verið sé að bregða fæti fyrir erlenda samkeppni og hann veltir því fyrir sér hvað ráðherra myndi gera ef við fengjum sömu viðbrögð við útflutningi okkar. Það skorti í umræðuna að við séum líka í útflutningi og viljum væntanlega að erlend ríki standi við alþjóðaskuldbindingar." (http://www.ruv.is/frett/segir-radherra-brjota-samninga)

Í sögunni um Búkollu hverfur kusa og stráksi er sendur að leita. Vonda tröllskessan hafði tekið hana. Stráksi finnur Búkollu og leysir hana. En stór tröllskessa er á eftir þeim (vondu útlendingarnir). Bregður Búkolla því á það ráð að reisa háar hindranir, sem aðeins "fuglinn fljúgandi" kemst yfir (tollamúrar) til að tefja framgang tröllskessunnar. Kíkjum aðeins á söguna þegar líður að lokum hennar:

"Nú sér karlsson, að skessan muni strax ná sér, því hún var svo stórstíg.

Þá segir hann: "Hvað eigum við nú að gera, Búkolla mín?"

"Taktu hár úr hala mínum, og leggðu það á jörðina," segir hún.

Síðan segir hún við hárið: "Legg ég á, og mæli ég um, að þú verðir að svo stóru fjalli, sem enginn     kemst yfir nema fuglinn fljúgandi."

Varð þá hárið að svo háu fjalli, að karlsson sá ekki nema upp í heiðan himininn.

Þegar skessan kemur að fjallinu, segir hún: "Ekki skal þér þetta duga, strákur. Sæktu stóra borjárnið hans föður míns, stelpa!" segir hún við minni skessuna.

Stelpan fer og kemur með borjárnið. Borar þá skessan gat á fjallið, en varð of bráð á sér, þegar hún sá í gegn, og tróð sér inn í gatið, en það var of þröngt, svo hún stóð þar föst og varð loks að steini í gatinu, og þar er hún enn.

En karlsson komst heim með Búkollu sína, og urðu karl og kerling því ósköp fegin."

Þá er það spurningin eftir allt saman: Tekst Jóni Bjarnasyni að vernda íslenskan landbúnað gegn vondum "erlendum tröllskessum" ?

  

Tveir punktar frá Jónasi

Jónas Kristjánsson, fyrrum ritstjóri tjáir sig stundum um Evrópumál, án þess að nefna mat, en hann er jú alþekktur "matarskríbent". Tvær færslur um ESB-málin eru á bloggi Jónasar núna:

" 24.08.2010
Leigði þremur sömu lóðina
Stjórnsýslan heldur ekki utan um bréf og gögn. Landbúnaðarráðuneytið leigði þremur sömu lóðina í landi Garðyrkjuskólans. Bréf frá þér lenda í svartholi. Þau týnast bara. Þau eru ekki áframsend, ef þau eiga að fara á annan stað. Í Evrópu er allt slíkt undir kontról. Ég sendi þýzku ráðueyti bréf, sem það sendi áfram á réttan stað og sendi mér tilkynningu um það. Þýzk reglufesta er ofvaxin íslenzkri stjórnsýslu. Flestir íslenzkir kontóristar eru pólitísk kvígildi. Slíkt er lítt þekkt í Norður- og Vestur-Evrópu. Þurfum aðild að Evrópu til að losna úr viðjum ónýtrar stjórnsýslu. Það óttast Jón Bjarnason.


24.08.2010
Áttum okkur á eigin öskustó
Viðræður Íslands við Evrópusambandið eru góðar, þótt þær leiði ekki til aðildar. Heilmikil vinna verður lögð í að finna mun á regluverki siðaðra þjóða og óhæfra ráðuneyta á Íslandi. Vonandi verður sitthvað bætt og aukið í okkar skitna regluverki. Okkur vantar evrópska festu í stjórnsýslu, aðild að aldagamalli hefð skrifræðisstefnu meginlandsríkjanna. Við þurfum einmitt það, sem íslenzkir þjóðrembingar vilja forðast: Aðild að evrópskri skynsemi menningarþjóða. Því miður erum við svo heimsk, að við munum fella aðildina. Fáum samt fínt tækifæri til að átta okkur á, að við sitjum í eigin öskustó."

Meira: www.jonas.is

Andrés, Ásmundur og Sema

Nei-sinni nr.1 á Íslandi, Ásmundur Einar Daðason skrifar grein gegn í Fréttablaðinu í dag og beinir henni gegn formanni Evrópusamtakanna, Andrési Péturssyni.  Þar segir m.a.:

" En mig langar til þess að beina mikilvægri spurningu til formanns Evrópusamtakanna og óska eftir málefnalegum svörum. Á blaðamannafundi í Brussel um síðustu mánaðamót kvað Stefan Füle, stækkunarstjóri Evrópusambandsins, upp úr með það að Íslendingar fengju engar varanlegar undanþágur við inngöngu í ESB. Þetta sagði Stefan Füle eftir að Össur Skarphéðinsson utanríkisráðherra hafði tjáð fréttamönnum að Íslendingar þyrftu að fá sérstöðu sína í sjávarútvegi virta með undanþágum. Stækkunarstjórinn tók þá orðið til að fyrirbyggja allan misskilning hvað þetta snerti og sagði að menn yrðu að hafa í huga að ESB veitti ekki varanlegar undanþágur frá lögum sambandsins. Þetta væri alveg skýrt. Svo mælti Stefán. Hvað finnst Andrési um þessar yfirlýsingar Stefáns?"

Hann getur hinsvegar eiginlega fengið öll sín svör í góðri grein eftir formann Ungra Evrópusinna, Semu E. Serdar í sama blaði. Þar gerir hún sérlausnir ESB-ríkja að umtalsefni og segir m.a.:

"Ótal mörg dæmi eru til um slíkt. Til dæmis fengu Pólverjar aðlögunarfrest á gildistöku réttar borgara og lögaðila frá öðrum ríkjum ESB til kaupa á fasteignum og jarðnæði í Póllandi til ársins 2016. Þá gerðu Búlgarar kröfu um tímabundna undanþágu frá reglum sambandsins um hámarkstjöruinnihald í sígarettum og frá álagningu fulls virðisaukaskatts á sígarettur og fengu. En hvað með varanlegu sérlausnirnar (fyrirvara) hans Ásmundar? Standa þær ekki?

Svarið er einfaldlega jú, varanlegar sérlausnir milli umsóknarríkja og ESB halda (í raun verða sérlausnirnar að reglum sem ný og fyrrum aðildarríki gangast undir) Í aðildarviðræðum sínum sömdu Lettar um varanleg sérákvæði um veiðar í Rigaflóa. Þannig óskuðu Lettar eftir sérreglum um veiðar á vissum hafsvæðum og í samræmi við þá ósk voru samdar sérreglur sem takmarka stærð og vélarafl skipa sem heimilt er að veiða og tryggja að samanlögð veiðigeta skipa sem fá að veiða verði ei meiri en sú sem þau höfðu sem veiddu þar fyrir inngöngu Lettlands í ESB."

Öll grein Semu er hér og bendum við Ásmundi hér með á hana. Og lestu nú, Ásmundur!

Það rýkur í kringum Jón!

Óhætt er að sega að það blási hressilega í kringum landbúnaðar og sjávarútvegsráðherra Íslands Jón Bjarnason (mynd). Hann eri í sviðsljósinu og fékk forsíðuna í Mogganum í morgun.

Össur Skarphéðinsson brást hart við ummælum Jóns í því blaði í morgun að nú væri kominn tími til að stoppa aðildarumsókn Íslands að ESB. Mogginn og Jón eiga nefnilega þetta sameiginlegt!

Jón Bjarnason er helsti talsmaður hins óbreytta ástands, Jón Bjarnason vill engar breytingar á Íslandi. Morgundagurinn á að vera EINS og gærdagurinn!

Þrátt fyrir t.d. hörmulega fjárhagsstöðu margra bænda, sem eins og aðrir í þessu landi myndu fá stórbætta (rekstrar)aðstöðu með lægri vöxtum og verðbólgu, ódýrari aðföngum o.s.fr.v. Landbúnaður er jú í eðli sínu rekstur. Almenningur þarf einnig að reka sín heimili!

Ungir jafnaðarmenn hafaa brugðist ókvæða við og krefjast nú afsagnar Jóns Bjarnasonar. Þeir sendu frá þessa ályktun um málið í kvöld:

Ályktun Ungra Jafnaðarmanna

Ungir Jafnaðarmenn bregðast ókvæða við þeim hvatvísu ummælum Jóns Bjarnasonar Landbúnaðar- og sjávarútvegsráðherra þess efnis að íslensk stjórnvöld segi ósatt frá því hvernig samningaferli við Evrópusambandið sé háttað og að ríkisstjórninni beri að draga umsókn um aðild að Evrópusambandinu til baka.
Ítrekuð dæmi eru til um að Jón Bjarnason sé ófær um að starfa jafnfætis ríkisstjórninni og beinlínis þvert á stefnuyfirlýsingu ríkisstjórnarflokkanna, þá má nefna andstöðu hans við uppstokkun innan stjórnarráðsins og tregleika við eflingu nýliðunar og samkeppni í landbúnaðargeiranum. Í ljósi þess krefjast Ungir jafnaðarmenn tafarlausrar afsagnar Jóns Bjarnasonar af stóli Landbúnaðar- og sjávarútvegsráðherra.