Friðrik Indriðason um krónuna í FRBL

Friðrik Indriðason, blaðamaður, skrifaði skemmtilega grein um gjaldmiðilsmál í Fréttablaðið  fyrir skömmu og þar segir hann meðal annars:

"Fyrir hundraðkrónu seðill var hægt að kaupa gotterí í gamla daga sem dugði í hátt í mánuð. Fyrir gervigullsleginn hundraðkall í dag færðu örfá grömm af blandi í poka. Við erum að komast aftur á sama stig og þarna um árið þegar við skárum tvö núll aftan af krónunni. Þá var gaman. Ég man að ég fór til Kaupmannahafnar nokkrum dögum síðar og tókst í fyrsta og eina skipti í minni sögu að skipta íslenskum seðlum í dönskum banka. Gjaldkerinn lét þess getið á sinni þvottekta Kaupmannahafnarmálýsku hve þessir hundraðkrónu seðlar væru fallegir.

Aðdáendur krónunnar segja að hún hafi bjargað okkur í kreppunni og þeir hafa vissulega nokkuð til síns máls. Hinsvegar skil ég ekki alveg hvernig það eru rök fyrir áframhaldandi tilvist hennar. Nema náttúrulega að þessir spekingar viti fyrir víst að hér verði allt í hári og fári í efnahagsmálum og viðvarandi kreppur næstu áratugina eða aldirnar. Þá er gott að hafa krónuna.

Andstæðingar krónunnar benda á að hún er í rauninni handónýt mynt og þeir hafa vissulega nokkuð til síns máls. Þú getur hvergi skipti henni í aðrar myntir nema með skilyrðum í íslenskum bönkum. Dollurum eða evrum er hægt að skipta nær hvar sem er í heiminum án vandræða. Þar að auki setti krónan þúsundir heimila á hausinn þegar hún féll niður úr gólfinu haustið 2008."

Gísli Hjálmtýsson: Þurfum 30.000 ný störf (sem ekki verða til í sjávarútvegi eða landbúnaði)

Á vefnum Jaisland.is stendur:

"Fimmtudaginn 27. október fjallaði Gísli Hjálmtýsson, fjárfestir og fyrrverandi deildarstjóri tölvunarfræðideildar hjá Háskólanum í Reykjavík, um tækifærin sem felast í aðild Íslands að Evrópusambandinu, á opnum fundi hjá Já Ísland. Á fundinum komu margir áhugaverðir punktar fram.

Gísli fjallaði um framtíðarsýn Íslands og nefndi meðal annars að velferðarsamfélagið okkar byggir á sterkum efnahag og á næstu tíu árum þurfum við að búa til 30.000 ný störf, en 50% af þeim verða fyrir háskólamenntað fólk, en sá hópur stækkar hér á landi ört. Verði þetta ekki að veruleika mun mikill fólksflutningur eiga sér stað, en hann verður að stöðva. Í dag bíður unga fólksins lítil og fábreytt atvinnutækifæri, lágt kaup, háir skattar, gjaldeyrishöft og léleg lánskjör.

Þá kom einnig fram að Ísland hefur síðustu áratugi dregist verulega aftur úr bæði Evrópusambandinu og Bandaríkjunum þegar kemur að landsframleiðslu á mann, en það er nauðsynlegt fyrir Ísland að halda í við hina, jafna samkeppnisstöðuna og breyta atvinnulífinu. Við þurfum að „komast frá hrávöruhagkerfi yfir í fjölbreyttan útflutningsiðnað byggðan á þekkingu og sérhæfingu“, en í dag eru mjög fá íslensk fyrirtæki í útflutningi. Þá nefndi Gísli það að það er íslenska krónan sem er stærsta viðskiptahindrunin, en hann talaði um „ruðningsáhrif krónunnar“ sem fela í sér þau áhrif sem krónan hefur, en hún stöðvar erlenda fjárfestingu og gerir útaf við litlu útflutningsfyrirtækin."

Öll fréttin

Dr. Gylfi Magnússon á hádegisfundi á morgun: Evrópa og efnhagsmálin

Í tilkynningu segir: "Gylfi Magnússon, dósent og fyrrverandi ráðherra, mun ræða sviptingar í efnahagslífi Evrópu á næsta hádegisfundi Evrópuvaktar Samfylkingarinnar á morgun, þriðjudaginn 1. nóvember.

Fundurinn er sem fyrr haldinn á efri hæð Kaffi Sólon í Bankastræti en vakin er sérstök athygli á því að hann hefst kl. 12.15 í þetta skiptið og stendur til kl. 13.00. Að loknu framsöguerindi verða opnar umræður og eru fundarmenn hvattir til að taka þátt, láta í ljós sínar skoðanir og bera fram fyrirspurnir. Að vanda verður hádegisverðurinn á viðráðanlegu verði."

Morgunblaðið og Bændablaðið í eina sæng?

Ritari fékk sér kaffi og "meððí" á kaffihúsi einu um síðustu helgi og rakst þar á and-ESB-dagblaðið Morgunblaðið. Eitthvað þótti ritara helgarblaðið vera í þykkara lagi, enda kom skýringin þegar blaðinu var flett.

Inni í Morgunblaðinu var nefnilega kálfur, Bændablaðið! Annað blað sem nánast skrifar ekki eitt jákvætt orð um það sem ESB gerir eða aðhefst!

Bændasamtök Íslands gefa Bændablaðið út og eins alkunna er fá samtökin digra styrki frá íslenska ríkinu á hverju ári. Á síðustu fjárlögum fengu samtökin rúmlega hálfan milljarð króna í beinan styrk frá skattgreiðendum Íslands. Sjá hér.

Landbúnaðarkerfið í heild sinni fær svo um 10 - 11 milljarða á ári frá íslenskum skattgreiðendum.

Fjölmiðill þeirra sem fá hvað mestan styrk frá skattgreiðendum og fjölmiðill þeirra sem hingað til hafa verið hvað mestir stuðningsmenn þess að lækka skatta, ganga því hér saman í eina sæng!

Og það sem sameinar þessa miðla er: Andstaðan gegn ESB!

Gríðarlegt tap hefur verið á Morgunblaðinu síðan fyrrum flokksformaðurinn, forsætisráðherrann og utanríkisráðherrann, Davíð Oddsson, tók við blaðinu, en hann ritstýrir því ásamt Haraldi Johannessen.

En hvað með Bændablaðið? Er tap á því? Hvar eru upplýsingar um afkomu Bændablaðsins? Séu orð á borð við tekjur, afkoma, tap og rekstur lögð við orðið Bændablaðið í Google, kemur ekkert upp!

Er rekstur Bændablaðsins vel geymt ríkisleyndarmál? Eru ársreikningar þess "leyndó" ??

Össur um ESB-málið í DV

Össur Skarphéðinsson, utanríkisráðherra Íslands, skrifaði grein í DV í vikunni um ESB-málið og segir þar meðal annars: "Athyglisvert er að hópi þeirra sem berjast fyrir því að íslendingar, fólkið í landinu, fái ekki sjálft að taka afstöðu heldur vilja hætta við samningagerðina, eru margir af glæstustu fulltrúum gamla íslands. Þeir voru vanir því fyrir tíma hrunsins að ráða því sem þeir vildu. Þeim virðist slétt ama um að það var lýðræðisleg kvörðun Alþingis að veita almenningi ann sjálfsagða rétt að eiga lokaorðið um aðild, þegar samningur liggur fyrir. Þó tímarnir krefjist aukins valds til fólksins, og aukið lýðræði sé ein af niðurstöðum í umræðunum í kjölfar bankahrunsins, þá virðist það eitur í þeirra beinum að þjóðin eigi lokaorðið. Heimssýn hefur breyst í það að vera samtök gegn lýðræði.Góðu fréttirnar eru hins vegar, að þjóðin tekur ekki leiðsögn þeirra lengur. ítrekaðar kannanir sýna, að mikill meirihluti íslendinga vill fá að greiða atkvæði um samning, þegar hann liggur fyrir.
„Þeir sem koma of seint, þeim refsar lífið," voru hin fleygu orð Michaels Gorbachev við Eric Honecker á 40 ára afmæli AusturÞýskalands. Honecker skildi ekki hvað við var átt. Skömmu síðar hrundi Berlínarmúrinn. Gamla ísland vill ríghalda í gömlu múrana og óttast opnun. En íslenska þjóðin vill ráða sér sjálf. Um það snúast Evrópumálin."

Bryndís Ísfold og mánaðarmótin á Eyjunni

Bryndís Ísfold Hlöðversdóttir skrifar góðan pistil á Eyjuna sem hún kallar "Sjálfstæði, takk - öll mánaðarmót" og fjallar þar um efnahagsmál. Hún segir:

"Rúmlega helmingur heimila getur ekki borgað alla reikningana sína um hver mánaðarmót samkvæmt fréttum dagsins.

Launin okkar eru í krónum og það er frábært skv. nóbelsverðlaunahöfum í hagfræði frá því í gær, því þannig var mjög auðvelt að lækka þau.(rosa gott skv. þeim)

Við erum ein þjóða í Evrópu með verðtryggingu á lánunum okkar.(sem hagfræðingarnir í gær vissu ekki allir um)

Matur á Íslandi er sérstaklega dýr.

Unga fólkið vill búa, starfa og læra í ESB. Það langar ekki að verða bændur eða sjómenn enda störfum að fækka þar ekki fjölga. Gott og vel, hér var hrun – ríkissjóður er að batna. En við eigum langt í land. Og þrátt fyrir erfiðleika í Evrópu upp á síðkastið þá er enn himin og haf á milli okkar og ESB ríkjanna.

Nú mala menn um að við megum alls ekki ganga í ESB því þá missum við ,,sjálfstæðið“!?

Ég veit ekki með ykkur en ég upplifi mig ekkert sérstaklega sjálfstæða þegar ég á ekki fyrir reikningunum mínum í lok hvers mánaðar.

Efast um að hér verði hægt að búa og nýta menntun sína ef engin lausn finnst á því að laða hingað erlendar fjárfestingar sem liggja nánast niðri vegna gjaldeyrishaftanna og þeirra staðreyndar að enginn vill eiga viðskipti með myntina okkar.

Ég upplifi mig heldur ekkert sérlega sjálfstæða þegar ég kaupi í matinni og svitna við kassann þegar ég sé hvað matarinnkaupin kosta.

Né heldur þegar ég heyri hvað bekkjafélagar mínir úr náminu í Hollandi eru með í laun."

Jón Sigurðsson um Martin Wolf á pressan.is

Jón Sigurðsson, fyrrum formaður Framsóknarflokksins og Seðlabankastjóri, skrifar áhugaverðar línur á www.pressan.is um Martin Wolf aðalhagfræðing Financial Times, en hann tjáði sig um Evrópumál Íslands á ráðstefnu í Hörpunni fyrr í vikunni. Jón segir: "

Hr. Martin Wolf er aðalhagfræðingur breska stórblaðsins Financial Times. Greinar hans um efnahags- og viðskiptamál eru lesnar um víða veröld og hann nýtur mikils álits fyrir vönduð skrif. Nú hefur Martin Wolf talað um málefni Íslendinga, og á hann er hlustað af athygli.

Martin Wolf segir okkur að halda sem fastast í íslensku krónuna til frambúðar. Hann segist halda upp á litla gjaldmiðla. - Svona getur sá talað sem ekki þarf á krónunni að halda og lítur á hana eins og sjaldgæft frímerki. Veruleikinn er alltannar fyrir okkur sem þurfum að nota hana."

Síðan skrifar Jón: "

"Martin Wolf segir okkur að gengishrun þjóni hlutverkum fyrir þjóðina og telur gengisfellingu tæka aðferð í efnahagsmálum. - Svona getur sá talað sem ekki hefur kynnst verðbólgu og gengisfellingum Íslendinga af eigin raun. Hann getur sjálfsagt ekki ímyndað sér þann vítahring.

Martin Wolf segir að við eigum ekki að ganga í Evrópusambandið enda munum við ekki hafa nokkur áhrif þar. - Engan þekki ég sem heldur að við förum að hafa áhrif þar. En núna fjallar ESB um íslensk málefni án þess að Íslendingar séu einu sinni nálægir til að skýra málstað sinn. Innan Evrópusambandsins getum við myndað bandalög með öðrum smáþjóðum."

Allur pistill Jóns

 

Eyjan: Verður ESB-kosning, kosning um fjárhag fjölskyldna?

Eyjan skrifar:

"„Aðild að ESB varðar leið út úr ógöngum verðtryggingarinnar. Þjóðaratkvæði um ESB verður öðrum þræði kosning um lánaskilmála og fjárhag fjölskyldnanna í landinu,“ segir Jón Sigurðsson, lektor og fyrrverandi viðskiptaráðherra og seðlabankastjóri.

Hann skrifar pistli á Pressuna í dag um stöðu Evrópumála og áhrif skuldakreppunnar í álfunni á afstöðu íslensks almennings til aðildarumsóknarinnar.

Jón segir meðal annars:

„Er evran ekki fráhrindandi? Svar við þessu er neikvætt þar eð utanríkisviðskipti okkar tengjast mest norðurhluta ESB. Bein tenging við gjaldmiðil útflutningsins er lykill að efnahagslegum stöðugleika hér.

Næst verður spurt: Er ESB ekki að breytast í sameinað stórríki? Fátt bendir til þess enda sterk andstaða innan ESB gegn slíku. Um þessar mundir er rætt um sameiginlega umsjá og framfylgju Maastricht-sáttmálans um peningamál sem ríkin undirrituðu fyrir löngu. Heildarumsvif Brüssel-báknsins verða innan við 5% vergrar landsframleiðslu ESB.

Staða Grikkja væri miklu verri en nú er án evru og ESB: hroðalegt gengishrun drökmu og gjaldeyrishöft, ríkisgjaldþrot löngu orðið og fjöldagjaldþrot fyrirtækja og fjölskyldna, enn meira atvinnuleysi og vöruskortur."

Pistill Jóns á Pressunni

Mikil réttindi í krafti Evrópusamstarfs

Eins og komið hefur fram í fréttum voru tveir kaflar teknir fyrir í aðildarviðræðum íslands og ESB um miðjan mánuðinn. þetta voru kaflarnir um Frjálst flæði vinnuafls og Hugverkarétt.

Köflunum var lokað sama dag, enda um ekkert að semja, því lög um þessi mál hafa þegar verið tekin í notkun í gegnum EES-samninginn.

Fyrri kaflinn er í raun ekki lítil mál, en samkvæmt honum geta Íslendingar sótt um vinnu og starfað í öllum löndum Evrópusambandsins og EES. Rétt eins og að sækja um vinnu hér á landi.

Gott dæmi um Evrópusamstarf sem veitir Íslendingum mikil réttindi!

Ólafur Þ. Stephensen um Evrusvæðið - samkomulag í Brussel

Ólafur Þ. Stephensen skrifaði góðan leiðara í Fréttablaðið þann 25.október og fjallar þar um Evrusvæðið og segir meðal annars:

"Við þekkjum orðið vel talið um að allt sé að fara til andskotans á evrusvæðinu, evran muni líða undir lok og allt það. Sumir tala eins og þeir hlakki beinlínis til.
Það getur verið gagnlegt að bregða upp samanburði við önnur öflug gjaldmiðilssvæði. Það gerði Tristan Garel-Jones, fyrrverandi Evrópumálaráðherra í ríkisstjórn Íhaldsflokksins í Bretlandi, í grein í Financial Times í fyrradag.

Hann bendir þar á að á evrusvæðinu í heild sé fjárlagahallinn (meginundirrót vandans sem glímt er við) áætlaður 4,1 prósent af landsframleiðslu á þessu ári og viðskiptajöfnuðurinn (sem segir til um jafnvægið í inn- og útstreymi gjaldeyris) jákvæður um 0,1 prósent. Í Bretlandi sé fjárlagahallinn 8,5 prósent og viðskiptahallinn 2,7 prósent. Skuldir ríkissjóðs séu hærra hlutfall af landsframleiðslu en í sumum verst settu evruríkjunum, til dæmis á Spáni. Í Bandaríkjunum er fjárlagahallinn 9,6 prósent og viðskiptajöfnuðurinn neikvæður um 3,1 prósent.

Samt gera fáir því skóna að dollarinn eða sterlingspundið leggist af fljótlega. Fjölmiðlar heimsins og fjármálamarkaðir eru miklu uppteknari af evrusvæðinu en hlutskipti Bandaríkjanna eða Bretlands (að ekki sé talað um litla krónusvæðið okkar, þar sem fjárlagahallinn var hátt í níu prósent af landsframleiðslu í fyrra og viðskiptahallinn rúm tíu prósent).

Á heildina litið er evrusvæðið í betri málum efnahagslega en ýmis önnur stór hagkerfi. Kreppan liggur í hallarekstri og skuldavanda einstakra ríkja (og ríflegum útlánum banka til þessara sömu ríkja) og þeirri staðreynd að smíði Efnahags- og myntbandalagsins var aldrei kláruð."

SAMKOMULAG NÁÐIST Í BRUSSEL

Í dag (27.10) bárust svo fréttir af öflugu samkomulagi um aðgerðir í efnbahagsmálum Evrópu, sem meðal annars fela í sér mikla aukning á EFSF (Stöðugleikasjóði Evrópusambandsins. RÚV segir meðal annars frá þessu.

Engum blöðum er um það að fletta að fjárhagsleg geta Evrópuríka og ESB er mikil.

And-ESB tillaga kolfelld í breska þinginu

Tillaga um þjóðaratkvæði um samband Bretlands og ESB var kolfelld á breska þinginu í kvöld með 483 atkvæðum gegn 111.

William Hague, utanríkisráðherra Breta,  sagði í samtali við The Guardian að um væri að ræða "ranga spurningu á röngum tíma."

Talsmaður David Cameron sagði í kvöld að það væri best fyrir hagsmuni Bretlands að vera í Evrópusambandinu.

Hið (frjálsa) hrun krónunnar - Evran óhrunin!

Sagt er að nóðbelsverðlaunahafinn Dr. Paul Krugman, sé á leiðinni til landsins í á næstum dögum. Hann er velkominn!

Væntanlega mun hann tala um hagfræði og efnahagsmál. Hann skrifar í pistli að Ísland hafi komið vel út úr kreppunni og ber okkur meðal annars saman við Eistland.

Annarr er orðaval hans í sambandi við gjaldmiðilsmálin hér á landi og það sem gerðist á haustdögum árið 2008, athyglisvert: "Iceland allowed a big depreciation of the krona..."

Leyfði stóra gengisfellingu krónunnar? Hver leyfði hana?

Gjaldmiðilinni, Krónan, hrundi, í frjálsu falli - var einhver sem leyfði það? Réðu menn eitthvað við það?

Í kjölfar þess tóku skuldir landsmanna tröllastökk - það er ekki raunin með almenning í þeim ríkjum sem hafa t.d. Evru sem lögeyri! Og Evran er ekki hrunin - bara svona til að minna á það!

Erlend fjárfesting hefur aukist um 18% frá því Eistland tók upp Evruna - minnum líka á það!

Stefan Füle sannfærður um að hægt verði að taka fullt tillit til sérstöðu Íslands í landbúnaðarmálum

Í Fréttablaðinu þann 20.október birtist frétt um landbúnaðarmál á forsíðu og í henni sagði meðal annars: "

"Štefan Füle, stækkunarstjóri Evrópusambandsins, og Dacian Ciolos, sem fer með landbúnaðarmál í framkvæmdastjórn sambandsins, hafa boðið Jóni Bjarnasyni, sjávarútvegs- og landbúnaðarráðherra, til fundar í Brussel innan skamms. Jón Bjarnason sagði á Alþingi 12. september síðastliðinn að hann væri reiðubúinn að "fara til Brussel og hitta þar hina háu herra og fá beint til mín hvers er verið að krefjast hér í áætlanagerð".

Vísaði Jón þar til kröfu Evrópusambandsins um að fyrir liggi áætlun um hvernig Ísland hyggst hrinda í framkvæmd breytingum á stjórnsýslu og löggjöf um landbúnaðinn til að uppfylla skilyrði ESB, fari svo að aðildarsamningur verði samþykktur í þjóðaratkvæðagreiðslu. Ríkisstjórnin hefur gefið út að engar slíkar breytingar verði gerðar fyrr en kosið hafi verið um hugsanlegan aðildarsamning."

Í fréttinni kom fram að ESB sýnir fullan vilja til þess að taka tilliti til sérstöðu Íslands í landbúnaðarmálum, enda staðreynd að ef til aðildar kæmi, yrði Ísland strjálbýlasta land ESB. Það er óneitanlega sérstaða!

Stefan Füle (mynd) yfirmaður stækkunarmála ESB sagði við Fréttablaðið um Jón Bjarnason: "Við viljum aðstoða hann og samstarfsfólk hans við að útbúa áætlun um hvernig megi laga stjórnsýslu í landbúnaðinum að lögum og reglum Evrópusambandsins. Ég er sannfærður um að þar er hægt að taka fullt tillit til sérstöðu Íslands," segir hann.
 

Ræða Þorsteins Pálssonar á Sjávarútvegssýningunni

Þorsteinn Pálsson hélt ræðu á sjávarútvegssýningunni, sem haldin var um miðjan október. Þar ræddi Þorsteinn Evrópumálin og sagði þar meðal annars:

"Á viðreisnarárunum varð Ísland virkur aðili að Bretton-Woods gjaldmiðlasamstarfinu þar sem breytingar á gengi lutu mjög hörðum reglum Alþjóðagjaldeyrissjóðsins og einhliða ákvörðunarvald Íslands var takmarkað að sama skapi. Einmitt við þær stöðugleikaaðstæður tókst að semja um fyrstu erlendu fjárfestinguna í áliðnaði hér á landi. Þannig hófst nýtt sóknartímabil.

Hækkun á verðgildi krónunnar á fyrsta áratug þessarar aldar stafaði ekki af óvild stjórnenda Seðlabankans í garð útflutningsgreina eins og halda mætti ef rökréttar ályktanir væru dregnar af málflutningi þeirra sem ákafast tala gegn erlendu myntsamstarfi.

Markaðsöflin voru einfaldlega sterkari en fullveldisyfirráð Seðlabankans. Eins réði vantraust á markaði meir um hrun krónunnar en ásetningur Seðlabankans að hjálpa útflutningsatvinnuvegunum með því að setja fjárhag heimila og fyrirtækja í rúst.

Gengishrunið fjölgaði verðminni krónum í bókhaldi þeirra útflutningsfyrirtækja sem nota ríkismyntina í reikningsuppgjöri. Það hefur hins vegar ekki aukið útflutning. Til þess að svo megi verða þarf grundvallarbreytingar á samkeppnisumhverfinu. Það markmið kallar á nýja viðreisnaráætlun og virkara alþjóðlegt samstarf.

Nákvæmlega þetta sá Jóhannes Nordal í byrjun viðreisnar fyrir fimmtíu árum þegar hann skrifaði „að þátttaka í Efnahagsbandalaginu mundi gefa Íslendingum ný og ómetanleg tækifæri til að byggja upp nýjar framleiðslugreinar.“ Fyrir tuttugu árum sagði hann „að nokkur ár hlytu að líða áður en Íslendingar gætu oriðið aðilar að formlegu gengissamstarfi Evrópuþjóða.“ Þessi orð segja þá sögu að í meira en hálfa öld hefur þekking og reynsla vísað veginn í þessa átt.

Veigamikil skref hafa verið stigin til að tryggja þessa hagsmuni. En því fer hins vegar fjarri að okkur hafi tekist að treysta samkeppnishæfni landsins eins og þörf er á. Það gerist ekki sjálfkrafa með aðild að Evrópusambandinu. Á hinn bóginn getur hún auðveldað okkur að ná því marki og verja þá stöðu til lengri tíma. Aðildin er þannig umgjörð um ríka pólitíska og efnahagslega hagmsuni.

Þá er spurt: En setja þeir gríðarlegu erfiðleikar sem evruríkin glíma nú við ekki strik í reikninginn? Svarið er: Jú. Við þurfum að haga viðræðunum í samræmi við þá stöðu. Þau ár sem við höfum til stefnu gefa okkur ráðrúm til þess.

Stundarerfiðleikar breyta hins vegar ekki þeim langtímahagsmunum sem eru í húfi. Jafnvel þó að allt færi á versta veg í Evrópu er blekking að halda að við stöndum þá betur að vígi ein og sér heldur en í sambandi við þær þjóðir sem starkastar eru í álfunni."

Öll ræðan Þorsteins

Björn Bjarna í kynnisferð í Brussel

DV birti í gær Sandkorn þess efnis að Björn Bjarnason, fyrrum dómsmálaráðherra og einn helsti andstæðingur ESB, væri staddur í Brussel til að kynna sér málin. 

Í frétt DV segir: " Björn er jafnframt í framlínu Heimssýnar þar sem hann berst gegn Evrópu. Undanfarna daga hefur hann verið í Brussel til að skoða og skilgreina."

Því má svo bæta við að vefsíða sem Björn heldur úti ásamt Styrmi Gunnarssyni, fyrrum ritstjóra Morgunblaðsins, fékk fyrir skömmu styrk frá Alþingi, sem leiðréttist hér með, í upprunalegri færslu var sagt að styrkurinn væri frá ESB. Beðist er velvirðingar á þessu.