Mikil gagnrýni frá Ríkisendurskoðun á ráðuneyti L og S!

Eins og fram hefur komið styðja Bændasamtök Íslands samtök Nei-sinna, Heimssýn. Og hafa gert í fjölda ára. Það gera það með svokölluðu "sjálfsaflafé", en ekki er alveg á hreinu hvað það er. 

Þetta beinir að sjálfsögðu kastljósinu að rekstri Bændasamtakanna, en vissir þættir hans hafa m.a. verið gagnrýndir af Ríkisendurskoðun(RE). Spilar ráðuneyti landbúnaðar og sjávarútvegsmála inn í (LS).

Í september kom t.d. út skýrsla til Alþingis, frá RE, um framkvæmd búvörusamninga. Þar kemur fram alvarleg gagnrýni á framkvæmd þeirra, en í skýrslunni segir orðrétt:  

,,ÁBENDINGAR TIL SJÁVARÚTVEGS- OG LANDBÚNAÐARRÁÐUNEYTIS

1. RÁÐUNEYTIÐ ÞARF AÐ SINNA BETUR EFTIRLITSSKYLDU SINNI

Áríðandi er að sjávarútvegs- og landbúnaðarráðuneytið herði eftirlit sitt með framkvæmd búvörusamninga og greiðslum vegna þeirra. Ríkisendurskoðun ítrekar mikilvægi þess að uppgjör vegna samninganna fari fram árlega svo að tryggja megi að upplýsingar vegna þeirra séu réttar í ríkisreikningi. Einnig leggur stofnunin áherslu á að ráðuneytið fari reglulega yfir forsendur reikninga og staðfesti þær svo að tryggt sé að greiðslur séu í samræmi við skuldbindingar. 

2. AUKA VERÐUR GAGNSÆI ÚTREIKNINGA

Fjárhæðir greiðslna samkvæmt búvörusamningum hafa verið uppfærðar miðað við verðlagsþróun og aðrar forsendur sem samið hefur verið um sérstaklega. Einnig eru dæmi um að greiðslur vegna uppgjörs fyrri samninga hafi verið bókaðar á gildandi samninga. Ríkisendurskoðun telur að í bókhaldi þurfi að aðgreina eða sérkenna greiðslur vegna eldri samninga. Eins og málum er háttað er erfitt, nema fyrir sérfróða, að átta sig á því hvernig greiðslur vegna búvörusamninga eru samsettar. Að mati Ríkisendurskoðunar þarf sjávarútvegs- og landbúnaðarráðuneytið að tryggja aukið gagnsæi þessara útreikninga þannig að þingmenn, eftirlitsaðilar og almenningur eigi auðveldara með að glöggva sig á þeim. (Skáletrun, ES-blogg) 

3. GERA VERÐUR FORMLEGA SAMNINGA UM ÞÓKNANIR

Ekki hafa verið gerðir formlegir samningar um þær þóknanir sem ríkissjóður greiðir BÍ fyrir umsýslu búvörusamninga. Ríkisendurskoðun telur áríðandi að slíkir samningar verði gerðir."

 

Sem kunnugt er hefur Jón Bjarnason neitað að taka við IPA-styrkjum frá ESB, en markmið þeirra er að undirbúa stjórnsýslu Íslands undir mögulega aðild.

Með þeim er t.d. hægt að bæta þetta sem hér er rætt að ofan, sem og margt annað í íslenskri stjórnsýslu, sem fékk SVÍÐANDI gagnrýni í Rannsóknarskýrslu Alþingis og síðar í Atla-skýrslunni svonefndu. En Jón Bjarnason segir NEI!

IPA-styrkirnir eru veittir burtséð frá því hvort af aðild verður eða ekki og ESB mun ekki krefjast endurgreiðslu á þeim. En Jón Bjarnason segir NEI.

Við lestur skýrslu RE læðist að manni grunur um að ekki sé allt með felldu í sambandi við þessi mál! 

 

Ólína Þorvarðardóttir: Vill skoða Bændasamtökin

Ólína Þorvarðardóttir vill kíkja á Bændasamtökin í kjölfar frétta um stuðning þeirra við NEI-samtökin, Heimssýn. Í pistli á bloggi sínu segir Ólína:

,,Bændasamtökin hafa árum saman starfað fyrir opinbert fé. Já, það hefur af einhverjum ástæðum þótt eðlilegt að hluti af skattfé almennings rynni í það að halda uppi hagsmunasamtökum bændastéttarinnar. Rökin fyrir því hafa sjálfsagt hljóðað eitthvað á þá leið að íslenskur landbúnaður ætti undir högg að sækja, það þyrfti að styðja íslenska bændur í því að halda uppi byggð í landinu … eða hvað veit ég. Í seinni tíð hafa verkefnasamningar legið til grundvallar (a.m.k. einhverju af) ríkisframlaginu, en hrædd er ég um að eftirlit með því hvernig fjármununum er varið sé (a.m.k. stundum) í hálfgerðu skötulíki.

Jæja, samtökin hafa hingað til ekki talið sig of haldin af þessum framlögum. Kannski það sé nú að breytast. Þau virðast a.m.k. ekki telja eftir sér að halda uppi öðrum samtökum sem berjast gegn inngöngu Íslands í ESB . Ríkisútvarpið hefur nú greint frá því að Bændasamtökin styðja hreyfinguna Heimssýn með beinum fjárframlögum og leyfa henni að auglýsa frítt í Bændablaðinu."

Síðan skrifar hún: ,,Nú held ég það sé tímabært að endurskoða hin opinberu framlög til Bændasamtakanna, á grundvelli opinberrar úttektar á fjárreiðum samtakanna. Meðal þess sem þarft væri að skoða er hvernig verkefnasamningum þeirra við ríkið hefur verið framfylgt."

Lífleg umræða er um málið í tengslum við pistil Ólínu.

(Mynd: www.visir.is)

Ögmundur Jónasson vill FLÝTA viðræðum við ESB!

Snúningarnir í ESB-málinu verða æ villtari.

Í viðtali við Stöð tvö í kvöld sagðist Ögmundur Jónasson (mynd: Alþingi) vilja flýta ESB-viðræðunum! Við tökum okkur það bessaleyfi að birta alla fréttina af www.visir.is 

,,Ögmundur Jónasson, ráðherra innanríkismála, vill að aðildarviðræðum við Evrópusambandið verði flýtt og niðurstöður þjóðarinnar liggi fyrr fyrir. Þetta sagði Ögmundur Jónasson í viðtali við Heimi Má Pétursson fréttamann Stöðvar 2 í kvöld.

„Ég hef hvatt til þess að þessum viðræðum verði flýtt. Við fáum niðurstöður fyrr en rétt undir lok kjörtímabilsins og fáum niðurstöðuna á borðið og setjum hana fyrir þjóðina. Ég held að það sé hægt að flýta þessu ferli og koma þannig til móts við þær kröfur sem hafa risið innan vinstri hreyfingarinnar - græns framboðs," segir Ögmundur.

Ögmundur segist ekki vera viss um að það sé meirihluti fyrir því í þinginu að draga til baka aðildarumsókn að Evrópusambandinu. „Ég hef ekki breytt minni afstöðu svo dæmi sé tekið," sagði Ögmundur. Hann lagði áherslu á að hann vildi hlusta á varnaðarorð sem hafa komið upp um að Ísland sé komið í aðlögunarferli. Sér lítist ekki á ef svo sé raunin."

Er þetta sami maðurinn sem birti í ágúst um daginn grein sem hét Virkisturn í norðri í Morgunblaðinu?

Eru einhverjar fléttur í gangi eða?

 

Katrín um 100-manna auglýsinguna

Á Eyjunni segir: ,,Katrín Jakobsdóttir, varaformaður Vinstri grænna, segist ekki túlka auglýsingaherferð með áskorun á flokksforystu VG sem vantraust á forystuna. Bendir hún á að forysta flokksins hafi í einu og öllu fylgt samþykktum flokksins með því að styðja umsóknarferli, sem síðan yrði lagt í dóm þjóðarinnar." Öll fréttin

(Mynd: Alþingi)

Evrópuvaktin á "afturlappirnar"!!

Evrópuvaktin rís upp á "afturlappirnar" vegna fréttar kvöldsins um bandalagið á milli Heimssýnar og Bændasamtakanna.

Þar er "frétt" um að RÚV og Stöð tvö hafi gert atlögu að Heimssýn og Bændasamtökunum. Í inngangi fréttarinnar segir:

,,Samfylkingin og ESB-aðildarsinnar hafa blásið til sóknar með aðstoð fréttastofu RÚV og Stöðvar 2 sunnudaginn 31. október. Í kvöldfréttatímum beggja stöðva var flutt efni, unnið á þann veg, að greinilega átti að gefa hlustendum þá mynd, að óeðlilega væri staðið að málum af hálfu þeirra, sem eru andvígir aðild Íslands að ESB. Tilgangur fréttanna var að veitast að starfi Heimssýnar."

Var ekki bara sannleikurinn sagður? Voru ekki settar fram staðreyndir? Hvaða viðkvæmni er þetta?

,,Sannleikanum er hver sárreiðastur," segir máltækið.

Ps. Svo má Evrópuvaktin alveg geta myndheimilda endrum og sinnum. Myndin sem notuð er með fréttinni er því frá Evrópusamtökunum! Hún birtist fyrst hér á blogginu í þessum pistli.

Hvað er sjálfsaflafé bænda?

Fréttin um stuðning Bændasamtakanna við samtök Nei-sinna, Heimssýn, vekur athygli. Lykilorð í fréttinni er SJÁLFSAFLAFÉ bænda.

Eins og kunnugt er fá Bændasamtökin um 500 milljónir á ári frá ríkinu til reksturs samtakanna.

Er sjálfsaflafé félagsgjöld bænda eða umsýsluþóknun samtakanna fyrir að sjá um styrkjakerfið?

Kemur það ekki frá ríkinu (les almenningi?).

Hvað tekna afla Bændasamtökin sjálf?

Gaman væri að heyra frá lesendum bloggsins um þetta mál!

Þetta þarf að komast upp á yfirborðið - verða gagnsætt.

En það er einmitt markmiðið með þeirri "aðlögun" sem menn eru að tala um í sambandi við ESB-aðildina.

Það er, að hætta öllum feluleik!

Heimssýn á spenanum hjá Bændasamtökunum!

Hin ríkisreknu Bændasamtök Íslands veita NEI-sinnunum í Heimssýn beinan fjárstuðning og gefa þeim ókeypis auglýsingapláss í Bændablaðinu. Þetta kom fram í kvöldfréttum RÚV.

Í viðtali sagði bændaleiðtoginn, Haraldur Benediktsson að EKKI væri um svokallað ,,sjálfsaflafé" væri að ræða. Hvaða tryggingu höfum við fyrir því að svo sé?

Og það mætti spyrja hvað Bændasamtökin hafi styrkt Heimssýn mikið frá stofnun samtakanna, snemma á þessum áratug? Og hvað hafa þeir gefið þeim mikið auglýsingapláss? Það er nú aldeilis ekki ókeypis!

Heimssýn og Bændasamtökin berjast fyrir óbreyttu ástandi á Íslandi, háu matvælaverði, háum vöxtum og almennt vondri stöðu neytenda. 

Enda kom það fram í Fréttablaðinu í gær að Heimssýn er ekki með neina neytendastefnu og í raun bara með eitt mál á dagskrá og  það er NEI við ESB.

Þetta styðja bændur Íslands með ráðum og dáð! Af hverju slá ekki þessi samtök sér bara saman og skýra sig....t.d. FRAMSÝN (en það eru að vísu stéttarfélögin í Þingeyjarsýslu...þanng að það gengur ekki!). Þetta var bara hugmynd!

Frétt RÚV

 

Andri Geir: Nei við ESB = Unga kynslóðin burt - til ESB?

Viðtalið við Andra Geir Arinbjarnarson í Silfri Egils í dag hefur vakið athygli. Í því sagði hann að ef sagt verður nei við ESB-aðild muni yngir kynslóðir segja "Nei" við sína foreldra og flytja til ESB. Eyjan fjallar um þetta og þar segir: ,,Yngri kynslóðir munu segja „nei“ við foreldra sína og flytjast til Evrópusambandsins ef eldri kynslóðir segja „nei“ við aðild að sambandinu. Næsta kynslóð mun þá einfaldlega leysa sína stöðu sjálf með því að fara úr landi og flytjast til ESB.

Þetta sagði Eyjubloggarinn Andri Geir Arinbjarnarson í Silfri Egils í dag, en Andri Geir hefur verið afkastamikill þjóðfélagsrýnir eftir hrun.

Andri Geir sagðist gera sér grein fyrir að aðild að Evrópusambandinu væri í dag minnihlutaskoðun á Íslandi. En hann segir að sum stjórnmálaöfl séu andvíg ESB-aðild án þess að vita hvað „nei við ESB“ þýði. Með nei-i vanti algerlega svör við mikilvægustu spurningunum í uppbyggingunni, s.s. stefnu í gjaldmiðlamálum, stefnu í atvinnumálum og hvernig ætti að fá fjármagn til landsins. Það síðastnefnda væri nauðsynlegt til að komandi kynslóðir geti hleypt sínum verkefnum og draumum í framkvæmd."

Öll frétt Eyjunnar

Davíð (Mogginn) og Hjörleifur eru sammála!

Hið blágræna bandalag gegn ESB er farið að taka á sig sérkenniulegar myndir. Svo virðist sem alhörðustu frjálshyggjumenn og alhörðustu kommúnistar geti nú sameinast gegn höfuðandstæðingi sínum, ESB.Hið nýja ,,kalda stríð" á Íslandi virðist fjalla um þetta mál, aðildarviðræðurnar og ESB.

Þetta sést vel í Reykjavíkurbréfi Davíðs Oddssonar, Morggaritstjóra í helgarblaðinu, þar sem ALLT bréfið er lagt undir ESB.

Það er talað um drottinsvik, musteri í Mekka, svik, blekkingarleik o.s.frv. S.s. ekkert nýtt efni úr Hádegismóum! Skáldlegt orðfærið leynir sér ekki!

En það eru undirtektirnar í sambandi við grein Hjörleifs Guttormssonar, frá því um daginn, sem vekja athygli. 

Höfundur Reykjavíkurbréfs talar um VG og ábyrgð þess flokks á ESB málinu. Svo segir; "Eins og Hjörleifur Guttormsson, fyrrverandi ráðherra, vék að í grein í Morgunblaðinu ber VG »óskoraða pólitíska ábyrgð« á málinu. Sá flokkur er að þramma með þjóðina í taumi fram og aftur blindgötuna. Og sjálfur er hann í taumi Samfylkingarinnar. Sumt er svo einfalt og klárt að það ætti ekki að þurfa að segja það. Eitt af því er það sem Hjörleifur Guttormsson segir um VG í lok greinar sinnar: »Flokkur sem lýst hefur yfir andstöðu við ESB-aðild getur hvorki sóma síns vegna né siðferðilega leikið áfram tveim skjöldum eins og hann nú gerir."

Það er tímanna tákn að Davíð Oddsson vitni í Hjörleif Guttormsson, máli sínu til stuðnings!

Við lifum á MJÖG SÉRSTÖKUM TÍMUM!

 

Veldur ESB klofningi innan VG?

"Orðið á götunni" á Eyjunni skrifar:

,,Orðið á götunni er að Vinstri grænir horfi fram á mögulegan klofning í Evrópumálum á flokksráðsfundi sem haldinn verður seinni partinn í nóvember. Flokkurinn hefur raunar verið í mestu vandræðum með þetta stóra mál allt frá því fyrir kosningarnar vorið 2009. Enda þótt almenn stefna flokksins sé gegn því að Ísland gangi í ESB hefur meirihluti þingmanna hans þó stutt hið lýðræðislega umsóknarferli, sem byggist á því að semja við ESB og leggja slíkan samning í hendur þjóðarinnar. Nokkrir þingmenn hafa þó alla tíð verið andsnúnir þeirri leið og ekki viljað leyfa þjóðinni að kjósa um aðildarsamning.

Á síðasta flokksráðsfundi VG var ákveðið að fresta ákvörðun um málið og láta málefnaþing flokksins taka á því. Slíkt þing var haldið nýlega og komst að engri niðurstöðu – nema kannski að þar lá við klofningi innan flokksins. Einsog Eyjan greindi frá, söfnuðu nokkrir flokksmenn undirskriftum á málefnaþinginu til þess að skora á flokksforystu að draga ESB-umsóknina til baka. Ekkert varð þó af því að áskorunin fengi alvöru meðferð á þinginu og lét formaðurinn plaggið sem vind um eyru þjóta.

Í kjölfarið hefur myndast enn sterkari hópur fyrir því að halda ESB-umsóknarferlinu til streitu. Gott dæmi um það er grein sem Björg Eva Erlendsdóttir skrifaði og Eyjan greindi frá, en þar gagnrýndi hún Bjarna Harðarson og fleiri sem töluðu heldur þjóðernislega um málið, að því er henni fannst, og er þá vægt til orða tekið. Kjarninn í grein Bjargar Evu, sem margir þingmenn VG hafa tekið undir, er að flokkurinn eigi ekki að fylgja „öfgahægrimönnum“ á borð við Björn Bjarnason og Styrmi Gunnarsson í blindni í Evrópumálum."

Allt Orðið á götunni

Það væri nokkuð kaldhæðnislegt að sá flokkur sem kennir sig við umhverfisvernd og segist vera umhverfisflokkur myndi verða fyrstur flokka til að klofna í tvennt (þó sumir flokkar séu í raun klofnir)!

VG hefur jú einmitt tækifæri tilað láta eitthvað að sér kveða í alþjóðlegu samstarfi á sviði umhverfismála í gegnum ESB. Þetta hafa t.d. sænskir umhverfissinnar fattað, en það tók þá nokkurn tíma.

VG er hinsvegar flokkur þar sem þröngir hagsmunir grassera, hagsmunir sem krefjast óbreytts ástands og kyrrstöðu. "Hagsmunir" sem eru lafhræddir við breytingar!

Fréttablaðið: Kjör neytenda myndu batna við aðild að ESB. Heimssýn án neytendastefnu!

Fréttablaðið er með ítarlega fréttaskýringu í helgarútgáfu sinni um áhrif ESB-aðildar og upptöku Evru á neytenda og smásölumarkað. Niðurstaðan er í stuttu máli sú að þetta tvennt, aðild og Evra myndi koma íslenskum neytendum til góða.

Í fréttaskýringunni er rætt við fulltrúa Nei-sinna, framkvæmdastjóra Heimssýnar, Pál Vilhjálmsson. Í viðtali við hann segir:

,,Páll Vilhjálmsson, starfsmaður Heimssýnar, sem eru samtök andstæðinga ESB-aðildar, segir að hagsbætur sem kæmu af tollabandalagi við Evrópu séu nú þegar á hendi stjórnvalda.

"Við getum stjórnað þessu sjálf með því að hækka eða lækka álögur. Sé vilji til að fella niður þær hömlur, sem féllu niður ef við færum undir landbúnaðarstefnuna, þá yrði það málamiðlun innanlands, sem mætti endurskoða eftir aðstæðum. En ef við erum komin inn í ESB og sjáum fram á hrun íslensks landbúnaðar þá getum við ekki tekið það til baka. Þá erum við ofurseld valdinu í Brussel," segir Páll.

Um hvað Heimssýn leggi til að verði gert í tolla- og stöðugleikamálum, til að bæta núverandi stöðu neytenda, hvort hreyfingin vilji til að mynda að tollar og vörugjöld á landbúnaðarvörum verði felld niður, segir hann að samtökin hafi enga neytendastefnu sem slíka. Þau hafi það eitt að markmiði að Ísland gangi ekki í ESB."

Hér vakna spurningar: Fyrst við getum þetta sjálf, af hverju erum við þá ekki búin að því? Af hverju er Ísland eitt dýrasta land í heimi að lífa í ? Af hverju í ósköpunum er þá ekki búið að sjá til þess að Íslendingar þurfi ekki að borga miklu meira fyrir mat en aðrir í Evrópu??? Þetta verður að teljast klénn málflutningur!

Og það er athyglisvert að heyra framkvæmdastjóra viðurkenna að samtökin hafi ekki neina neytendastefnu. Það er í algerri andstöðu við Evrópusinna, sem hafa það einmitt að markmiði, og það stóru, að BÆTA KJÖR NEYTENDA!! Með aðild að ESB!

Heimssýn eru nefnilega "eins-málaefnis" fyrirbæri og það viðurkennir Páll. Slík er "Heimssýnin"!!!

Það eina sem allt snýst um er bara NEI - NEI - OG AFTUR NEI! 

Ps. Svo viljum við bara minna á, vegna endurtekinna rangfærslna Nei-sinna, að landbúnaður hefur hvergir hrunið í ESB-RÍKI! 

Dr. Magnús Bjarnason: ESB-aðild jákvæði fyrir þjóðina í heild

Dr. Magnús Bjarnason hélt mjög áhugaverðan fyrirlestur í HR í morgun um doktorsritgerð sína, The Political Economy of Joining the European Union: Iceland‘s Position at the Beginning of the 21st Century.

Þar rakti Magnús helstu niðurstöður sínar og í máli hans koma fram að vel mögulegt væri að landsframleiðsla (VLF) myndi aukast um allt að 5-6% með aðild að ESB. Hann tók það þó skýrt fram að það tæki tíma. Hann nefndi einnig að áætluð af aðild áhrif á VLF myndu verða 8-9% í Króatíu, sem stendur í aðildarviðræðum. 

Hann sagði einnig um áhrif sameinginlegrar myntar, en að sögn Magnúsar er viðskiptaaukning að meðaltali um 25% á milli aðildarlanda á sameiginlegu myntsvæði ESB.

Magnús fjallaði ítarlega um bæði landbúnað og sjávarútveg og kom þar m.a. inn á matarverð, sem var 60% hærra hér á landi á árunum 2003-2006. Hann segir að tölur eftir þetta séu nánast ónothæfar, m.a vegna hruns krónunnar og bankakerfisins árið 2008.

Magnús sagði einnig að með aðild að sameiginlegri landbúnaðarstefnu ESB (CAP) væri hægt að áætla að ráðstöfunartekjur á íslandi myndu aukast um 1.5 – 4%. Þetta myndi m.a. gerast með hagræðingu og flutningi starfskrafta yfir í betur launuð störf.

Magnús ræddi möguleika í samningaviðræðum í sjávarútvegi. Hann telur erfitt, en þó ekki útilokað að fá undanþágur. Að hans mati er besta lausnin til frambúðar að fara mun betur (harðar) eftir tillögum fiskifræðinga í fiskveiðimálum í Evrópu.

Magnús telur aðild vera jákvæða fyrir þjóðina í heild en hann lagði á það mikla áherslu að menn yrðu að "girða fyrir hluti“ eins og hann orðaði það og átti þá við ýmis hagsmunamál Íslands í aðildarsamningum.

Jón Karl Helgason um ESB-fjármagn

Jón Karl Helgason, bókmenntafræðingur, á skrifar áhugaverða færslu á blogg sitt, sem og á Sterkara Ísland.  Útgangspunktur hans er ætlaður "fjáraustur" ESB til Íslands vegna aðildarviðræðnanna. Um daginn talaði Nei-foringinn, Ásmundur Einar Daðason um ,,ómælda fjármuni" frá ESB. Sem er auðvitað della. Það verður ÁKVEÐNU fjármagni veitt í þetta dæmi, bæði hjá ESB og íslenskum stjórnvöldum!

Jón Karl segir þessa umræðu byggða á misskilningi og skrifar m.a. :

,,Aðlögunarferli Íslands að regluverki og stofnanakerfi ESB hófst árið 1994 með aðild okkar að EES samningunum og er talið að því sé 70% lokið. Aðlögunin heldur samt áfram dag frá degi með upptöku nýrra lagabálka ESB án þess að við Íslendingar höfum nokkuð um þá að segja. Þetta er vissulega gróf ögrun við lýðræði í landinu.

Á síðustu sextán árum hafa milljaraðarnir streymt hingað frá Brussel. Íslensk sveitarfélög, félagasamtök, bændur, nýsköpunarfyrirtæki, opinberar stofnanir og óteljandi vísindamenn og listamenn hafa verið að taka við peningum frá ESB án þess að roðna eða blána. 7. rannsóknaáætlun ESB, Almannavarnaáætlun, Daphne III - gegn ofbeldi á konum og börnum, Evrópa unga fólksins, eTwinning - rafrænt skólasamstarf, Progress - jafnréttis- og vinnumálaáætlun, MEDIA Kvikmynda-, sjónvarps- og margmiðlunaráætlun ESB, Menningaráætlun ESB og Menntaáætlun ESB eru dæmi um þau nöfn sem ESB gefur lítt dulbúnum mútugreiðslum sínum.

Þá má ekki má gleyma öllum þeim þúsundum af ungmennum sem hafa verið að fara til lengri eða skemmri dvalar í Evrópusambandslöndum í gegnum ERASMUS námsmannaskiptin."

Allur pistill Jóns Karls

 

Anna Margrét vill KLÁRA DÆMIÐ!

Annar Margrét Guðjónsdóttir, varaþingamaður og stjórnarmaður í Sterkara Ísland, skrifar ágæta grein í Fréttablaðið í dag. Hún vill klára aðildarsamninga við ESB og láta síðan kjósa um málið. Anna skrifar:

,,Nokkrir þingmenn hófu upp raust sína fyrir skömmu og fóru fram á að umsókn Íslands um aðild að Evrópusambandinu verði dregin til baka. Rökin fyrir þessari kröfu eru haldlítil og svo óljós að erfitt er að henda reiður á þeim. Vafasömum fullyrðingum um vilja þings og þjóðar til þessa máls, mikinn kostnað og fulla aðlögun að Evrópusambandinu meðan á aðildarviðræðum stendur er haldið á lofti, svo fátt eitt sé nefnt. Hér er rétt að staldra við og leiða fram nokkrar staðreyndir.

Meirihluti landsmanna, eða 64%, vill ljúka aðildarviðræðunum og fá að taka upplýsta afstöðu með eða á móti aðild þegar samningur liggur fyrir. Það sýnir m.a. skoðanakönnun MMR sem birtist í Fréttablaðinu í lok september sl. Allt tal um að þjóðin vilji hætta aðildarviðræðum er því úr lausu lofti gripið.

Um kostnað vegna aðildarviðræðna má lesa í meirihlutaáliti utanríkismálanefndar Alþingis, sem samþykkt var í júlí 2009. Þar kemur fram að áætlaður beinn kostnaður vegna aðildarumsóknarinnar sé metinn á 400 milljónir króna fyrir tímabilið 2009–2012. Þar af er kostnaður utanríkisráðuneytisins áætlaður 300 milljónir en kostnaður annarra ráðuneyta 100 milljónir. Undir þennan kostnað fellur starfsmanna- og ferðakostnaður og aðkeypt sérfræðiráðgjöf. Á sama tíma er gert ráð fyrir að þýðingakostnaður verði samtals 590 milljónir króna en í nefndarálitinu kemur fram að ekki sé hægt að skilgreina hann sem beinan kostnað við aðildarviðræðurnar og eru færð rök fyrir því.

Óttinn við fulla aðlögun á meðan á aðildarviðræðuferlinu stendur byggir á vanþekkingu sem rétt er að uppræta. Hér skulu nefnd dæmi um þrjú verkefni sem gætu fallið undir hina svokölluðu IPA-aðstoð Evrópusambandsins sem framangreindir þingmenn óttast svo mjög."

Öll greinin 

Ómar Valdimarsson: Góðar fréttir af aðlögun

Einu sinni var Mogginn í Austurstræti og þá sáu menn þar rautt, þegar þeir litu til austurs. Það var í þá daga er Sovétríkin voru og hétu. 

Nú sjá mennirnir í Hádegismóum ennþá rautt þegar þeir horfa í austur, en nú er það Evrópa og ESB sem er orsök roðans.

Morgunblaðið í dag gerir sér (mikinn) mat úr ætlaðri AÐLÖGUN Íslands að ESB og finnst þetta hið versta mál. 

Ómar Valdimarsson, blaðamaður, bloggar um þetta, finnst áðurnefnd aðlögun af hinu góða og skrifar:

,,Það voru góðar fréttir sem Mogginn flutti í gær af umsóknar/aðlögunarferlinu að ESB. Sambandið ætlast til þess að Íslendingar taki upp Evru, geri umbætur á dóms- og stjórnkerfi og aðlagi atvinnuvegina að þeim búskaparháttum sem tíðkast meðal menningarþjóða Evrópu. 

Mér finnst þetta góðar fréttir því þær gefa til kynna að um síðir megi vænta þess að vit verði haft fyrir okkur um ýmis þau mál sem hafa reynst okkur ofviða. Gleymum því ekki að helstu umbætur á t.d. dómskerfinu hér hafa verið gerðar til samræmis við góða siði í Evrópu. Aðskilnaður lögreglu- og dómsvalds, sem ekki hafðist í gegn fyrr en eldri maður á Akureyri neyddist til að fara með mál sitt fyrir Mannréttindadómstól Evrópu, er bara eitt dæmi um það. Og þótt ýmislegt umbótastarf sé verið að vinna hér í stjórnkerfinu þessi misserin (eins og þeir vita sem vilja vita), þá þarf vafalaust utanaðkomandi aðstoð til að stíga skrefin til fulls."

Allur pistill Ómars 

Í þessu samhengi má minna á að Ísland hefur farið í gegnum mikla aðlögun að ESB í gegnum EES samninginn, en um 70% af allri löggjöf hér á landi kemur frá ESB. M.a. sagði Geir Haarde á sínum tíma að EES-samningurinn hafi reynst okkur vel. Var sú aðlögun þá slæm?

Og kannski kemur meiri evrópsk aðlögun í veg fyrir handahófskenndar aðgerðir, eins og t.d. þegar Þjóðhagsstofnun var lögð niður, vegna þess að þáverandi forsætisráðherra var ekki sammála stofnuninni!

Sá fyrrum forsætisráðherra ritstýrir nú Mogganum og heitir Davíð Oddsson. 

Svo má í þessu samhengi vitna í skýrslu þingmanna um Rannsóknarskýrslu Alþingis, en þar semg m.a.: ,, Það er mat þingmannanefndarinnar að skýrsla rannsóknarnefndar Alþingis sé áfellisdómur yfir íslenskri stjórnsýslu, verklagi hennar og skorti á formfestu jafnt í ráðuneytum sem sjálfstæðum stofnunum sem undir ráðuneytin heyra. Svo virðist sem aðilar innan stjórnsýslunnar telji sig ekki þurfa að standa skil á ákvörðunum sínum og axla ábyrgð, eins og fram kemur í skýrslu rannsóknarnefndarinnar. Vegna smæðar samfélagsins skiptir formfesta, skráning upplýsinga, verkferlar, tímamörk og skýr ábyrgðarsvið enn meira máli en í stærri samfélögum. Í ljós kemur að upplýsingaskylda ráðuneyta og stofnana, innbyrðis og út á við, virðist ekki hafa verið virk né heldur frumkvæðisskylda, gagnsæi og rekjanleiki."

Gæt evrópsk "aðlögun" verið lausn á þessu?